ZŠA i Jeŭropa raspracoŭvajuć mirny płan, jaki daść Ukrainie harantyi biaśpieki, a Rasii — ekanamičnyja vyhady

Svarka Trampa ź Zialenskim adciahnuła ŭvahu ad padrychtoŭki mirnaha płana pa Ukrainie, piša ahladalnik Washington Post Devid Ihnacyus.

Pavodle jaho amierykanskaj krynicy, ZŠA i Jeŭropa raspracoŭvajuć sumiesnuju prapanovu ź finansavymi vyhadami i harantyjami biaśpieki dla Ukrainy i Rasii.

Jaje zadumka — pakazać Ukrainie i Rasii, što jany mohuć atrymać paśla vajny, kab schilić ich da terytaryjalnaha kampramisu, jaki nie zadavolić całkam nivodzin bok.

Prajekt abmiarkoŭvali na šaścihadzinnaj sustrečy ŭ Fłarydzie ŭ piatnicu, 9 kastryčnika. Pasłańniki Donalda Trampa Džared Kušnier i Styŭ Uitkaf prymali ŭkrainskich čynoŭnikaŭ i pradstaŭnikoŭ Vialikabrytanii, Francyi i Hiermanii. Sustreča prajšła ŭ holf-kłubie Shell Bay, jaki naležyć Uitkafu.

Pavodle amierykanskaj krynicy aŭtara, prapanova maje čatyry asnoŭnyja składniki.

Pieršy — adnaŭleńnie Ukrainy. Suśvietny bank i inviestycyjnaja kampanija BlackRock chočuć raspracavać miechanizm finansavańnia adbudovy razburanych terytoryj, padtrymki siemjaŭ zahinułych i paranienych vajskoŭcaŭ, a taksama adnaŭleńnia ekanomiki.

Pieramoŭščyki paprasili Kijeŭ padrychtavać padrabiaznyja raźliki vydatkaŭ i harantyi taho, što hetyja hrošy nie buduć raskradzienyja. Na momant padrychtoŭki kałonki raźliki jašče nie byli pradstaŭlenyja.

Druhi — harantyi biaśpieki. ZŠA i jeŭrapiejskija krainy pavinny paabiacać Ukrainie vajenny adkaz u vypadku novaha rasijskaha napadu.

Surazmoŭca nazvaŭ takuju harantyju ekvivalentam piataha artykuła statuta NATA ab kalektyŭnaj abaronie. Rasija taksama mahła b zaklučyć ź Jeŭropaj pahadnieńni, jakija ŭličvali b jaje patrabavańni ŭ śfiery biaśpieki. Što mienavita jany praduhledžvali b, pakul niezrazumieła.

Treci składnik — enierhietyčnaja ździełka pamiž Rasijaj, Ukrainaj i Jeŭropaj. Adzin z mahčymych varyjantaŭ — trubapravod dla pastavak rasijskaj nafty i hazu ŭ Jeŭropu, prybytki ad jakoha dzialili b Ukraina i Rasija. Maskva atrymała b doŭhaterminovy dostup da jeŭrapiejskaha enierhietyčnaha rynku. Pahadnieńnie taksama pavinna vyznačyć, jak i kali buduć zdymacca ekanamičnyja sankcyi.

Najbolš balučy składnik — spynieńnie ahniu pa isnaj linii frontu. Dla Ukrainy heta aznačała b, što Rasija zachavaje faktyčny kantrol nad akupavanymi terytoryjami, u tym liku zachoplenymi rajonami Danbasa. Dadatkovaja składanaść — sama linija frontu va ŭmovach ciapierašniaj vajny razmytaja, heta šyračeznaja šeraja zona.

Adnak dypłamatyčny praces užo sutyknuŭsia z kanfliktam pamiž Trampam i Uładzimiram Zialenskim. Pavodle amierykanskaj krynicy Ihnacyusa, Tramp patrabuje spynić ukrainskija ŭdary pa rasijskich NPZ jak umovu dalejšaha prasoŭvańnia mirnaj inicyjatyvy. Kali Kijeŭ pahodzicca, Kušnier i Uitkaf hatovyja pajechać u Maskvu.

Dla Ukrainy takaja sastupka aznačała b admovu ad adnaho z najbolš dziejsnych srodkaŭ cisku na Rasiju, adznačyŭ jeŭrapiejski dypłamat u razmovie z aŭtaram. Najbujniejšy ŭkrainski NPZ užo mocna paškodžany rasijskimi atakami, tady jak udary pa rasijskich zavodach škodziać ekanomicy Rasii i ŭzmacniajuć pieramoŭnuju pazicyju Zialenskaha.

Ihnacyus taksama piša pra pahrozu spynić amierykanskuju raźviedvalnuju padtrymku Ukrainy na fonie hetaj sprečki. Jeŭrapiejski dypłamat pryznaŭ, što zamianić jaje było b ciažka.

Pry hetym aŭtar padkreślivaje: hatoŭnaść Pucina da miru zastajecca pad pytańniem. Na jaho dumku, dyzielnaja ździełka Trampa z Maskvoj, jakaja padryvaje sankcyi, palahčaje Rasii praciah vajny.

• 0
• 1
• 1
• 5
• 0
• 0
• 2
• 0