Пад Слуцкам падчас нелегальных гонак жонка накіравала Range Rover у Subaru мужа. Цяжка пацярпелі чацвёра
У Слуцкім раёне завяршылі расследаванне крымінальнай справы аб парушэнні правіл дарожнага руху і эксплуатацыі транспартных сродкаў, у выніку якога пацярпелі чатыры чалавекі. Яны атрымалі цяжкія і менш цяжкія цялесныя пашкоджанні, паведамляе Следчы камітэт.
Несанкцыянаваныя вулічныя гонкі адбыліся ўвечары 26 ліпеня 2025 года каля вёскі Вялікі Быкоў Слуцкага раёна. Падчас фінальнага заезду 32‑гадовая мясцовая жыхарка за рулём пазадарожніка Range Rover вырашыла паспаборнічаць у хуткасці са сваім мужам, які кіраваў Subaru Impreza.
Пасля фінішу аўтамабілі развярнуліся, каб вярнуцца да месца старту. Кіроўца Subaru паступова зніжаў хуткасць, а Range Rover працягваў рухацца з хуткасцю не менш за 100 км/г пры дазволеных 90 км/г. Па матэрыялах следства, жанчына бачыла наперадзе людзей і аўтамабілі, але не стала спыняцца.
На вялікай хуткасці пазадарожнік сутыкнуўся з аўтамабілем мужа, пасля чаго выехаў на правую абочыну. Там ён збіў траіх пешаходаў, а затым урэзаўся ў прыпаркаваны Volkswagen Golf. Ад удару легкавы аўтамабіль адкінула ў кювет. У яго салоне знаходзілася пасажырка.
Сярод пацярпелых пешаходаў была сямейная пара. З-за затору яны спыніліся каля дарогі і пайшлі ўздоўж узбочыны, каб высветліць прычыну. Пераканаўшыся, што наперадзе няма аварыі, муж і жонка вярталіся да свайго аўтамабіля. У момант наезду яны стаялі спінай да пазадарожніка, які набліжаўся.
Падчас расследавання высветлілася, што тармазная сістэма Range Rover мела тэхнічную няспраўнасць: металічны трубаправод задняга левага кола праржавеў. Аднак судовая аўтатэхнічная экспертыза паказала, што нават пры гэтай няспраўнасці кіроўца мела тэхнічную магчымасць своечасова спыніць аўтамабіль і пазбегнуць сутыкнення, калі б трымалася дазволенай хуткасці і своечасова націснула на педаль тормазу. Subaru Impreza, паводле высноў экспертаў, знаходзіўся ў спраўным стане.
Судова-медыцынскія даследаванні вызначылі ступень цяжкасці траўмаў. 18‑гадовая жыхарка Салігорска атрымала цяжкія цялесныя пашкоджанні. Сямейная пара атрымала менш цяжкія пашкоджанні, якія прывялі да працяглага разладу здароўя. Пашкоджанні пасажыркі Volkswagen Golf прызналі цяжкімі па прыкмеце невыводнага знявечання твару.
Сама абвінавачаная падчас следства сцвярджала, што ў момант руху педаль тормазу «правалілася». Паводле яе версіі, таму яна нібыта наўмысна накіравала пазадарожнік на аўтамабіль мужа, спрабуючы спыніць некіраваны аўтамабіль.
Пры вывучэнні асобы жанчыны высветлілася, што на момант аварыі яна не мела судзімасцяў, але раней неаднаразова прыцягвалася да адміністрацыйнай адказнасці за парушэнні Правіл дарожнага руху.
Дзеянні 32‑гадовай жыхаркі Слуцкага раёна кваліфікаваныя паводле часткі 2 артыкула 317 Крымінальнага кодэкса — парушэнне правіл дарожнага руху і эксплуатацыі транспартных сродкаў асобай, якая кіруе транспартным сродкам, што па неасцярожнасці пацягнула прычыненне цяжкага і менш цяжкага цялеснага пашкоджання.
Крымінальная справа перададзеная пракурору для накіравання ў суд.
Памятаеце вар’яцкую гонку ў Брэсце, падчас якой загінула трое? На ВІДЭА з экшн-камеры матацыкліста відаць, што ён разагнаўся да 186 км/г
У Вілейскім раёне 84‑гадовы кіроўца збіў веласіпедыстку і з'ехаў з месца аварыі
За 146 парушэнняў і два ДТЗ — тры месяцы без правоў. У Мінску са скрыпам пакаралі кіроўцу Bentley
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек1
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2323
Каментары