Džordža Miełoni: Nichto nie pierakanaje mianie ŭ tym, što kapitulacyju taho, chto abaraniaje svaju svabodu, možna nazyvać «miram»

«Rasija pačała novuju vosieńskuju kampaniju suprać Ukrainy. Nie majučy mahčymaści prasunucca na froncie, Maskva pačała ŭsio macniej bić pa cyvilnym nasielnictvie: elektrastancyi, žyłyja damy, balnicy, navat aŭtobusy, u jakich ludzi jeduć na pracu, jak toje žachlivaje masavaje zabojstva ŭ Kramatorsku.

Heta stratehija, u jakoj Rasija choča padparadkavać Ukrainu teroram, choładam i ciemraj prosta tamu, što nie zmahła padparadkavać jaje na poli boju.

Fakty supiarečać kremloŭskaj prapahandzie i tym, chto niasie jaje siudy: u pačatku hoda Rasija zachapiła vielmi mała terytoryi, a ŭ vieraśni straciła mnohaje z taho, što zachapiła.

Heta prypynieńnie [Rasii] nie ŭpała ź nieba: jano było dasiahnuta dziakujučy mužnaści Ukrainy i padtrymcy Zachadu, uklučajučy Italiju.

Heta prypynieńnie — adzinaja efiektyŭnaja pryłada, kab pasadzić Rasiju za stoł pieramoŭ. Ja pavažaju i razumieju haračyja debaty pa hetym pytańni navat u hetaj zale, tamu što nichto tut nie choča vajny. Usie my chočam miru. Roźnica ŭ tym, jak my chočam jaho dasiahnuć.

Jak ja baču heta, padtrymka Ukrainy — heta nie alternatyva miru, heta toje, što robić mir mahčymym.

Tamu što kali ahresar imkniecca da kapitulacyi svajho apanienta, dziela čaho jamu vieści pieramovy?

Kapitulacyja — heta nie mir. Heta zavajavańnie.

Kali Ukraina spynić abaraniacca zaŭtra, jak mnohija prapanujuć, u nas nie budzie miru. My budziem abmiarkoŭvać akupacyju jeŭrapiejskaj nacyi i viartańnie savieckaha impieryjalizmu.

Asabista ja nie sumuju pa tych časach. Ja nie sumuju pa rasijskich tankach, jakija padavili paŭstańnie ŭ Prazie i Budapiešcie. Ja nie sumuju pa Bierlinskaj ścianie.

I nichto nie pierakanaje mianie ŭ tym, što kapitulacyju taho, chto abaraniaje svaju svabodu, možna nazyvać «miram».

Mir, jakoha my chočam i nad jakim my pracujem, navat canoj sastupak — heta spraviadlivy mir, tamu što tolki spraviadlivy mir moža pratrymacca. Tolki spraviadlivy mir moža zabiaśpiečyć spakoj Jeŭropie i našy intaresy.

Tamu pazicyja ŭrada nie źmianiajecca: padtrymka Ukrainy z asablivaj uvahaj da cyvilnaha nasielnictva, cisk na Maskvu i jeŭraatłantyčnaje adzinstva zastajucca słupami našych dziejańniaŭ.

U hetym kantekście my pavinny źviarnuć uvahu na dyzielnuju ździełku Donalda Trampa z Rasijaj.

Heta vybar, jaki ja liču vielmi ryzykoŭnym.

Naturalna, my ŭsie padzialajem nieabchodnaść strymać ceny na paliva, jakija kładucca ciažkim hruzam na siemji Italii ŭ tym liku.

Ale my pavinny razumieć, što rost cen u pieršuju čarhu źviazany z vajnoj u Iranie, nie z Ukrainaj.

Lehitymizacyja Maskvy, čyje bomby praciahvajuć padać na ŭkrainskija harady, novy dachod dla finansavańnia vajny, asłableńnie sankcyj — heta ŭsio elemienty, jakija my nie možam ihnaravać i jakija supiarečać tamu, što zachodnija dziaržavy, u tym liku ZŠA, zrabili dla taho, kab prymusić Pucina sieści za stoł pieramoŭ.

Enierhietyčnaje pieramirje — heta inšaja sprava, jakuju Italija padtrymlivaje, i my ŭdziačnyja prezidentu Zialenskamu za nieadkładnuju hatoŭnaść Ukrainy da hetaha. Ciapier my čakajem, kab Rasija spyniła atakavać ukrainskija enierhasietki.

U rešcie rešt, u taki składany momant, kali tak šmat pieramiennych vychodziać z-pad kantrolu, jość jak minimum adna reč, jakaja zaležyć ad nas:

my pavinny zabiaśpiečyć, što Jeŭropa nie budzie stajać i hladzieć, tamu što ŭmovy miru ŭpłyvajuć na naš kantynient i našu biaśpieku», — zajaviła Džordža Miełoni.

Jaje pramova nieadnarazova pierapyniałasia apładysmientami.

• 65
• 3
• 1
• 1
• 0
• 0
• 0
• 5