«Navičkam dajecca karotkaja viza — 15‑30 dzion». Biełarusy dzielacca, jak Italija ciapier vydaje vizy
Vizavyja pamahatary i prostyja biełarusy raskazvajuć, na jakija terminy ŭdałosia adkryć italjanskija vizy tym, chto padavaŭsia niadaŭna.
Składanaści ź italjanskimi vizami pačalisia paśla taho, jak stała viadoma, što padazravany ŭ dyviersii ŭ aeraporcie Lejpcyha hramadzianin Rasii atrymaŭ italjanskuju vizu mienavita ŭ pasolstvie ŭ Minsku. Raniej Italija ličyłasia adnoj z samych spryjalnych krain pa vydačy šmatrazovych doŭhaterminovych viz biełarusam.
Rehistracyja ŭ list čakańnia VFS z 15 vieraśnia prypynienaja. Pry hetym tych, chto raniej byŭ zarehistravany ŭ śpisie čakańnia, praciahvajuć absłuhoŭvać. A heta dziasiatki tysiač čałaviek.
Novyja zajavy ciapier prymajuć tolki ad turfirmaŭ.
Svaimi nazirańniami za apošni tydzień pracy adnaho z konsułaŭ padzialiŭsia adzin ź vizavych pamahataraŭ. Jon adznačaje, što ciapier za redkim vyklučeńniem maksimalny termin, na jaki vydajuć vizy, — heta adzin hod.
Z 12 vypadkaŭ vizu na dva hady vydali tolki adzin raz. «I tam byŭ asablivy vypadak: zaprašeńnie plus suma na rachunku i italjanskaja vizavaja historyja», — udakładniaje śpiecyjalist.
Dźvium inšym asobam, jakija da hetaha ŭžo mieli dvuchhadovyja italjanskija vizy, ciapier vydali hadavyja.
Tak było ŭ tym liku ŭ vypadku, kali čałaviek da hetaha mieŭ try italjanskija vizy (na šeść miesiacaŭ, adzin hod, dva hady) i poŭny pakiet paćviardžeńniaŭ vizitaŭ u hetuju krainu.
Inšyja ludzi ź italjanskaj vizavaj historyjaj, ale nie nastolki praciahłaj, u bolšaści vypadkaŭ atrymali šmatrazovuju vizu na try miesiacy i 30 dzion znachodžańnia.
Siamja, jakaja raniej mieła hadavyja vizy Vienhryi, Polščy i Ispanii, atrymała vizu na paŭhoda i 90 dzion znachodžańnia.
«Reziervacyja žylla i strachoŭka amal nie ŭpłyvajuć na termin. Reziervacyja žytła nie apłačana ŭ bolšaści, i heta nie pieraškadžała atrymać [vizu na] 6 miesiacaŭ i bolš», — piša pamahatar.
Što da vizavych navičkoŭ, to im dajuć karotkija vizy na 15‑30 dzion (šmatrazovyja abo adnarazovyja).
U kamientarach pad dopisam ludzi pačali dzialicca svaim dośviedam. Tak, adzin z karystalnikaŭ paśla dvuchhadovaj vizy niadaŭna atrymaŭ novuju ŭsiaho na šeść miesiacaŭ.
Žančyna, jakaja padavałasia 17 vieraśnia, padzialiłasia, što paśla dvuchhadavoj italjanskaj vizy novuju joj vydali na 15 dzion znachodžańnia. Pry hetym, jak jana śćviardžaje, z dakumientami byŭ poŭny paradak: fotazdymki, vypiski z rachunku, broni hatelaŭ.
Jašče adna biełaruska z 2012 hoda jeździć pa zaprašeńni ad dački ŭ Italiju i štohod pravodzić tam pa piać tydniaŭ. Jana adpisała, što ciapier joj dali vizu na 21 dzień, praz što ŭ jaje navat prapaŭ zvarotny bilet na samalot.
Inšaja napisała, što paśla trochmiesiačnaj vizy, atrymanaj letaś, u hetym vieraśni joj dali vizu na paŭhoda.
Taksama ŭ kamientarach pišuć, što vynik zaležyć ad konsuła, maŭlaŭ, adzin vydaje vizy bolš ščodra, čym inšy.
Ale ahulnaja situacyja takaja, što paśla incydentu ŭ Lejpcyhu doŭhaterminovyja vizy na hod i bolš stali vydavać našmat radziej.
Kamientary