Rasijskaja złačynnaja sietka atrymała amal miljard dalaraŭ ad dziaržaŭnaj prahramy miedstrachavańnia ZŠA. Rohi i kapyty XXI stahodździa

Pavodle śledstva, schiema pačała dziejničać u 2022 hodzie. Złačynnaja arhanizacyja, jakaja bazavałasia ŭ Rasii, nabyła bolš za 30 kampanij pa prodažy miedycynskaha abstalavańnia ŭ roznych štatach ZŠA — ad Kalifornii i Techasa da Ilinojsa. Usie jany ŭžo byli zarehistravanyja ŭ dziaržaŭnaj prahramie miedycynskaha strachavańnia Medicare i mieli prava atrymlivać dziaržaŭnyja vypłaty.

Dla realizacyi płana arhanizacyja vierbavała maładych ludziej, pieravažna z Rasii i Estonii. Ich adpraŭlali ŭ ZŠA, dzie jany aficyjna stanavilisia ŭładalnikami kampanij, choć faktyčna tolki vykonvali ŭkazańni arhanizataraŭ, piša New York Post.

Dalej kampanii pačali masava padavać u Medicare zajaŭki na kampiensacyju nibyta pastaŭlenaha miedycynskaha abstalavańnia — hałoŭnym čynam katetaraŭ dla advodu mačy. Dla hetaha vykarystoŭvalisia skradzienyja danyja kala 7000 daktaroŭ i bolš jak miljona atrymalnikaŭ Medicare.

Adnym z hałoŭnych vuzłoŭ schiemy, pavodle materyjałaŭ spravy, była kampanija G&I Ortho Supply u Bruklinie (Ńju-Jork). Śledstva śćviardžaje, što adtul adpraŭlalisia tysiačy fiktyŭnych rachunkaŭ ad imia pacyjentaŭ z usich kutkoŭ ZŠA. U Ńju-Jorku hrupoŭka vykarystoŭvała dva adrasy, ale druhi pakul nie raskryvajecca.

Pavodle prakuratury, za čas isnavańnia schiemy jaje ŭdzielniki padali dziaržavie fiktyŭnyja patrabavańni ab kampiensacyi na 10,6 miljarda dalaraŭ. Z hetaj sumy było vypłačana 941 miljon dalaraŭ. Pavodle viersii śledstva, atrymanyja srodki paśla admyvalisia praz Kitaj, Izrail, Pakistan, Sinhapur i Turcyju.

Pavialičyć

Pra maštab machlarstva śviedčyć chacia b adzin fakt: tolki adna sa źviazanych sa schiemaj kampanij u 2023 hodzie zapatrabavała bolš za 250 miljonaŭ dalaraŭ kampiensacyi za pastaŭku katetaraŭ dla advodu mačy. Heta na 50 miljonaŭ dalaraŭ bolš, čym dziaržaŭnaja prahrama vydatkavała na katetary ŭsich astatnich pastaŭščykoŭ takoj pradukcyi ŭ ZŠA razam uziatych. Pryčym tolki siem padstaŭnych kampanij stali pryčynaj rostu dziaržaŭnych vypłat za katetery dla advodu mačy na 1,9 miljarda dalaraŭ u 2023 hodzie.

Nastupstvy afiery zakranuli nie tolki dziaržaŭny biudžet. Pavodle śledstva, byli skampramietavanyja danyja bolš jak miljona atrymalnikaŭ Medicare.

U krasaviku Centry Medicare i Medicaid paviedamili, što 1,3 miljona čałaviek atrymali novyja numary Medicare, bo ich raniejšyja identyfikatary mahli być vykarystanyja machlarami.

U vyniku było padadziena bolš za 400 tysiač skarhaŭ ad pacyjentaŭ i pastaŭščykoŭ miedycynskich pasłuh, jakija zaŭvažyli ŭ svaich dakumientach rachunki za tavary i pasłuhi, jakich nasamreč nie atrymlivali.

Rola naminalnych uładalnikaŭ

Chto mienavita kiravaŭ hetaj sietkaj, śledstva pakul nie raskryvaje. Adnak materyjały sudovych pracesaŭ nad dvuma naminalnymi ŭładalnikami kampanij dazvalajuć zrazumieć, jak pracavała hetaja machlarskaja schiema.

Adnym ź ich byŭ 26‑hadovy hramadzianin Estonii Alaksandr Lis. Pavodle advakata maładoha čałavieka, Lisa zavierbavali i adpravili ŭ Ńju-Jork, dzie jon dzieviać miesiacaŭ žyŭ u hateli na Tajms-skvier. Za hety čas jon staŭ naminalnym uładalnikam kampanii Konaniah Medical Supplies u Techasie i jašče adnoj kampanii ŭ Kientuki.

Były kurjer, jaki nie vałodaŭ anhlijskaj movaj, atrymlivaŭ instrukcyi praz tekstavyja paviedamleńni ŭ miesiendžary. Jon adkryvaŭ bankaŭskija rachunki, prosiačy paklikać ruskamoŭnaha supracoŭnika banka, imia jakoha jamu zahadzia paviedamili, afarmlaŭ dakumienty i atrymlivaŭ čeki Medicare. Za dzieviać miesiacaŭ pracy jamu zapłacili ŭsiaho 17 tysiač dalaraŭ.

Śledstva śćviardžaje, što praz rachunki Lisa prajšło bolš za 6 miljonaŭ dalaraŭ, atrymanych machlarskim šlacham. U 2025 hodzie małady čałaviek pryznaŭ siabie vinavatym u zmovie z metaj admyvańnia hrošaj. Sud prysudziŭ jamu 28 miesiacaŭ pazbaŭleńnia voli, ale jon užo vyjšaŭ na volu (z ulikam času ŭ SIZA) i byŭ departavany ŭ Estoniju. 

Advakaty nastojvali, što Lis byŭ tolki drobnym vykanaŭcam, jaki nie ŭśviedamlaŭ sapraŭdnych maštabaŭ schiemy. Adnak prafiesar kryminałohii Kaledža Džona Džeja i były supracoŭnik Interpała Siarhiej Čałuchin aceńvaje situacyju inakš.

«Niemahčyma prosta ŭziać čałavieka z vulicy ŭ Čačni abo Estonii i daručyć jamu takuju pracu. U ich isnuje zakrytaja sietka kantaktaŭ, dzie ludziej padbirajuć praz rekamiendacyi», — cytuje vydańnie ekśpierta.

U studzieni hetaha hoda fiederalny sud u Čykaha vystaviŭ abvinavačańni hramadzianinu Kazachstana Anuaru Abdrachmanavu.

Pavodle materyjałaŭ śledstva, u krasaviku 2024 hoda jon atrymaŭ kantrol nad kampanijaj Priority One Medical Equipment u Kientuki i vykarystaŭ jaje dla padačy fiktyŭnych patrabavańniaŭ prykładna na 666 miljonaŭ dalaraŭ za hlukomietry i katetary dla advodu mačy.

Prakurory śćviardžajuć, što ofis kampanii praktyčna nie vykarystoŭvaŭsia, adnak supracoŭnikam płacili pa 6000 dalaraŭ u miesiac tolki za toje, kab jany pierasyłali poštu i čeki pavodle ŭkazańniaŭ, atrymanych praz Telegram, a taksama adpraŭlali hrošy pa adrasach u vakolicach Čykaha.

Pavialičyć

Pavodle śledstva, častka srodkaŭ taksama była pieraviedzienaja na rachunki ŭ Hankonhu. Sprava jašče razhladajecca, svajoj viny Abdrachmanaŭ pakul nie pryznaŭ.

Jak piša New York Post, apublikavanaje ŭ kancy červienia pašyranaje abvinavačańnie źmiaščaje imiony jašče 12 čałaviek. Siarod ich — hramadzianie Rasii, Estonii, Čechii i adzin hramadzianin ZŠA Džejsan Anufryjenka. Usie jany znachodziacca ŭ vyšuku.

Im staviać u vinu zmovu, machlarstva z vykarystańniem elektronnych srodkaŭ suviazi, machlarstva ŭ śfiery achovy zdaroŭja i admyvańnie hrošaj.

Pavodle prakuroraŭ, paśla pačatku aryštaŭ arhanizatary zahadali ŭdzielnikam schiemy, jakija znachodzilisia ŭ ZŠA, uciakać praź miažu ź Mieksikaj.

Fiederalnaje abvinavačańnie pakul nie nazyvaje, jakaja mienavita rasijskaja transnacyjanalnaja złačynnaja arhanizacyja stajała za hetaj schiemaj. Arhanizataraŭ taksama nie nazyvajuć — viadoma tolki, što, pavodle śledstva, jany dziejničali za miežami ZŠA.

Apytanyja vydańniem ekśpierty miarkujuć, što pravieści apieracyju takoha maštabu biez padtrymki abo prynamsi maŭklivaj zhody rasijskich uładaŭ było b praktyčna niemahčyma.

• 0
• 0
• 2
• 4
• 4
• 0
• 13
• 0