Modny trend na nizkuju pasadku, svabodny kroj i ščylny vintažny denim viarnuŭ 173‑hadovamu brendu Levi’s status adnaho z zakanadaŭcaŭ stylu. Vykarystoŭvajučy chvalu nastalhii i źmianiŭšy padychod da prodažaŭ, vytvorca demanstruje najmacniejšyja finansavyja vyniki za apošni čas.
Kłasičny amierykanski vytvorca denimu, čyja historyja pačałasia jašče ŭ 1853 hodzie, znoŭ fiksuje ŭstojlivy rost paśla praciahłaha pieryjadu niaŭdač. Raniej spažyŭcy maksimalna pieraklučylisia na ełastyčnyja vuzkija džynsy ad maładych brendaŭ-kankurentaŭ, što pryviało da abvału prodažaŭ Levi Strauss. Adnak siońnia situacyja kardynalna źmianiłasia.
Jak piša The Wall Street Journal, u pieršaj pałovie hetaha finansavaha hoda vyručka kampanii vyrasła bolš čym na 11% i dasiahnuła 3,3 miljarda dalaraŭ. Heta dazvoliła kiraŭnictvu dvojčy pavysić hadavy prahnoz: čakajecca, što pryrost prodažaŭ składzie da 7,5%. Takija ličby robiać hety pieryjad samym paśpiachovym dla kampanii z momantu jaje viartańnia na fondavuju biržu ŭ 2019 hodzie.
Archiŭnyja fasony znoŭ na piku papularnaści
Hałoŭnym šturškom dla rostu stała masavaja cikavaść da estetyki 1990‑ch hadoŭ. U tuju epochu pramyja džynsy 501‑j madeli byli bazavym elemientam harderoba dla ŭsich — ad pryncesy Dyjany i supiermadeli Kiejt Mos da Styva Džobsa i hierojaŭ kultavaha sieryjała «Siabry» (Friends).
Džynsy časta naŭmysna vybirali na pamier bolšyja, kab jany siadzieli nižej i svabodniej. Žančyny pry hetym achvotna nasili i mužčynskija madeli, naprykład, Levi's 517. Ciapier ludzi znoŭ palujuć na aŭtentyčny ščylny denim biez damieškaŭ i svabodnyja siłuety.
Vialikuju rolu adyhryvaje i sučasnaja pop-kultura. Naprykład, paśla vychadu sieryjała «Historyja kachańnia» (Love Story), pryśviečanaha ramanu Džona Kienedzi-małodšaha i Keralin Bieset, na sajcie brenda rezka pavialičyłasia kolkaść pošukavych zapytaŭ na madel Levi's 517, jakuju hierainia nasiła ŭ tyja hady.
Kampanija svoječasova adreahavała na popyt, pieravydaŭšy svaje archiŭnyja fasony i adaptavaŭšy vintažnyja lekały ź nizkaj pasadkaj śpiecyjalna pad žanočuju aŭdytoryju.
Ad džynsaŭ da poŭnaha harderoba
Levi's vykarystoŭvaje viartańnie 1990‑ch dla bolš šyrokaj pierabudovy biznesu. Kampanija imkniecca mienš zaležać ad adnoj katehoryi tavaraŭ i tamu pradaje nie tolki džynsy. U asartymiencie stała bolš inšych rečaŭ u styli 1990‑ch — karotkich futbołak, sukienak-kambinacyj i skuranych kurtak.
Akramia hetaha, kampanija praviała surjoznuju rearhanizacyju svajho handlu. Kali raniej brend mocna zaležaŭ ad starońnich univiermahaŭ i aptovych sietak, to ciapier robić staŭku na pramyja prodažy praz ułasny sajt i raźvićcio sietki firmovych kram. Taki padychod dazvalaje lepš reahavać na zapyty ludziej i prapanoŭvać im paŭnavartasnyja vobrazy.
Niahledziačy na vidavočny pośpiech, vytvorca sutykajecca z šeraham ekanamičnych pieraškod. Čysty prybytak raście nie tak chutka, jak ahulnaja vyručka, praz vysokija markietynhavyja vydatki, mytnyja taryfy i restrukturyzacyju sistemy łahistyki.
Akramia taho, analityki bačać ryzyku ŭ maštabnym adkryćci novych fizičnych kram. Utrymańnie vialikich handlovych płoščaŭ patrabuje značnych resursaŭ, i va ŭmovach inflacyi dy ekanomii spažyŭcoŭ na paŭsiadzionnych pakupkach vysokaja zaležnaść ad afłajn-roźnicy moža stvaryć dadatkovy finansavy cisk na biznes.
Pakul ža Levi's atrymaŭ redkuju dla staroha brenda pieravahu: rečy, ź jakimi brend asacyjavaŭsia try dziesiacihodździ tamu, znoŭ apynulisia ŭ modzie.
Kamientary
U mianie niama nijakaj nastalhii, što da Levi's. Źviarnicie ŭvahu na džynsy Pierre Cardin, asabliva Modern/Regular Fit., klasyčny eŭrapiejski kroj, cudoŭny matar'jal, univiersalnyja ŭ karystanni. Niekamu budzie padabacca Future Flex, samy chadavy.