Palčys pra list Kaleśnikavaj i Zołatavaj: «Za ŭsio dobraje, suprać usiaho drennaha», ale ŭ realnaści heta pakinie 9 miljonaŭ u łakalnym KNDR

Na dniach ad BIEŁPOŁa prajšła infarmacyja pra toje, što niejkaja hrupa padpisantaŭ źvierniecca da Jeŭraźviazu. Ja padumaŭ pra tak zvanych adbielnikaŭ, ale, pakul pisaŭ hety tekst, vyjšaŭ tekst ad asobnaj častki niekatorych palitviaźniaŭ.

Ni mnie, ni maim znajomym nie prapanoŭvali padpisać, ale ničoha. Razumieju, čamu niekatoryja rečy niechta robić tajemna.

Tekst davoli niejtralny i pazityŭny, u styli: «Za ŭsio dobraje, suprać usiaho drennaha» (praŭda, biez anijakaj kankretyki). I padpisałasia šmat dobrych ludziej.

Ale čamuści intuicyja mnie padkazvaje, što hety «adkryty list» budzie vykarystoŭvacca ŭ kułuarnych razmovach ź jeŭrapiejskimi dypłamatami zusim inšymi asobami.

I voś užo da hetych asob (a nie da padpisantaŭ lista) u mianie kankretnyja pytańni. Bo va ŭsioj hetaj temie niama adnabakova pravilnaha padychodu.

1) Našy chłopcy i dziaŭčaty žyvuć u piekle. Łamajucca ich zdaroŭje, psichika, siemji, spravy, biznesy — całkam usio žyćcio. Asabliva kali terminy vialikija.

Tamu misija Koŭła źjaŭlajecca nievierahodna kaštoŭnaj. My pavinny vyzvalić absalutna ŭsich, rana ci pozna.

Ale ja trochi nie razumieju niejkaj ci to naiŭnaści, ci to jašče čaho z łahiera tych, jakija pastajanna špurlajuć u infaprastoru tajemnyja tezy: «Načniom potichońku śnimať sankcii i siadiem za stoł pieriehovorov…», «Načniom potichońku śnimať sankcii i vsiech vypustiat…», «Načniom potichońku śnimať sankcii i vsiech viernut domoj…»

Vy ž bačyli, jak Łukašenka ŭ apošni raz padmanuŭ Džona Koŭła nakont vypusku 200 našych źniavolenych u apošni momant. Ludzi ŭžo sabrali rečy, ich čakali rodnyja kala varot, ale ŭ apošni momant usio admianili.

Ja nie viedaju, jakija eha ci tupaść pavinny być u hałavie tych ludziej, jakija sapraŭdy dumajuć, što voś z vami niechta prosta tak siadzie pra niešta razmaŭlać. Tym bolš kali ŭ vas nie budzie nijakaha surjoznaha ryčaha cisku, dyk vy jašče i majecie absalutna travajednuju pazicyju.

2) Kali vy dumajecie, što padčas źniaćcia sankcyj jeŭrapiejcy ci amierykancy pasadziać vas za stoł, — heta jašče bolš śmiešna. U epochu vojnaŭ, pieradziełu śvietu, hieapalityčnych štarmoŭ, kaniešnie ž, ludzi, jakija zajmajuć słabyja pazicyi, akazvajucca napieradzie pracesaŭ, aha.

Paviercie, adna dziaržaŭnaja biurakratyja budzie pieramaŭlacca ź inšaj, a nie ź ludźmi, jakija nie zaŭždy mohuć biez prablem atrymać dakumienty pa lehalizacyi.

3) Inšy momant — jak nam vyzvalić usich? Absalutna ŭsich? I Aŭtuchoviča ź jaho ludźmi, i «rejkavych partyzan», i ŭsich astatnich ź vialikimi terminami?

Jak nam daviedacca pra ŭsich? Bo sistema stała nastolki nieprazrystaj, što my možam nie bačyć novych palityčnych viaźniaŭ. Voś u hetym hodzie admysłova navat usie čaty kałonij i turmaŭ pryznali ekstremisckimi, kab ludzi nie siadzieli i nie abmieńvalisia infoj.

4) Jak nam spynić novyja pasadki? Mašyna represij naładžana, i jana choča žerci. Kožny dzień KDB ci HUBAZiK kahości zatrymlivaje, prychodzić da rodnych, šantažuje, ciśnie. Kadry nabrany, biudžety padpisany, płany ŭzhodnieny. EHU — ekstremisty, kramy z vopratkaj začyniajucca, ludziam navat pieryjadyčna ŭ kvizy zabaraniajuć hulać.

Ja ŭžo maŭču pra toj pakiet zakonaŭ i praktyk, jaki pieratvaryŭ Biełaruś u łakalnuju KNDR, dzie siłavik prosta na vulicy moža zaleźci ŭ telefon. Treba dumać napierad i pra astatnija 9 miljonaŭ, jakich my pakidajem u vializnaj kałonii BSSR 2.0.

5) Ci jość kankretny miechanizm ci ryčah adnaŭleńnia tych ža sankcyj, kali viecier znoŭ paduje nie ŭ toj bok? Nie mnie vam kazać, što my žyviom u toj čas historyi, kali kožny miesiac ci tydzień padkidvaje niešta zusim niečakanaje.

Vy razumiejecie roźnicu ŭ pryniaćci sankcyj ES i ZŠA? I adkul u vas dumka, što potym «po manovieniju vołšiebnoj pałočki» jany znoŭ źjaviacca? Kali Zachad stamiŭsia ad temy ŭkrainskaj vajny, to niaŭžo vy ŭjaŭlajecie, što biełarusy takija važnyja, što dziela ich buduć usio rabić znoŭ pa pieršym patrabavańni?

6) Moža, u kahości jość paraleli z epochaj 2008—2010, a taksama pieryjadam 2015—2020. Ale heta była epocha ŭmoŭnaj suśvietnaj stabilnaści, pravił, panavańnia ZŠA i naratyvaŭ «pravoŭ čałavieka».

Paśla lutaha 2022‑ha my žyviom u zusim inšym śviecie. Ja nie baču dla režymu nijakich padstaŭ zaraz rabić raniej viadomuju ŭsim «adlihu». Vam, chutčej za ŭsio, prapanujuć 10 hadoŭ zmahacca za prava pamianiać praterminavanyja pašparty ŭ najbližejšym konsulstvie.

Tamu heta sapraŭdy niaprostaje pytańnie. Ja sam pieryjadyčna adčuvaju pačućcio viny, što mnie pašancavała być na voli, a astatnim — nie. My pavinny vyciahnuć usich — usich da apošniaha.

Ale ja nie chaču, kab usie našy achviary pryviali da taho, kab Biełaruś naprykancy pieratvaryłasia ŭ Azierbajdžan, lepšyja ludzi krainy byli vyviezieny biez mahčymaści spakojna viarnucca, a novyja palitviaźni siadzieli ŭžo biez usialakaj padtrymki — bo pra ich navat nichto nie budzie viedać.

• 74
• 1
• 0
• 2
• 0
• 0
• 0
• 0