Таксістка з Таджыкістана насмерць збіла беларуску ў Польшчы — і спакойна пакінула краіну
У Варшаве таксістка з Таджыкістана збіла на пешаходным пераходзе 46‑гадовую беларуску-стаматолага Наталлю Борухаву. Жанчына памерла праз 16 дзён. А таксістка паспела спакойна з'ехаць з Польшчы і цяпер ніхто не ведае, дзе яна, піша выданне Wiadomosci.
1 чэрвеня Наталля вярталася з працы, калі яе на сярэдзіне пешаходнага пераходу збіла таксістка на «Таёце». Кіроўца пераехала жанчыну двойчы. Сведка расказаў, што пасля першага ўдару Наталля спрабавала падняцца, але аўто ўрэзалася ў яе другі раз і прыціснула да BMW, што было побач. Таксі спынілі толькі сведкі.
За рулём была грамадзянка Таджыкістана Шахназ М. Віза ў яе была на працу ў будаўнічай фірме ў Шчэціне. Што яна рабіла ў Варшаве за рулём таксі, невядома.
Сям'я беларускіх стаматолагаў
Наталля і ейны муж Павел — беларускія стаматолагі, якія пераехалі ў Польшчу ў лютым 2022 года. Павел лячыў пацыентаў, а Наталля вяла дакументы і справы кабінета. Пара гадавала дзвюх дачок. А ў маі, за некалькі тыдняў да трагедыі, адкрылі сваю клініку.
У дзень аварыі Наталля спрабавала патэлефанаваць мужу, але ён быў з пацыентам і адхіліў званок. Пра аварыю яму паведаміла старэйшая дачка. Калі Павел прыбег, жонка яшчэ ляжала часткова пад машынай, была бледная і казала, што не адчувае ног.
Пяць аперацый
Наталлю павезлі ў клінічны шпіталь МУС. Траўмы былі вельмі цяжкія: разбіты таз і пашкоджаны тазасцегнавы сустаў, пераломы адросткаў пазванкоў, траўма брушной поласці і раздушаныя ўнутраныя органы.
Жанчына перанесла пяць аперацый, некроз кішэчніка і страўніка, медыкаментозную кому. Павел кожны дзень быў побач і пераконваў жонку, што яна вытрымае. Наталля памерла 16 чэрвеня.
Таксістка з'ехала з Польшчы на наступны дзень пасля смерці беларускі
Першыя два тыдні справа нават не расследавалася належным чынам. Вадзіцельку не дапыталі, яе тэлефон не забралі, яе асобу не праверылі. Паліцыя толькі агледзела месца здарэння і праверыла ўдзельнікаў на алкаголь. Падазраваная свабодна раз'язджала па Варшаве.
Справа зрушылася толькі пасля смерці Наталлі. Але ўжо на наступны дзень Шахназ М. выехала з Польшчы.
Пра гэта не ведалі да верасня, бо ніхто не праверыў, ці яна яшчэ ў краіне.
Адначасова адвакаты сям'і месяцамі не маглі атрымаць доступ да матэрыялаў справы.
2 верасня пракуратура накіравала ў суд матэрыялы, каб узяць падазраваную пад варту, і плануе абвясціць яе ў вышук. Але нават калі Шахназ М. знойдуць у Таджыкістане, дамовы аб экстрадыцыі паміж Польшчай і Таджыкістанам няма, і Таджыкістан не ўдзельнічае ў Еўрапейскай канвенцыі аб экстрадыцыі. Выдача залежала б толькі ад добрай волі тамтэйшага суда. Сям'я сама наняла адваката ў Таджыкістане, каб высветліць, ці вярнулася туды вадзіцелька.
Павел застаўся з дзвюма дочкамі. Малодшай 11 гадоў. Старэйшая ўзяла акадэмічны адпачынак і вярнулася ў Варшаву дапамагаць бацьку весці клініку. Павел кажа, што ўсё жыццё жонка была яго адзінай любоўю і найлепшым сябрам, і што цяпер у яго засталіся толькі дзеці.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім7
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі1010
Каментары
Ну а паліцыя ў Эўропе канешне суперская. Там відаць галоўная задача каб не было лішніх папер, каб, крый божа, не завесьці справу, а потым яе раскручваць.