Stała viadoma, što za novy budynak dla BDU pastaviać u centry Minska

Budynak raźmieścicca ŭ kvartale pamiž vulicami Śviardłova, Leninhradskaj, Babrujskaj i praśpiektam Niezaležnaści. Jon budzie mieć piać-šeść pavierchaŭ i padziemny ŭzrovień. Architektary imknulisia ŭpisać novuju pabudovu ŭ histaryčnaje asiarodździe, tamu dla jaje abrali łakaničny kanstruktyviscki styl.

Prajekt raspracavaŭ instytut «Biełdziaržprajekt», zakazčykam vystupaje BDU. Dla budaŭnictva vydzielili ŭčastak płoščaj bolš za 4 tysiačy kvadratnych mietraŭ.

Pavialičyć

U novym korpusie raźmieściacca vučebnyja aŭdytoryi, spartyŭny centr, kaviarnia, nievialiki internat i muziej. Pamiaškańni padzielać na asobnyja funkcyjanalnyja zony.

Na pieršym paviersie praduhledžanyja choł z harderobam, kaviarnia na 48 čałaviek, vučebnyja kłasy i zały dla kina-lekcyj. Druhi pavierch całkam addaduć pad sport: tam buduć spartyŭnyja i trenažornyja zały, raspranalni z dušavymi, a taksama kabiniety trenieraŭ. Na trecim paviersie raźmieściacca vučebnyja aŭdytoryi i kabiniety vykładčykaŭ.

Pavialičyć

Čaćviorty i piaty pavierchi zojmie internat na 56 čałaviek. U im buduć žyłyja pakoi, bytavyja zony i pamiaškańni dla zaniatkaŭ. Na šostym paviersie płanujuć abstalavać lekcyjnyja aŭdytoryi i muziej. U budynku pastaviać čatyry pasažyrskija lifty, dva ź jakich pryznačanyja śpiecyjalna dla internata.

Pavialičyć

Korpus pabudujuć z manalitnaha žalezabietonu, a ścieny vykładuć z kieramzitabietonnych błokaŭ. Dach budzie plaskatym, na im zrobiać adkrytuju terasu z aharodžaj.

Prajekt praduhledžvaje taksama ŭparadkavańnie prylehłaj terytoryi. U dvor možna budzie zajechać z boku vulicy Leninhradskaj. Darohi i tratuary vykładuć plitkaj, kala hałoŭnaha ŭvachoda pastaviać łaŭki, śmietnicy, viełaparkoŭki i fłahštoki.

Pavialičyć

U haspadarčaj častcy dvara źjaviacca novaja transfarmatarnaja padstancyja i placoŭka dla raździelnaha zboru śmiećcia. Taksama praduhledžanyja dva parkavalnyja miescy dla ludziej ź invalidnaściu i prajezdy dla pažarnych mašyn.

Aznajomicca z eskizami i schiemami budučaha korpusa, a taksama dasłać zaŭvahi i prapanovy moža kožny achvotny na sajcie administracyi Maskoŭskaha rajona Minska.

Prapanovy prymajucca z 26 kastryčnika da 10 listapada. Ich možna nakiravać u piśmovaj formie pa adrasie: Minsk, praśpiekt Dziaržynskaha, 10, 220036, abo pa elektronnaj pošcie [email protected] z paznakaj «Hramadskaje abmierkavańnie».

Usie atrymanyja zaŭvahi pieradaduć na razhlad architekturna-horadabudaŭničaj rady pry hałoŭnym architektary Minska.

• 0
• 2
• 0
• 8
• 0
• 2
• 0
• 0