U niamieckim horadzie pastavili vielizarnaha satanu. Šmat kamu heta nie spadabałasia
U Eślinhienie-na-Niekary razhareŭsia skandał: u centry horada, prosta nasuprać ratušy, ustalavali 2,5‑mietrovuju bronzavuju fihuru pad nazvaj «Cybulny čort».
Skulptura vahoj 400 kiłahramaŭ kaštavała 200 tysiač jeŭra. Praŭda, samomu horadu płacić nie daviałosia: heta padarunak ad miascovaj vinarobni da 1250‑hodździa Eślinhiena, piša DW.
Za vyjavaj čorta staić cełaja historyja. Pavodle padańnia, daŭnym-daŭno jon pryjšoŭ na miascovy rynak pad vyhladam znatnaha pana i zachacieŭ kupić jabłyk. Adnak chitraja handlarka raspaznała niačystuju siłu i padsunuła jamu cybulinu. Adkusiŭšy jaje, djabał zavyŭ ad ahidy, praklaŭ haradžan, nazvaŭšy ich cybulajedami (Zwieblinger), i nazaŭsiody ŭciok u susiedni Štuthart.
A voś mianuška zastałasia i na stahodździ zamacavałasia za žycharami Eślinhiena. Da niadaŭniaha času tut štohod pravodzili cybulnaje śviata — u honar kiemlivaści handlarki.
Ułady Eślinhiena-na-Niekary z radaściu pryniali bronzavaha čorta. Obierburhamistr miarkuje, što taki simvał budzie lišni raz nahadvać pra toje, što miascovych žycharoŭ zaŭsiody było niaprosta pieramahčy.
Ale satana spadabaŭsia nie ŭsim. Praciŭniki pomnika zapuścili anłajn-pietycyju z patrabavańniem nieadkładna demantavać statuju. Pad joj užo niekalki tysiač podpisaŭ.
Niadaŭna niechta abliŭ skulpturu čornaj farbaj, a na adras obierburhamistra pačali pastupać pahrozy.
«Kaniec śvietu blizki! Zamiest taho kab prasłaŭlać Boha, u centry horada staviać pomnik satanie. Heta hańba i praklon na našy hałovy!» — pišuć u sacyjalnych sietkach.
Inšyja miarkujuć, što heta častka haradskoj identyčnaści, trecija zastupajucca za kiemlivuju handlarku — maŭlaŭ, lepš by ŭ bronzie ŭviekaviečyli jaje.
Pradstaŭniki Jevanhieličnaj carkvy paśpiašalisia zapeŭnić, što bronzavy satana nie niasie pahrozy chryścijanskaj viery, i zaklikali haradžan da razvažlivaści.
«Nie varta pamyłkova błytać biblejskaha Satanu z kamičnym piersanažam z narodnaha falkłoru, dzie djabał pakazany durniem, jaki paciarpieŭ parazu», — zajaviŭ upaŭnavažany pa pytańniach śvietapohladu pry Jevanhieličnaj carkvie Andreas Olze.
Bialacki: Nie treba śpiašacca admianiać sankcyi. Bo heta budzie ŭspryniata režymam jak jaho pieramoha i słabaść Jeŭropy15
Kamientary
[Zredahavana]