Zialenski: Rasija ŭpieršyniu nastrojenaja na surjoznuju razmovu ŭ Abu-Dabi, a ZŠA prapanujuć Maskvie «ekanamičny šlub»
Pra rasijskija patrabavańni, terytaryjalnyja prapanovy ZŠA, novyja pahrozy i mahčymaści prezident Ukrainy Uładzimir Zialenski raskazaŭ padčas razmovy z žurnalistami. Hałoŭnaje ź jaho zajaŭ.
Maskva choča vyrašać, jak budzie abaraniacca Jeŭropa
Pavodle Zialenskaha, Rasija nastojvaje: kali Ukraina atrymlivaje harantyi biaśpieki, Maskva taksama pavinna ich atrymać. Adnak pad adnolkavymi słovami baki razumiejuć roznyja rečy.
«Jany kažuć: «Kali vy chočacie harantyi biaśpieki dla Ukrainy, to my chočam dla Rasii». Varta razumieć, jaki sens u heta ŭkładaje Rasija. Heta nie prosta pra toje, što Ukraina nie budzie nanosić pa ich udary. Dla ich heta značna bolš šyrokaje i bolš śpiecyfičnaje pytańnie», — patłumačyŭ Zialenski, cytuje jaho «UNIAN».
Jon kaža, što Maskva damahajecca asobnaha pahadnieńnia z NATA abo ZŠA, jakoje zamacavała b jaje ŭjaŭleńni pra jeŭrapiejskuju i suśvietnuju biaśpieku. Patrabavańnie adkacić NATA da stanu 1997 hoda Zialenski razhladaje jak sprobu pieraraźmierkavać upłyŭ i źmianić usiu sistemu biaśpieki ŭ Jeŭropie.
Heta niepasredna zakranaje i susiedziaŭ Biełarusi. U 1997 hodzie ŭ NATA jašče nie było Polščy, Litvy, Łatvii i Estonii.
Pavodle Zialenskaha, vyrašać takija pytańni mohuć tolki sami krainy NATA. Ni Rasija, ni Ukraina nie mohuć prymać za ich rašeńni.
«Luboje adstupleńnie, luby adkat u śfiery biaśpieki — heta słabaść dla Aljansu», — skazaŭ jon.
Spačatku — zaviaršeńnie vajny i harantyi dla Ukrainy
Zialenski miarkuje, što zaŭčasna abmiarkoŭvać hłabalnyja patrabavańni Maskvy, pakul nie viadoma, na jakich umovach skončycca vajna suprać Ukrainy i jak budzie harantavanaja biaśpieka samich ukraincaŭ.
«Spačatku treba vyrašyć pytańni hetaj vajny, a potym šukać adkazy na tyja pytańni, jakija Rasija stavić na asnovie svaich ujaŭleńniaŭ i čakańniaŭ pra biaśpieku», — zajaviŭ jon.
Z hetaj ža pryčyny Kijeŭ nastojvaje na ŭdziele jeŭrapiejcaŭ u pieramovach. Pavodle Zialenskaha, bieź ich nielha abmiarkoŭvać ni harantyi biaśpieki, jakija praduhledžvajuć udzieł jeŭrapiejskich krain, ni paślavajennaje adnaŭleńnie Ukrainy.
Mahčymuju sustreču lidaraŭ ZŠA, Rasii i Kitaja ŭ Piekinie Zialenski taksama razhladaje praz ryzyku pieradziełu śfier upłyvu. Pavodle jaho, dakładny paradak dnia pakul nieviadomy, ale siarod tem mohuć być Ukraina i Blizki Uschod.
«Vielmi nie chočacca, kab heta była «Jałta — 2, 3, 4», kali idzie pieraraźmierkavańnie ŭpłyvu», — skazaŭ jon.
Na dumku Zialenskaha, najbolš taki farmat patrebny Rasii: sustreča mahła b stać jašče adnym surjoznym vyjhryšam Kramla paśla pieramovaŭ Pucina i Trampa na Alascy.
«Ja prosta nie baču vyhady dla Kitaja i dakładna baču vyhadnaść hetaha farmatu dla Rasii. Pabačym, što heta budzie za sustreča», — adznačyŭ jon.
Jakija terytaryjalnyja kampramisy prapanoŭvali ZŠA
Zialenski raskazaŭ, što amierykanski bok na roznych etapach prapanoŭvaŭ demilitaryzavanyja zony, rašeńni adnosna Zaparožskaj AES u spałučeńni z abmienam terytoryjami, a taksama bufiernuju zonu pa abodva baki linii sutyknieńnia na Danbasie.
Stvareńnie takoj zony na Danbasie Ukraina była hatovaja abmiarkoŭvać.
Asobnaja prapanova tyčyłasia Kinburnskaj kasy: zrabić častku terytoryi demilitaryzavanaj i pakinuć jaje pad kantrolem Ukrainy.
Adnak dalejšaha prasoŭvańnia pa hetych varyjantach, pavodle prezidenta, niama. Maskva źviazvaje terytaryjalnyja patrabavańni z zaviaršeńniem vajny, a vyrašać ich na ŭzroŭni papiarednich dakumientaŭ niemahčyma.
«Heta pytańnie, jakoje mohuć abmiarkoŭvać tolki lidary dziaržaŭ, jakija vajujuć, i tolki na svaim uzroŭni. Ni ŭ koha inšaha takich paŭnamoctvaŭ niama», — padkreśliŭ Zialenski.
Što płanujuć abmierkavać u listapadzie
Pavodle Zialenskaha, paśla razmovy z Pucinym prezident Finlandyi Alaksandr Stub i premjer Narviehii Jonas Har Ściore pieradali jamu, što rasijski bok surjozna nastrojeny na trochbakovuju sustreču z Ukrainaj i ZŠA ŭ listapadzie.
Kijeŭ płanuje abmierkavać deeskałacyju ŭ enierhietycy i na mory, abmien pałonnymi i mahčymuju sustreču troch prezidentaŭ. Paśla hetaha Ukraina raźličvaje na pieramovy z udziełam Jeŭropy.
Rasija prapanuje ZŠA «ekanamičny šlub»
Zialenski aścierahajecca, što damoŭlenaść ab rasijskim dyzielnym palivie adkryvaje šlach da novych pahadnieńniaŭ Maskvy z Vašynhtonam. Jany mohuć zakranuć uhnajeńni, haz, zamarožanyja aktyvy i źniaćcie sankcyj z asobnych ludziej i kampanij.
Pavodle jaho, Rasija vykarystoŭvaje svaje pryrodnyja resursy, kab prapanavać ZŠA svojeasablivy «ekanamičny šlub». U doŭhaterminovaj vyhadzie takich adnosin dla amierykancaŭ jon sumniavajecca.
«U Rasii ŭ kožnym pahadnieńni jość niejkaja niepryjemnaja častka, jakuju adrazu nie vidać», — skazaŭ Zialenski.
Rakiety dla Patriot i vybary
Pavodle Zialenskaha, na praciahu 2026 hoda Ukraina atrymlivała ad ZŠA ŭ siarednim tolki 12 rakiet dla Patriot na miesiac. Abmiežavanyja pastaŭki jon źviazaŭ z vajnoj na Blizkim Uschodzie.
Asobna prezident zajaviŭ, što pravieści vybary va Ukrainie padčas vajny niemahčyma. Dla padrychtoŭki biaśpiečnaha vybarčaha pracesu, pavodle jaho, spatrebicca nie mienš za šeść miesiacaŭ.
Ciapier čytajuć
Aryštavali pradstaŭnikoŭ kampanii Bayer u Biełarusi4
Aryštavali pradstaŭnikoŭ kampanii Bayer u Biełarusi
Nastaśsia Kaściuhova pra pazicyju Statkieviča i Cichanoŭskaj: Prapanova «dacisnuć» hučyć jak prapanova jašče pačakać niezrazumieła čaho i jak doŭha4040
Kamientary