Źviazany z arhzłačynnaściu. Padrabiaznaści pra padazravanaha ŭ zabojstvie rasijskaha mastaka ŭ Polščy

Jon paviedamiŭ, što padazravany — 36‑hadovy čałaviek, jaki karystajecca hruzinskim pašpartam.

Na pytańnie žurnalistki pra toje, ci moh mužčyna być čačencam, Kierviński padkreśliŭ, što mienavita tamu (heta značyć, pa pryčynie vyśviatleńnia asoby) vykarystoŭvajecca farmuloŭka pra toje, što padazravany karystajecca hruzinskimi dakumientami.

Jaho zatrymańnie jon nazvaŭ pośpiecham.

— Heta vynik ciažkaj pracy mnohich słužbaŭ. Była stvorana śpiecyjalnaja hrupa pry vajavodskim kamiendancie palicyi ŭ Lublinie, jakaja z momantu zabojstva, ź pieršych chvilin paśla prybyćcia słužbaŭ na miesca, pracavała nad tym, kab ustanavić asob, adkaznych za hetaje złačynstva, — skazaŭ Kierviński.

Zatrymanaha Kierviński nazvaŭ čałaviekam, źviazanym z arhanizavanaj złačynnaściu, jaki moh taksama ŭdzielničać u złačynstvach u 2022 hodzie, bo tady taksama znachodziŭsia na terytoryi Polščy.

Kiraŭnik MUS adznačyŭ, što viadziecca praca pa ŭstanaŭleńni zakazčykaŭ.

Ministr-kaardynatar śpiecsłužbaŭ Tomaš Siamoniak paviedamiŭ, što śledstva budzie praviarać viersiju mahčymaj suviazi z zabojstvam śpiecsłužbaŭ zamiežnych dziaržaŭ.

— Taki scenaryj mahčymy, pakolki zamiežnyja śpiecsłužby časam pryciahvajuć złačyncaŭ i kryminalnych elemientaŭ dla vykanańnia roznych zadač. U minułym my ŭžo sutykalisia z padobnymi vypadkami. Praŭda, havorka išła nie pra zabojstvy, a, naprykład, pra źbićcio, učynienaje na zamovu. Byvali vypadki, kali dla takich dziejańniaŭ u inšych krainach vykarystoŭvalisia polskija złačyncy. My vielmi surjozna razhladajem taki scenaryj, — zajaviŭ jon.

Było viadoma pra ryzyki, ale Skrapiecki admoviŭsia ad achovy

Tomaš Siamoniak paćvierdziŭ, što ŭ zatrymanaha vialikaje kryminalnaje «partfolia». I zajaviŭ, što polskija śpiecsłužby papiaredžvali Skrapieckaha pra ryzyki i prapanoŭvali jamu achovu.

— Adbyłasia trahiedyja. Byŭ zabity hramadzianin inšaj dziaržavy, jaki ŭ svajoj publičnaj dziejnaści krytykavaŭ roznych zamiežnych asob.

Ahienctva ŭnutranaj biaśpieki i palicyja nieadnarazova źviazvalisia ź im, pakazvajučy na isnavańnie pahrozy i prapanoŭvajučy jamu achovu na čas znachodžańnia ŭ Polščy. Na žal, jon nie skarystaŭsia hetaj prapanovaj, — padkreśliŭ Siamoniak.

Marcin Kierviński padčas pres-kanfierencyi zakranuŭ taksama pytańnie pra datyčnaść da złačynstva dvuch biełarusaŭ, zatrymanych paśla zabojstva.

— Spačatku byli zatrymanyja dvoje hramadzian Biełarusi. Hetyja asoby byli vyzvalenyja. Jany znachodzilisia na miescy zdareńnia, adnak pramoj suviazi z hetym zabojstvam nie majuć, — patłumačyŭ jon.

Što viadoma pra złačynstva i zabitaha

Siamion Skrapiecki (sapraŭdnaje imia — Robiert Kuzaŭkoŭ) byŭ zastreleny ranicaj 15 červienia niedaloka ad doma. Da rasijanina padyšoŭ mužčyna, jaki zrabiŭ u jaho bok try streły z karotkastvolnaj ahniastrelnaj zbroi. Kali paciarpieły ŭpaŭ na ziamlu, złačynca padyšoŭ bližej i zrabiŭ jašče dva streły.

U ciele achviary vyjaŭlena piać uvachodnych i dźvie vychodnyja adtuliny — u vierchniaj častcy hrudziny i hałavy. Złačynca stralaŭ sa zbroi 9‑milimietrovaha kalibru.

Pa spravie zatrymlivali dvuch hramadzian Biełarusi 33 i 37 hadoŭ. Zatrymańnie adbyvałasia kala biełaruskaha konsulstva, jakoje znachodzicca niedaloka ad miesca, dzie žyŭ Skrapiecki. 17 červienia prakuratura paviedamiła, što ich suviaź sa złačynstvam nie paćvierdziłasia.

Siamion Skrapiecki — antypucinski mastak-karykaturyst, bard, akcyjanist i błohier. U svaich pracach i pierformansach jon krytykavaŭ rasijskija ŭłady, u tym liku Uładzimira Pucina i kiraŭnika Čačni Ramzana Kadyrava. Niekatoryja ź jaho prac pryśviečany Alaksandra Łukašenku. Praz ryzyku palityčnaha pieraśledu ŭ 2021 hodzie mastak pierajechaŭ u Polšču.

• 2
• 0
• 0
• 0
• 0
• 4
• 0
• 0