«Гэта Пуцін!» У Расіі жанчына пабачыла ў кавярні эльфа Добі, прыняла яго за Пуціна і запатрабавала прыбраць «абразу»
«Вось гэтая пысачка вельмі падобная на Пуціна. А ў яго сёння дзень нараджэння!»
У Саратаве пажылая жанчына абурылася гіпсавай галавой эльфа Добі з фільмаў пра Гары Потэра, якую пабачыла ў вітрыне мясцовай кавярні. Інцыдэнт здарыўся 7 кастрычніка, у дзень 74‑годдзя Уладзіміра Пуціна.
На відэа, якое трапіла ў сеціва, жанчына выклікала супрацоўніцу кавярні на вуліцу і заявіла, што персанаж надта падобны да прэзідэнта РФ:
«Вось гэтая пысачка вельмі падобная на Пуціна. А ў яго сёння дзень нараджэння! З чалавека ўвогуле нельга смяяцца. Да любога чалавека трэба ставіцца з павагай. <…> Ён падобны! Вы самі бачыце гэта выдатна. Прайшлі выбары. Ён зноў абраны на гэтую пасаду. Ён працуе. Ён ваюе!» — абуралася жанчына.
Яна прыгразіла паклікаць паліцыю.
Супрацоўніца кавярні адказала, што калі наведвальніца бачыць у дамавым эльфе расійскага лідара, то гэта яна яго і абражае. Аднак жанчына працягвала настойваць на сваім і параіла «не нарывацца» ды перадаць заўвагу кіраўніцтву.
Як паведамілі журналістам ASTRA ў кавярні, гіпсавая галава Добі больш за год выкарыстоўвалася як банка для чаявых і выдатна ўпісвалася ў канцэпцыю ўстановы. Пасля інцыдэнту і пагроз выклікаць сілавікоў персанажа часова прыбралі. На пытанне пра лёс Добі суразмоўніца ASTRA паведаміла, што герой Гары Потэра, як ён любіў рабіць у кнігах, знік:
«Добі пакуль уехаў на ПМЖ у іншае месца, каб не траўмаваць людзям псіхіку ў сувязі з восеньскім завастрэннем <…> Каб дэментары не наляцелі».
Параўнанне Пуціна з дамавым эльфам з’яўляецца даўнім мемам: яшчэ ў 2003 годзе група расійскіх юрыстаў збіралася падаваць у суд на стваральнікаў фільма за вонкавае падабенства Добі да прэзідэнта РФ.
Каментары
- Гитлера конечно, товарищ Сталин!
- а ви кого имели в виду, товарищ Берия???