Улады Германіі заявілі пра «фактычную немагчымасць» правядзення ў сябе чэмпіянату свету па хакеі, калі ў ім будзе ўдзельнічаць Расія
Урад Германіі лічыць «фактычна немагчымым» правядзенне ў краіне чэмпіянату свету па хакеі 2027 года, калі ў турніры будзе ўдзельнічаць зборная Расіі. Пра гэта 6 лістапада заявіў афіцыйны прадстаўнік нямецкага ўрада Штэфан Карнэліус пасля кансультацый з Міжнароднай федэрацыяй хакея (IIHF), Нямецкім хакейным саюзам і Нямецкім алімпійскім спартыўным саюзам.
Па словах Карнэліуса, Германія хоча правесці чэмпіянат у запланаваныя тэрміны, аднак вяртанне расійскай зборнай можа выклікаць байкоты з боку іншых удзельнікаў, што зробіць правядзенне спаборніцтваў практычна немагчымым. Таму цяпер нямецкія ўлады маюць намер праз перамовы вывучыць магчымыя варыянты вырашэння сітуацыі.
Прадстаўнік нямецкага ўрада адзначыў, што праблемы ўзнікаюць як з пункту гледжання спорту, так і з эканамічнага боку. Некалькі краін ужо пагражалі байкотам турніру ў выпадку ўдзелу Расіі. Сярод іх — Фінляндыя, якая з'яўляецца дзейным чэмпіёнам свету. На думку Карнэліуса, гэта сведчыць пра тое, што міжнародная хакейная супольнасць не падтрымлівае вяртанне расійскай зборнай, нягледзячы на рашэнне Спартыўнага арбітражнага суда.
Акрамя таго, чэшскі аўтавытворца Škoda, які з 1993 года з'яўляецца генеральным спонсарам чэмпіянатаў свету па хакеі, папярэдзіў, што можа спыніць падтрымку турніру ў выпадку допуску Расіі. Аналагічныя заявы зрабілі і некаторыя іншыя партнёры спаборніцтваў.
Раней магчымасць адмовы Германіі ад правядзення чэмпіянату дапускаў старшыня праўлення Нямецкага хакейнага саюза Франк Луц. Ён заявіў, што пазіцыя арганізацыі застаецца нязменнай: яна выступае супраць вяртання расійскіх нацыянальных зборных на міжнародныя хакейныя турніры. Паводле яго слоў, удзел Расіі меў бы для Германіі сур'ёзныя наступствы ў сферах бяспекі, палітыкі і эканомікі.
Чэмпіянат свету па хакеі 2027 года павінен прайсці з 14 да 30 мая на арэнах у Дзюсельдорфе, Гельзенкірхене і Мангейме. Удзельнікаў размеркавалі на дзве групы па восем зборных яшчэ вясной 2026 года. Расія і Беларусь у склад удзельнікаў не ўвайшлі, паколькі раней былі адхіленыя ад міжнародных спаборніцтваў праз расійскую агрэсію супраць Украіны і падтрымку гэтай агрэсіі з боку Беларусі.
Расклад матчаў ужо зацверджаны, а ў кастрычніку пачаўся продаж квіткоў. Калі Расію ўсё ж дапусцяць да турніру, арганізатарам, паводле паведамленняў СМІ, магчыма, давядзецца выключыць з яго зборную Украіны. Яна мае найніжэйшы рэйтынг сярод каманд, якія прайшлі адбор, і ўпершыню з 2007 года заваявала права ўдзельнічаць у элітным чэмпіянаце свету.
Галоўны спонсар Міжнароднай федэрацыі хакея прыгразіў адмовіцца ад чэмпіянату свету ў выпадку допуску Расіі
Канада не дапусціць хакеістаў з Беларусі і Расіі да ўдзелу ў моладзевым чэмпіянаце свету
Латвія заявіла, што не будзе гуляць у хакей супраць Беларусі і Расіі. І яна такая не адна
Зборную Расію вяртаюць да міжнародных хакейных спаборніцтваў
Цяпер чытаюць
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»35
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2525
Каментары