Na krejdavych karjerach pad Vaŭkavyskam pabudujuć kanatnuju darohu i adkryjuć prakat łodak
U listapadzie pradprymalnikam pačnuć prapanoŭvać ziamielnyja ŭčastki na terytoryi krejdavych karjeraŭ kala Vaŭkavyska, viadomych jak «biełaruskija Maldyvy». Pra heta ŭ efiry telekanała ANT paviedamiŭ staršynia Vaŭkavyskaha rajvykankama Dźmitryj Zacharčuk.
Krejdavyja karjery AAT «Krasnasielskbudmateryjały» karystajucca papularnaściu ŭ biełarusaŭ jak miesca dla fotasiesij. Ich nazyvajuć «biełaruskimi Maldyvami» praz błakitnuju vadu i biełaśniežnyja bierahi. Doŭhi čas naviedvańnie hetaj terytoryi było zabaroniena praź niebiaśpieku abvałaŭ i stromkija abryvy, adnak heta nie pieraškadžała tysiačam ludziej pryjazdžać siudy štohod. U 2023 hodzie pradpryjemstva raspracavała turystyčny maršrut, jaki dazvalaje biaśpiečna naviedvać karjery.
Letaś zimoj budučyniu karjeraŭ abmiarkoŭvali na druhim pasiadžeńni Usiebiełaruskaha narodnaha schodu, a ŭ mai terytoryju pryznali hieałahičnym pomnikam pryrody miascovaha značeńnia. Heta dazvoliła pačać tut haspadarčuju dziejnaść.
Ad idei poŭnaj rekultyvacyi karjeraŭ admovilisia, bo jana kaštavała b dziasiatki miljonaŭ rubloŭ. Pavodle słoŭ staršyni rajvykankama, najbolš malaŭničyja miaściny vyrašyli zachavać dla turystaŭ.
Terytoryju płoščaj 350 hiektaraŭ padzialili na siektary i vyznačyli ŭčastki dla budaŭnictva hatela, kaviarni, pałatačnaha łahiera, hłempinhaŭ i łaźniaŭ. Asobnyja zony praduhledžanyja dla rybałki, ekstremalnych vidaŭ sportu, kanatnaj darohi, prakatu łodak i sapbordaŭ. Taksama płanujecca prakłaści maršruty dla rovaraŭ, kvadracykłaŭ i matacykłaŭ. Usie niebiaśpiečnyja ŭčastki źbirajucca abharadzić.
Miascovyja ŭłady abiacajuć u listapadzie vyrašyć nieabchodnyja farmalnaści i pačać prapanoŭvać ziamielnyja ŭčastki pradprymalnikam. Rajvykankam taksama raźličvaje na dapamohu žycharoŭ Vaŭkavyskaha rajona va ŭparadkavańni terytoryi i budaŭnictvie turystyčnych abjektaŭ.
Ciapier čytajuć
Aryštavali pradstaŭnikoŭ kampanii Bayer u Biełarusi15
Kamientary