U Biełarusi niemahčyma vyklikać «Jandeks-taksi» paśla ataki dronaŭ na data-centr va Uładzimiry
U noč na 11 kastryčnika drony atakavali data-centr «Jandeksa» ŭ rasijskim Uładzimiry. Jaho praca całkam spyniłasia. Karystalniki ŭ niekalkich krainach, u tym liku Biełarusi, paviedamlajuć pra masavyja zboi ŭ pracy servisaŭ. U Biełarusi niemahčyma vyklikać taksi. Heta ŭžo treci data-centr kampanii, atakavany za čatyry dni.
Paśla ataki dronaŭ na čarhovy data-centr karystalniki servisu nie mohuć zamović taksi ŭ Maskvie, Pieciarburhu, Jekaciarynburhu, Uładzivastoku i inšych rasijskich haradach. Pamyłki pry vykliku mašyny ŭźnikajuć taksama ŭ Kazachstanie, Armienii i Sierbii. Niemahčyma vyklikać taksi servisu i ŭ Biełarusi.
Kiroŭcy paviedamlajuć, što nie mohuć uvajści ŭ svaje akaŭnty, a ŭ tych, u kaho prahrama jašče pracuje, źbiłasia navihacyja. Pasažyram pakazvaje, što svabodnych mašyn niama.
Pavodle kanała «Ostorožno, novosti», pierastaŭ pracavać dadatak «Jandieks Pro», jakim karystajucca taksisty i kurjery. Zboi zakranuli i ŭnutranyja prahramy supracoŭnikaŭ padtrymki.
Čytačy ASTRA taksama skardziacca na niedastupnaść dadatkaŭ Fix Price i «Mahnit». Praz zboj u «Jandieks Pay» častka karystalnikaŭ paviedamlaje pra prablemy z dostupam da svaich hrošaj.
Atakavany data-centr znachodzicca ŭ mikrarajonie Enierhietyk. ASTRA vyznačyła miesca pažaru pa fotazdymkach, dasłanych čytačami. Pavodle vidavočcaŭ, dymam zavałakło Leninski rajon Uładzimira.
«Jandeks» paćvierdziŭ, što infrastruktura data-centra paškodžanaja ŭ vyniku ataki bieśpiłotnikaŭ, a jaho praca całkam spynienaja. Pavodle kampanii, paciarpiełych niama. Śpiecyjalisty aceńvajuć škodu; terminaŭ adnaŭleńnia pakul nie nazyvajuć.
Hubiernatar Uładzimirskaj vobłaści Alaksandr Aŭdziejeŭ paviedamiŭ, što paśla ataki adklučylisia dźvie padstancyi, jakija zabiaśpiečvajuć elektryčnaściu piać tysiač žycharoŭ. Z najbližejšych da atakavanaha abjekta damoŭ evakujavali ludziej. Pavodle jaho, razbureńnia žyłych damoŭ udałosia paźbiehnuć.
Heta treciaja ataka na data-centry «Jandeksa» za apošnija dni. 8 kastryčnika byŭ atakavany abjekt u Sasavie Razanskaj vobłaści, 9 kastryčnika — u Kałuzie. Paśla hetych udaraŭ kampanija taksama paviedamlała pra paškodžańni i pieraboi ŭ pracy servisaŭ.
-
Zialenski zajaviŭ pra hatoŭnaść da mirnaha pahadnieńnia z raźmiežavańniem pa ciapierašniaj linii frontu
-
U Rasii čarhovy rehijon skaraciŭ vypłaty siemjam zahinułych na vajnie suprać Ukrainy
-
Adrezaŭ sabie stupniu nažom dla tušonki i praciahvaŭ vajavać. Historyja ŭkrainca, jakoha evakujavali bieśpiłotnikam paśla 491 dnia na pazicyi
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary
Zakazyvajcie taksi ŭ šefa, jano nie patrabuje zamiežnaha čaburnietu.