Дзяніс Кур’ян праз 27 гадоў адшукаў іспанскую сям’ю, у якой гасцяваў школьнікам. Цяпер прыязджае да іх са сваімі дзецьмі
А іспанскія «маці» і «бацька», аказваецца, больш за чвэрць стагоддзя захоўвалі апошні ліст беларускага школьніка.
Бізнэсмен і тэлевядучы Дзяніс Кур’ян падзяліўся ў інстаграме, што нядаўна гасцяваў у іспанскай сям’і, да якой прыязджаў на аздараўленне ў школьныя гады. Праўда, цяпер ужо са сваімі жонкай і дачкой — але «маці» і «бацька» радуюцца ўсім як родным.
Упершыню Дзяніс прыехаў да Аніты і Манола ў 1996 годзе — тады яму было ўсяго 12 гадоў. Згадвае, што вельмі ўсяго саромеўся, бо ніколі раней не выязджаў за мяжу. Яшчэ і ні слова не ведаў на іспанскай — але за месяц прыйшлося яе засвоіць, бо ніякай іншай мовы ніхто ў сям’і не ведаў.
«Тут я зразумеў, як гэта, калі безумоўна любяць і прымаюць такім, які ёсць. А яшчэ шмат цёплых і эмацыйных зносін», — напісаў Дзяніс.
У 1998 годзе сям’я зноў запрасіла да сябе беларускага хлопчыка. Нейкі час падтрымлівалі сувязь праз звычайную пошту. Але ж у выніку ўсе нітачкі абарваліся.
Праз 27 гадоў Дзяніс знайшоў гасцінных людзей праз інстаграм. І тады ж — у 2025 годзе — адправіўся да іх ужо са сваімі старэйшымі дзецьмі. З гэтай нагоды іспанцы зрабілі сапраўднае свята. Аніта прадэманстравала шкатулку, інкруставаную саломкай, якую беларускі хлопчык прывёз у падарунак калісьці. А шчаслівы бізнэсмен паўтараў на старых месцах фота свайго дзяцінства.
Дзяніс абяцаў, што больш ніколі не згубіцца. І сапраўды цяпер штогод прыязджае ў Іспанію ў госці «на аздараўленне». Днямі ён паказваў у сторыс сваю чарговую паездку.
З замілаваннем Кур’ян чытаў апошні ліст, які даслаў сям’і пры канцы 90-х: у ім ён пісаў пра сваю новую дзяўчыну Маргарыту, якая «вельмі прыгожая і вельмі падабаецца». Падпісчыкам ён прызнаўся, што праз столькі гадоў сам не можа згадаць, пра якую ж прыгажуню ідзе гаворка.
Зрабіў рэпартаж Дзяніс і з лецішча, дзе адпачываў у дзяцінстве: «Агарод майго іспанскага таты. Гэта хурма, там вось алівачкі. Тут быў вінаград і хутка будзе файнае вінішка ўраджаю 2026 года. Лаўровы лісцік — можна ў супчык. Памідоркі падобныя да нашых. Толькі нашы ў цяплічцы, а гэтыя вось на загоне. Вось гэтыя палеткі — гэта ўсё манга, шмат-шмат манга».
Дзяніс распавёў, што раней неяк саромеўся іспанскай традыцыі цалавацца тройчы, а цяпер лічыць гэта вельмі кранальным.
«Наша Нiва» — бастыён беларушчыны
ПАДТРЫМАЦЬ«А колькі шчасця ў вачах!» Кахно, Грыбалёва, Карпанаў і іншыя беларускія селебрыці адвялі дзяцей у школу ФОТЫ
Вядомая беларуская бізнэсвумэн — і жонка праўладнага блогера-мільённіка — шукае арандатараў для свайго катэджу. Кошт ваў!
Беларускае тэлебачанне 90-х: узгадваем яркія праекты і папулярных вядучых
Тэлевядоўца Дзяніс Кур'ян у трэці раз стаў бацькам
Каментары