Rasija skarocić vypłaty Biełarusi na 1,4 miljarda rubloŭ. Što chavajecca za «biazvypłatnymi» hrašyma biudžetu?

Zhodna z prajektam respublikanskaha biudžetu na 2027 hod, biazvypłatnyja pastupleńni składuć 8,065 miljarda rubloŭ suprać 9,464 miljarda, pieršapačatkova praduhledžanych na 2026 hod.

Roźnica składaje amal 1,4 miljarda rubloŭ, abo 14,8%. Pryčym praktyčna ŭsio skaračeńnie prypadaje na pastupleńni ad zamiežnych dziaržaŭ.

U 2026 hodzie ich zapłanavali ŭ pamiery 6,672 miljarda rubloŭ, a ŭ 2027‑m čakajuć tolki 5,281 miljarda. Źnižeńnie składaje 20,8%.

Za što Rasija pieraličvaje Biełarusi miljardy

Asnoŭnaja pryčyna źviazanaja z rasijskim padatkovym manieŭram u naftavaj halinie. Raniej biełaruskija naftapierapracoŭčyja zavody atrymlivali rasijskuju naftu na lhotnych umovach. Rasija pastupova źnižała ekspartnyja myty na naftu, adnačasova pavialičvajučy padatkovuju nahruzku na jaje zdabyču.

Da 2024 hoda ekspartnaje myta abnuliłasia. U vyniku źnikła raniejšaja cenavaja pieravaha biełaruskich NPZ, a biudžet Biełarusi straciŭ častku dachodaŭ, źviazanych z handlem naftaj. Kab kampiensavać hetyja źmieny, krainy damovilisia pra miždziaržaŭnyja biudžetnyja tranśfierty.

Inšymi słovami, Rasija pieraličvaje hrošy nie prosta sa ščodraści. Heta častka ŭzhodnienaha miechanizmu, pryznačanaha kampiensavać nastupstvy źmieny rasijskich padatkovych praviłaŭ.

Miljardy ŭ abmien na padatkovuju intehracyju

Jany praduhledžanyja «Damovaj pamiž Rasijskaj Fiederacyjaj i Respublikaj Biełaruś ab ahulnych pryncypach padatkaabkładańnia ŭskosnymi padatkami». Dakumient padpisali ŭ Maskvie 3 kastryčnika 2022 hoda, a moc jon nabyŭ 31 studzienia 2023 hoda. Na jaho padstavie Rasija pieraličvaje Biełarusi miljardy.

Na pieršy pohlad, heta zvyčajnaje pahadnieńnie ab padatkach. Adnak jano praduhledžvaje nie tolki hrašovyja pieraličeńni, ale i zbližeńnie padatkovaha zakanadaŭstva dźviuch dziaržaŭ.

Zhodna z artykułam 8 damovy, Rasija abaviazvajecca štomiesiac davać Biełarusi miždziaržaŭnyja biudžetnyja tranśfierty. Ale jość pryncypovaja ahavorka: biełaruski bok pavinien vykonvać usie abaviazacielstvy, jakija vynikajuć z damovy.

A abaviazacielstvy davoli cikavyja. Biełaruś i Rasija ŭzhadniajuć praviły padatkaabkładańnia PDV i akcyzami, abmieńvajucca padatkovaj infarmacyjaj i vykarystoŭvajuć intehravanuju sistemu administravańnia ŭskosnych padatkaŭ.

Bolš za toje, damova praduhledžvaje stvareńnie Nadnacyjanalnaha padatkovaha kamiteta dla kantrolu za realizacyjaj uzhodnienych praviłaŭ.

Takim čynam, naftavyja kampiensacyi stali častkaj značna šyrejšaj ekanamičnaj intehracyi.

«Biaspłatnyja hrošy» z umovami

Słova «biazvypłatnyja» tut maje biudžetnaje, a nie štodzionnaje značeńnie. Hrošy nie treba viartać, jak bankaŭski kredyt, adnak ich atrymańnie rehulujecca miždziaržaŭnaj damovaj.

U adpaviednaści z pahadnieńniem ad 3 kastryčnika 2022 hoda Rasija vydzialaje Biełarusi štomiesiačnyja tranśfierty pry vykanańni peŭnych abaviazacielstvaŭ.

Jany tyčacca, u pryvatnaści, uzhadnieńnia zakanadaŭstva ab uskosnych padatkach i abmienu padatkovaj infarmacyjaj. Pamier pieraličeńniaŭ zaležyć, u tym liku, ad cen na naftu i praduhledžanaj damovaj formuły raźliku.

Atrymlivajecca cikavaja kanstrukcyja: hrošy farmalna biazvypłatnyja, ale miechanizm ich atrymańnia źviazany z kankretnymi ekanamičnymi i pravavymi ŭmovami.

Adkul astatnija 2,8 miljarda rubloŭ?

Było b pamyłkaj śćviardžać, što ŭsie 8 miljardaŭ rubloŭ respublika atrymlivaje z Rasii abo ŭ vyhladzie zamiežnaj dapamohi. Z ahulnaj sumy biazvypłatnych pastupleńniaŭ na 2027 hod kala 5,3 miljarda prypadaje na zamiežnyja dziaržavy.

Astatnija 2,784 miljarda rubloŭ adnosiacca da inšych biazvypłatnych pastupleńniaŭ, pieradusim da pieraraźmierkavańnia srodkaŭ unutry biudžetnaj sistemy Biełarusi.

Ale hałoŭnaje pytańnie ŭ inšym: čamu pastupleńni z-za miažy skaračajucca adrazu na 1,4 miljarda rubloŭ? Adna z mahčymych pryčyn źviazanaja sa źmianieńniem raźlikovych paramietraŭ naftavych kampiensacyj.

Jość i prablema prazrystaści. Z 2022 hoda Minfin nie publikuje źviestki pra ŭsie karekciroŭki biudžetu ciaham hoda ŭ raniejšym abjomie. Tamu paraŭnańnie pieršapačatkovych płanaŭ na 2026 i 2027 hady nie pakazvaje, kolki Biełaruś faktyčna atrymała ad Rasii.

Farmalna Rasija pieraličvaje Biełarusi biazvypłatnyja srodki. Ale ŭ miežach toj ža damovy Biełaruś biare na siabie abaviazacielstvy pa zbližeńni padatkovych praviłaŭ i sumiesnym administravańni.

• 0
• 0
• 0
• 0
• 0
• 0
• 0
• 0