Пурпуровае мора і трактары-амфібіі. Як на Палессі збіраюць журавіны
У самым сэрцы Палесся ў гэтыя дні можна назіраць незвычайную карціну — вадаёмы, якія становяцца чырвонымі. Не, гэта не прыродная анамалія. Усё тлумачыцца проста: у ААТ «Парахонскае» на Піншчыне збіраюць буйнаплодныя журавіны. Менавіта ягады, што падымаюцца на паверхню, пакрываюць ваду пурпуровым дываном. Такі спосаб збору журавін для Беларусі незвычайны, паведамляе БелТА.
Журавіны — сапраўдная скарбніца вітамінаў: яны ўмацоўваюць імунітэт, абараняюць сасуды і дапамагаюць у прафілактыцы інфекцый. У «Парахонскім» гэты суперфуд вырошчваюць на 80 га. Збіраць яго пачалі ў апошнія дні верасня.
«Журавіны не пераносяць перасушаных глеб і пераўвільгатнення. Растуць яны на глебах з узроўнем грунтавых вод каля 20—30 см. Заліваюцца чэкі толькі перад уборкай. Ягады збіраюцца, і вада зліваецца назад», — патлумачыў начальнік вытворчага ўчастка «Палескія журавіны» Аляксандр Савіла.
Збор «чырвонага золата» цяперашняй восенню палешукі пачалі крыху пазней, чым летась. На сезон паспявання ягад паўплывала надвор’е, у тым ліку зацяжная вясна. Спецыялісты адзначаюць, што апошнім часам кожны год выдаецца з экстрэмальнымі ўмовамі для раслінаводства: здараюцца зваротныя замаразкі, фіксуецца недахоп вільгаці. Даводзіцца нямала панервавацца.
У Беларусі журавінамі займаюцца некалькі гаспадарак. У Пінскім раёне яны растуць у чэках, а для іх уборкі выкарыстоўваюць паўмеханізаваны мокры спосаб. Такога ў краіне няма больш ні ў каго. Перавага — у хуткасці і выгадзе, бо на ручны збор ягад патрабуецца нямала часу, ды і страт значна менш.
«Напярэдадні вечарам мы адкрываем шлюзы, заліваем. З раніцы пачынаем працаваць — да вечара чэк ужо прыбраны. На абмалоце ў нас 4—5 трактароў, адна адзінка на транспарцёры для забору журавін з чэка і адзін трактар на адвозе. Нічога складанага», — расказаў начальнік участка.
У вадзе, равучы маторамі, старанна працуюць трактары-амфібіі. Рухаюцца адзін за адным і абмалочваюць кусты з чырвонымі ягадамі. Унутры яны пустыя, таму, як паплаўкі, падымаюцца на паверхню. У вадзе за дзень тэхніка праводзіць сем гадзін, таму яе абслугоўванню надаюць асаблівую ўвагу.
«Бывае, ланцугі рвуцца. Мы з сабой запасы бяром звычайна і мяняем адразу. Дапусцім, у вадзе зламаўся — адзін аднаму дапамагаем, рамантуем і далей працаваць», — падзяліўся трактарыст Алег Лаўрэнка.
Працэс уборкі журавін сёлета ён убачыў з іншага боку. Раней адвозіў на сартаванне. Прыйшлося перагледзець і экіпіроўку.
«Натуральна, вада трапляе ў кабіну трактара. Таму добра апранаюся, без цёплых шкарпэтак тут ніяк. Абуваю высокія гумовыя боты», — заўважыў мужчына.
Пасля абмалоту журавіны сцягваюць пантонамі бліжэй да берага і па транспарцёры грузяць на прычэп. Наступны этап — сартаванне. На канвееры ягады чысцяць ад лісцікаў, што прыліплі, і травінак, выкідаюць сапсаваныя. Прыгожыя, пругкія і льсняныя трапляюць у скрынкі для рэалізацыі або замарозкі.
Аляксандр Шаламіцкі працуе садоўнікам. На працягу года выконвае розны спектр работ. На сартаванні журавін ён аператар.
«Зімой у нас ідзе абрэзка буякоў, прыбіраем лішнія галінкі. Увесну займаемся пасадкамі. Потым пачынаецца ўборка парэчак камбайнам, у буякоў — ручны збор. Следам ідзе ўборка айвы, і тут жа пачынаецца ўборка журавін. Пасля наводзім на плантацыях парадак, займаемся пасадкай. Узімку зноў абрэзка. І так па коле», — апісаў працэс вясковец.
Сезон пурпуровых водных дываноў працягнецца арыентацыйна да канца кастрычніка. За гэты час у «Парахонскім» маюць намер справіцца са зборам ураджаю журавін.
У гаспадарцы культывуюць і іншыя ягадныя культуры. Па кожнай з іх пралічваюць эканоміку.
«Сітуацыя падказвае нам крочыць у бок павелічэння плошчаў смародзіны. Мы адышлі ад ручной уборкі, набыўшы камбайн. У найбліжэйшай будучыні плануем пасадзіць 30 га смародзіны і абнавіць пасадкі высакарослых буякоў. Ужо ідзе падрыхтоўка глебы і палёў», — расказаў Аляксандр Савіла.
Паводле яго слоў, попыт на ягады немалы. Напрыклад, у буякоў для купца важны памер ягад і іх смак. Таму ў гаспадарцы нацэленыя працаваць з разнастайнасцю сартоў, вырошчваць ад ранніх да позніх, каб падоўжыць час збору ўраджаю. У смародзіне зацікаўленыя прамысловыя перапрацоўшчыкі, паколькі гэта натуральны фарбавальнік і араматызатар. Прадавалі яе сёлета і ў розніцу: разышліся як гарачыя піражкі.
У цэлым Брэсцкая вобласць зараз перажывае ягадны бум. Пад сады і ягаднікі ў рэгіёне адводзяць усё больш плошчаў. Гаспадаркі і фермеры займаюцца буякамі, малінамі, ажынамі, садовымі суніцамі (клубніцамі), журавінамі, парэчкамі, смародзінай, чарнаплоднай рабінай. Прыглядаюцца і да іншых культур. За гэтай багатай разнастайнасцю стаіць цяжкая праца, каб парадаваць купцоў апетытнымі і смачнымі ягадамі.
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»48
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары