Zasnavalnik Z-kanała «Rybar» Michaił Źvinčuk viarnuŭsia ŭ Rasiju paśla zatrymańnia ŭ Čarnahoryi
Michaił Źvinčuk, jaho žonka Valeryja i troje kaleh u noč na 11 kastryčnika prylacieli ŭ Maskvu ź Biełhrada. Čarnahorskija ŭłady pryznali ich pahrozaj nacyjanalnaj biaśpiecy i zahadali pakinuć krainu.
Pra viartańnie Źvinčuk raskazaŭ žurnalistam u maskoŭskim aeraporcie. Pavodle jaho, vyzvaleńniu hrupy spryjali rasijskija dypłamaty i dziaržaŭnyja struktury. Adnak kanfiskavanuju techniku im nie viarnuli. Pytańniem jaje viartańnia zajmajecca rasijskaja ambasada.
Źvinčuka i jaho spadarožnikaŭ zatrymali ranicaj 9 kastryčnika ŭ čarnahorskim horadzie Rysan. Apieracyju praviała palicyja razam z Ahienctvam nacyjanalnaj biaśpieki. U hrupy zabrali telefony, kamiery, dron i inšuju ličbavuju techniku. Paźniej usich piaciarych adpuścili, pradpisaŭšy im vyjechać z krainy.
Pavodle čarnahorskich vydańniaŭ, apieracyja była nakiravanaja na spynieńnie hibrydnaj dziejnaści sietki kanałaŭ, jakuju źviazvajuć z rasijskaj vajskovaj raźviedkaj.
Kamanda «Rybara» svajho znachodžańnia ŭ krainie nie chavała: spyniłasia ŭ piacizorkavym hateli i zahadzia padała zajaŭku na zdymki ŭ Cecinskim manastyry.
Na Bałkany Źvinčuk trapiŭ praz Hiermaniju. 2 kastryčnika jon prylacieŭ ź Mieminhiena ŭ Sarajeva, choć z 2023 hoda znachodzicca pad sankcyjami Jeŭrasajuza.
Paśla piaci dzion u Bośnii i Hiercahavinie jon vyjechaŭ u Čarnahoryju.
Źvinčuk — były supracoŭnik pres-słužby Ministerstva abarony Rasii. Jaho telehram-kanał «Rybar», jaki padtrymlivaje vajnu suprać Ukrainy, maje bolš za paŭtara miljona padpisčykaŭ.
Kamientary