Былы кіраўнік Google: Расія здаганяе Украіну ў вайсковых тэхналогіях, а рэсурсаў у яе нашмат больш. Галоўным выклікам будзе «Рассвет»

Шміт паразмаўляў у Кіеве з галоўнай рэдактаркай The Economist Зані Мінтан Бедас. Ён расказаў пра тэхналагічную гонку Расіі і Украіны, будучыню вайны з выкарыстаннем штучнага інтэлекту, праблемы заходніх армій і магчымую ролю ўкраінскіх тэхналогій у пераўзбраенні Еўропы.

Расія ўжо ўдасканальвае зброю з хуткасцю Украіны

Раней, паводле Шміта, лічылася, што Украіна хутка стварае новыя рашэнні, а Расія застаецца вялікай, але маруднай сістэмай. Цяпер сітуацыя змянілася.

«Расія ўдасканальваецца прыкладна з той жа хуткасцю, што і Украіна, але ў яе значна больш рэсурсаў», — заявіў ён.

Шміт назваў адразу некалькі пагроз, з якімі сутыкнулася Украіна:

• балістычныя ракеты, супраць якіх не хапае ракет для сістэм Patriot;
• рэактыўныя «Шахеды», якія лётаюць хутчэй і вышэй за ранейшыя мадэлі;
• магчымую новую мабілізацыю ў Расіі;
• расійскую спадарожнікавую сістэму «Рассвет», падобную да Starlink;
• удасканаленыя планерныя авіябомбы з індывідуальным навядзеннем.

На думку Шміта, з кожнай з гэтых пагрозаў паасобку Украіна магла б справіцца. Але адначасова супрацьстаяць усім ім без істотнай дапамогі Захаду будзе амаль немагчыма.

Шміт мяркуе, што адной мужнасці і тэхналагічнай вынаходлівасці Украіне недастаткова. Галоўная праблема — немагчымасць хутка наладзіць масавую вытворчасць неабходнай зброі.

«Украіне патрэбныя грошы. Літаральна грошы. Па-другое, ёй патрэбная дапамога ў нарошчванні магчымасцяў. Ва ўкраінцаў ёсць мужнасць, каб перамагчы або працягваць барацьбу, але самастойна дасягнуць неабходных маштабаў яны не могуць», — сказаў ён.

На думку Шміта, Захаду не трэба пасылаць ва Украіну сваіх вайскоўцаў. Дастаткова даць ёй фінансаванне, тэхналогіі і магчымасць павялічыць выпуск узбраенняў.

Больш за палову «Шахедаў» ужо могуць быць рэактыўнымі

Шміт прызнаў, што не чакаў настолькі хуткага пераходу Расіі да рэактыўных беспілотнікаў. Спачатку меркавалася, што новыя рухавікі атрымаюць каля 10% «Шахедаў», аднак цяпер, паводле яго, імі абсталявана больш за палову такіх дронаў.

Да таго ж Расія стварыла з кітайскіх кампанентаў уласную сетку сувязі паміж беспілотнікамі. Некаторыя дроны могуць кружыць паміж Беларуссю і Кіевам, выконваючы ролю рэтранслятараў і перадаючы расіянам відэа цэлі ў высокай якасці.

«Ёсць паведамленні пра планы выкарыстаць да 80 000 такіх рэактыўных «Шахедаў» супраць Кіева і іншых гарадоў да канца снежня. Гэта сур'ёзная праблема. Урад тут надае ёй велізарную ўвагу. Я ведаю пра некалькі распрацовак, якія, імаверна, спрацуюць», — кажа ён. 

Паводле Шміта, не менш за пяць украінскіх кампаній ужо распрацавалі сродкі супрацьдзеяння рэактыўным «Шахедам», якія цяпер выпрабоўваюцца. 

Расійскі аналаг Starlink можа з’явіцца праз год

Шміт мяркуе, што для запуску паўнавартаснай расійскай спадарожнікавай сістэмы «Рассвет» спатрэбіцца яшчэ каля года. Калі яна запрацуе, перашкодзіць яе выкарыстанню будзе вельмі складана.

Такая сетка дазволіла б Расіі атрымліваць сувязь і наводзіць зброю практычна ў любой частцы Украіны.

Адначасова Украіна не можа карыстацца Starlink для навядзення зброі па цэлях на тэрыторыі Расіі. Паводле Шміта, тэхнічнай перашкоды для гэтага няма — гаворка ідзе пра палітыку SpaceX і рашэнне амерыканскіх уладаў.

Сам Шміт выступае за тое, каб даць Украіне такую магчымасць.

Машыннае зрокавае навядзенне — гэта яшчэ не штучны інтэлект

Шміт звярнуў увагу, што тэхналогіі, якія цяпер часта называюць вайсковым штучным інтэлектам, у большасці выпадкаў з’яўляюцца сістэмамі машыннага зроку.

Яны дапамагаюць зброі распазнаць цэль і дакладна трапіць у яе на апошнім этапе палёту. Але такая сістэма не вучыцца самастойна і таму не з’яўляецца паўнавартасным штучным інтэлектам.

Сапраўдны ШІ, паводле Шміта, у будучыні зможа аналізаваць адкрытыя, сакрэтныя і разведвальныя звесткі, прапаноўваць генералам варыянты размяшчэння сіл, знаходзіць прычыны няўдач і прадказваць праблемы.

Пакуль такія тэхналогіі толькі пачынаюць выкарыстоўваць на вайне.

Шміт лічыць небяспечнай поўную перадачу ваенных рашэнняў штучнаму інтэлекту. Ён прывёў прыклад сістэмы, якой дыктатар мог бы проста загадаць напасці на іншую краіну і паведаміць яму пра заканчэнне вайны.

«Уявіце, што я злы дыктатар з ідэальнай сістэмай ШІ. Я кажу: «Нападзі на гэтую краіну. Паведамі, калі скончыш». Гэта ўвесь мой загад. Сістэма магла б рабіць усё, што палічыла б дарэчным. Яна магла б у тым ліку здзяйсняць масавыя ваенныя злачынствы. Яна магла б знішчаць мірных жыхароў і інфраструктуру або атакаваць краіну, якая не ўдзельнічае ў канфлікце, каб дапячы першай. Яна магла б прыдумаць самыя розныя недарэчныя абгрунтаванні», — кажа ён.

«Чалавек павінен удзельнічаць у прыняцці кожнага ваеннага рашэння», — падкрэсліў Шміт.

Заходнія войскі разумеюць перамены, але не хочуць мяняцца

Шміт восем гадоў працаваў дарадцам амерыканскіх узброеных сіл. Паводле яго, многія ў Пентагоне разумеюць, як змянілася вайна, але вайсковая сістэма надзвычай павольна прымае новыя рашэнні.

На яе ўплываюць Кангрэс, лабісты і прадпрыемствы, якія залежаць ад старых і дарагіх абаронных праграм. Камандзіры таксама не хочуць рызыкаваць жыццём вайскоўцаў дзеля яшчэ не правераных тэхналогій.

Падобная праблема існуе і ў Еўропе. Еўрапейскія войскі працягваюць укладваць грошы ў традыцыйныя сістэмы, хоць ім нестае ракет-перахопнікаў, а сучасная вайна патрабуе таннейшых дронаў, аўтаматычнага навядзення і новых сродкаў супрацьпаветранай абароны.

«У еўрапейцаў, з якімі я размаўляю, тая ж праблема, што і ў амерыканцаў. Яны вельмі разумныя і ўсё разумеюць, але сістэма не створаная так, каб мяняцца.

У большасці еўрапейскіх краін узброеныя сілы працуюць як праграмы забеспячэння занятасці. Гэтыя працоўныя месцы важныя, я не адмахваюся ад іх. Але вайскоўцы ствараюць не тое, што патрэбна.

Захавайце свой бюджэт або нават павялічце яго. Проста стварайце больш эфектыўныя сістэмы, таму што яны вам спатрэбяцца. У Еўропы велізарная праблема з супрацьракетнай абаронай. Па розных прычынах ракет Patriot, на якія яна разлічвае, няма ў дастатковай колькасці. Калі паглядзець на заходнія запасы ракет, іх у нас недастаткова», — кажа ён.

Вайна ва Украіне дае Захаду досвед, якога няма ў Кітая

На думку Шміта, Кітай валодае вялікімі вытворчымі магчымасцямі, але не ўдзельнічаў у буйной вайне каля 50 гадоў. Таму кітайскае войска можа не мець тактычнага досведу, які Украіна атрымлівае штодня.

Ён мяркуе, што магчымы канфлікт вакол Тайваня ў значнай ступені стаў бы вайной дронаў і беспілотных караблёў, а не традыцыйных флатоў з вялікімі караблямі і авіяносцамі.

Пры гэтым Шміт не чакае, што ЗША або Кітай пагодзяцца прыпыніць развіццё штучнага інтэлекту. Такую дамоўленасць было б амаль немагчыма праверыць.

• 1
• 0
• 0
• 0
• 2
• 2
• 0
• 0