«Moj zarobak u Polščy vyras u dziesiać razoŭ» — hiniekołah Hanna Kasko

Hiniekołah Hanna Kasko pierajechała ŭ Polšču čatyry hady tamu. Ciapier jana adna z samych viadomych śpiecyjalistaŭ Varšavy. 

Pa słovach Hanny, u Biełarusi jaje zarobak byŭ pa biełaruskich mierkach vysoki. Ale dla taho, kab stolki zarabić joj davodziłasia pracavać amal kruhłyja sutki.

«Ja pracavała ŭ raddomie da čatyroch, z čatyroch da vaśmi — u pryvatnym centry. I jašče była ŭrhientnaj. Heta značyć ciabie mohuć nočču vyklikać na UHD», — zhadvaje Kasko ŭ intervju jutub-kanału Aksany Darachovič «Pośpiech mihranta».

Ź pierajezdam u Varšavu paśla nastryfikacyi dypłomu doktara zaprasili pracavać u pryvatnuju kliniku. Ź ciaham času ŭ jaje źjaviłasia jašče adno miesca pracy. U vyniku žančyna praciahvaje pracavać amal u tym ža rytmie, što i ŭ Biełarusi. Adnak pry hetym jaje zarobak pavialičyŭsia ŭ dziesiać razoŭ.

Pa słovach Hanny, z hrošaj, jakija ludzi addajuć za pryjom u pryvatnaj klinicy, doktar atrymlivaje ad 40% da 60%.

Pry hetym žančyna žyvie ścipła i imkniecca adkładvać 80% zarobku.

«Adkładvaju jak ja svaje hrošy, tak i muž svaje. Potym my možam razam niešta tam kupić ci pabudavać. Ja jamu furu adzin raz kupiła. Jon na toj momant pieravozkami zajmaŭsia. Heta było jašče ŭ Biełarusi», — dzielicca ŭspaminami žančyna.

U čas razmovy Hanna zhadała niekalki nieardynarnych vypadkaŭ. Adzin ź ich adbyŭsia zusim niadaŭna:

«Učora pryjšła na pryjom žančyna. Jana naradžała ŭ mianie hod tamu. I piša mnie, što test stanoŭčy. Ja pytajusia, ci kormić hrudziami. Adkazvaje, što tak. Ja kažu, kab prychodziła. A tam 26 tydniaŭ ciažarnaści. Jana dumała, što kišečnik, a heta varušeńni [płoda]».

Adnojčy, pa słovach Hanny, na pryjom da jaje pryjšła dziaŭčyna, jakaja zabyłasia dastać tampon. I jon prabyŭ u pochvie dva miesiacy.

Daktorka adznačaje, što joj vielmi cikava nazirać za baćkami, jakija prysutničajuć na rodach.

«Pa-pieršaje, jak mužčyna niervujecca. Heta vielmi cikava nazirać. I jak jany potym uvohule hublajucca, kali tvajo dzicia [naradžajecca]. Jany nie vierać u heta ŭsio. Pierasiakajuć pupavinu, ruki dryžać».

Jak śćviardžaje Hanna, u jaje praktycy byli vielmi redkija vypadki, kali mužčyna stračvaŭ prytomnaść padčas prysutnaści pry rodach.

«Kali stračvaje prytomnaść, my adrazu havorym: «Niama času zajmacca vami. Kali vam drenna, kładziciesia adrazu na padłohu». A potym užo aniestezijołah, kali što, dapamahaje».

Jak śćviardžaje Hanna, u Polščy partniorskija rody — zvyčajnaja źjava:

«U Polščy, kali žančyna naradžaje biez muža, heta ŭvohule niešta. Čamu? Čamu jana naradžaje biez muža? Moža, niama. Jany pryvučanyja, što muž zaŭsiody. Udvaich zrabili — udvaich naradžajuć».

Hanna — dačka palitviaźnia Ireny Biernackaj ź Lidy. U 2020-m Hanna dałučyłasia da zabastoŭki pratestu suprać falsifikacyi vybaraŭ i represij.

• 42
• 1
• 1
• 1
• 2
• 2
• 0
• 3