«Мой заробак у Польшчы вырас у дзесяць разоў» — гінеколаг Ганна Каско

Гінеколаг Ганна Каско пераехала ў Польшчу чатыры гады таму. Цяпер яна адна з самых вядомых спецыялістаў Варшавы. 

Па словах Ганны, у Беларусі яе заробак быў па беларускіх мерках высокі. Але для таго, каб столькі зарабіць ёй даводзілася працаваць амаль круглыя суткі.

«Я працавала ў раддоме да чатырох, з чатырох да васьмі — у прыватным цэнтры. І яшчэ была ўргентнай. Гэта значыць цябе могуць ноччу выклікаць на УГД», — згадвае Каско ў інтэрв'ю ютуб-каналу Аксаны Дараховіч «Поспех мігранта».

З пераездам у Варшаву пасля настрыфікацыі дыплому доктара запрасілі працаваць у прыватную клініку. З цягам часу ў яе з'явілася яшчэ адно месца працы. У выніку жанчына працягвае працаваць амаль у тым жа рытме, што і ў Беларусі. Аднак пры гэтым яе заробак павялічыўся ў дзесяць разоў.

Па словах Ганны, з грошай, якія людзі аддаюць за прыём у прыватнай клініцы, доктар атрымлівае ад 40% да 60%.

Пры гэтым жанчына жыве сціпла і імкнецца адкладваць 80% заробку.

«Адкладваю як я свае грошы, так і муж свае. Потым мы можам разам нешта там купіць ці пабудаваць. Я яму фуру адзін раз купіла. Ён на той момант перавозкамі займаўся. Гэта было яшчэ ў Беларусі», — дзеліцца ўспамінамі жанчына.

У час размовы Ганна згадала некалькі неардынарных выпадкаў. Адзін з іх адбыўся зусім нядаўна:

«Учора прыйшла на прыём жанчына. Яна нараджала ў мяне год таму. І піша мне, што тэст станоўчы. Я пытаюся, ці корміць грудзямі. Адказвае, што так. Я кажу, каб прыходзіла. А там 26 тыдняў цяжарнасці. Яна думала, што кішэчнік, а гэта варушэнні [плода]».

Аднойчы, па словах Ганны, на прыём да яе прыйшла дзяўчына, якая забылася дастаць тампон. І ён прабыў у похве два месяцы.

Дакторка адзначае, што ёй вельмі цікава назіраць за бацькамі, якія прысутнічаюць на родах.

«Па-першае, як мужчына нервуецца. Гэта вельмі цікава назіраць. І як яны потым увогуле губляюцца, калі тваё дзіця [нараджаецца]. Яны не вераць у гэта ўсё. Перасякаюць пупавіну, рукі дрыжаць».

Як сцвярджае Ганна, у яе практыцы былі вельмі рэдкія выпадкі, калі мужчына страчваў прытомнасць падчас прысутнасці пры родах.

«Калі страчвае прытомнасць, мы адразу гаворым: «Няма часу займацца вамі. Калі вам дрэнна, кладзіцеся адразу на падлогу». А потым ужо анестэзіёлаг, калі што, дапамагае».

Як сцвярджае Ганна, у Польшчы партнёрскія роды — звычайная з'ява:

«У Польшчы, калі жанчына нараджае без мужа, гэта ўвогуле нешта. Чаму? Чаму яна нараджае без мужа? Можа, няма. Яны прывучаныя, што муж заўсёды. Удваіх зрабілі — удваіх нараджаюць».

Ганна — дачка палітвязня Ірэны Бернацкай з Ліды. У 2020-м Ганна далучылася да забастоўкі пратэсту супраць фальсіфікацыі выбараў і рэпрэсій.

• 42
• 1
• 1
• 1
• 2
• 2
• 0
• 3