Juškievič viarnuŭsia ŭ sacsietki: Prosta ašałomleny ŭzroŭniem padtrymki i salidarnaści. I pažartavaŭ pra niazručnaść ź dziaŭčatami

«Miesiac tamu paśla 5,5 hadoŭ źniavoleńnia mnie skazali «Źbiraj rečy» i zabrali žoŭtuju birku. Dostupaŭ da starych sacsietak u mianie pakul niama, i naŭrad ci ja chaču ich atrymlivać zaraz. Prabačcie, kali nie mahu kamuści adkazać.

Nijakich intervju pakul taksama nie budzie — dziŭna zadavać niebiaśpiečnyja pytańni čałavieku, jaki nie ŭmieje ŭklučać čajnik i nikoli nie bačyŭ ChatGPT.

Vychodzić z turmy, dy jašče i ŭ inšaj krainie, — heta taki ž mocny stres, jak i traplać u turmu. Adzin z najbolš mocnych u maim žyćci. Treba šmat času, kab jaho pieražyć. Zaraz maja źniešnaść — jak u chakieista (i havorka nie pra ciahlicy), a psichika — jak u sałdata paśla akopnych bajoŭ. Spadziajusia, heta možna papravić.

Dla mianie pa adčuvańniach prajšło tolki paŭhoda, a dla vas tut — miljard žyćciaŭ i padziej. Tolki zaraz ja zrazumieŭ, što tut, na svabodzie, u tym liku ŭ emihracyi, ludziam ź siemjami, pracami, strachami i dziećmi było ŭ čymści našmat ciažej, čym ludziam u turmie.

U turmie jość tolki čornaje, šeraje i biełaje — tolki try kolery, i amal niama čaho bolš hublać. I, napeŭna, mnie prosta pašancavała, što ŭ mianie niama žonki/dziaciej. Pašancavała, što ad mianie nichto nie zaležyć.

Tamu chaču skazać dziakuj usim tym, chto dapamahaŭ i nie pakinuŭ, niahledziačy na svaje žyćciovyja składanaści. Vyjšaŭšy, ja pačaŭ razumieć, jak niaprosta heta było. Kožny raz prabivaje da śloz, kali daviedvajusia pra listy, učynki, dapamohu, — i heta z ulikam taho, što z 2023 hoda pra mianie (śpiecyjalna) ni słova ŭ ŚMI.

Tut ja byŭ pryjemna ździŭleny (dy i prosta ašałomleny) ad uzroŭniu pieršasnaj dapamohi i ad jaje kampietentnaści (pryvitańnie, Vieranika). Ludzi ŭ turmach u siarednim navat nie ŭjaŭlajuć, što takaja dapamoha isnuje.

Kali łaska, nie pytajciesia ŭ ludziej, jakija bolš za 5 hadoŭ praviali ŭ turmie, čym im dapamahčy. Pa-pieršaje, jany nie viedajuć adkazu, a pa-druhoje, jany nie buduć sami ničoha prasić. Jany žyli pavodle pryncypu «nie vier, nie bojsia, nie prasi» zanadta doŭha, kab za adzin tydzień źmianicca.

Apošnija 4,5 hoda ŭ mianie nie było volnaha času: ja vioŭ svaju «Džyru» na papiery, dastavaŭ amal z-pad ziamli niejkija knihi, trekaŭ čas u zadačy, časam pisaŭ kod u sšytku. Staraŭsia źmianiać źniešniaje asiarodździe turmy pad siabie, a nie prahinacca pad jaho (hraŭ u nardy roŭna 0 razoŭ — dla tych, chto zrazumieje), staraŭsia zachavać jak maha bolš intelektu i zdaroŭja. Nie viedaju, ci atrymałasia. Tady mnie było 31, a potym bac — i ŭžo 37. Zaraz unutry aściarožny aptymizm, žadańnie vučycca i iści napierad.

Dziakuj usim, chto dapamoh mnie apynucca tut. Dziakuj usim maim «padzielnikam» (akramia adnaho). Vam nie było soramna za mianie ŭ minułym, spadziajusia, nie budzie soramna i ŭ budučyni. Dziakuj usim biełarusam» — napisaŭ Juškievič.

A naprykancy svajho surjoznaha dopisu pažartavaŭ:

«Ź niazručnaha praz 5 hadoŭ — va ŭsich znajomych dziaŭčat treba pytacca novaje proźvišča. Pra takija składanaści nichto nie papiaredžvaŭ».

Jaŭhien Juškievič — były śledčy. Jon naradziŭsia 21 lipienia 1989 hoda ŭ Mahilovie. Skončyŭ jurydyčny fakultet Biełaruskaha dziaržaŭnaha ŭniviersiteta, pracavaŭ niaštatnym supracoŭnikam śledstva Minskaj prakuratury, a zatym kala piaci hadoŭ słužyŭ śledčym i staršym śledčym u staličnym upraŭleńni Śledčaha kamiteta. U 2017 hodzie zvolniŭsia i pierajšoŭ u IT-śfieru, staŭšy raspracoŭščykam prahram dla Android.

Paśla zvalnieńnia ź siłavych struktur Juškievič zajmaŭsia hramadskaj dziejnaściu. U 2020 hodzie jon staŭ adnym ź inicyjataraŭ płatformy bychange.me, jakaja dapamahała byłym supracoŭnikam siłavych struktur i dziaržaŭnym słužačym pierakvalifikavacca i znajści novuju pracu. Jon taksama kansultavaŭ siłavikoŭ, jakija chacieli zvolnicca, bo nie žadali vykonvać zahady, što supiarečyli ich pierakanańniam.

24 listapada 2020 hoda Juškieviča zatrymali ŭ Minsku pa spravie ab dziejańniach, jakija hruba parušajuć hramadski paradak. Paśla vobšuku jaho źmiaścili pad vartu, ale 4 śniežnia vyzvalili pad padpisku ab niavyjeździe. 19 krasavika 2021 hoda jaho zatrymali paŭtorna i vystavili novyja abvinavačańni, u tym liku ŭ arhanizacyi masavych biesparadkaŭ. Minski haradski sud 26 śniežnia 2022 hoda prysudziŭ Juškieviču 11 hadoŭ pazbaŭleńnia voli ŭ kałonii ŭzmocnienaha režymu. U sakaviku 2023 hoda Viarchoŭny sud pakinuŭ prysud bieź źmienaŭ.

16 vieraśnia 2026 hoda Jaŭhien Juškievič byŭ vyzvaleny ŭ vyniku pamiłavańnia paśla pieramovaŭ pamiž biełaruskimi ŭładami i śpiecyjalnym pasłańnikam prezidenta ZŠA Džonam Koŭłam.

• 31
• 1
• 2
• 2
• 0
• 3
• 0
• 6