Kiraŭnik Ryanair pradkazaŭ «najbujniejšaje ŭ historyi» pavyšeńnie cen na avijakvitki ŭ Jeŭropie

Na pres-kanfierencyi ŭ Brusieli O'Liry zajaviŭ, što ŭ nastupnym hodzie kvitki na rejsy ŭnutry Jeŭropy mohuć padaražeć da 20%. Adnak navat takoje pavyšeńnie, na jaho dumku, nie dazvolić avijapieravozčykam całkam kampiensavać rost vydatkaŭ na paliva, a ich prybytkovaść usio roŭna źnizicca.

«U najbližejšyja 12 miesiacaŭ Jeŭropu, mabyć, čakaje najbujniejšaje ŭ historyi pavyšeńnie cen na avijabilety. Pytańnie ŭ tym, ci budzie hetaha padaražańnia dastatkova, kab pakryć rezka ŭzrosłyja rachunki za naftu? Ja tak nie dumaju», — skazaŭ kiraŭnik Ryanair.

Pa słovach O'Liry, bolšaść jeŭrapiejskich avijakampanij, u tym liku Ryanair, nie majuć dastatkovaj abarony ad vahańniaŭ naftavych cen na nastupny hod. Akramia taho, mahčymaści avijapieravozak na rynku skaracilisia, bo častka kampanij sutykajecca ź ciažkaściami, a pavyšeńnie padatkaŭ jašče bolš uskładniaje stanovišča haliny.

«U nastupnym hodzie 85% našych patrebaŭ u palivie nie abaronienyja ad vahańniaŭ cen, i bolšaść inšych jeŭrapiejskich avijakampanij znachodziacca ŭ anałahičnym stanoviščy», — zajaviŭ jon.

20 kastryčnika akcyi Ryanair patańnieli na 2,4%, niamieckaj Lufthansa — amal na 1%, a francuzskaj Air France-KLM — amal na 2%. Z pačatku hoda akcyi Ryanair u Irłandyi stracili bolš za 25% koštu. Kali hetaja tendencyja zachavajecca da kanca 2026 hoda, dla kampanii heta moža stać najhoršym vynikam z 2018 hoda.

Ryanair užo papiaredžvała pra mahčymy rost cen na avijabilety. U vieraśni kampanija zajaŭlała, što ŭ nastupnym hodzie istotna padaražejuć karotkija rejsy pa ŭsioj Jeŭropie, kali nafta zastaniecca darahoj.

Jak adznačaje Bloomberg, z pačatku vajny na Blizkim Uschodzie ŭ kancy lutaha avijakampanii va ŭsim śviecie adčuvajuć cisk praz rezkaje padaražańnie avijacyjnaha paliva. U apublikavanaj u lipieni spravazdačnaści Ryanair paviedamlałasia, što kanflikt niehatyŭna paŭpłyvaŭ u tym liku na prybytak kampanii. Akramia taho, praz aściarohi nakont mahčymych pierabojaŭ z pastaŭkami paliva pasažyry pačali paźniej braniravać bilety.

Ceny na avijacyjnuju hazu rezka vyraśli paśla pačatku bajavych dziejańniaŭ pamiž ZŠA i Iranam. Na padaražańnie paŭpłyvali rost koštu nafty i pieraboi z pastaŭkami z krain Piersidskaha zaliva. Pavodle źviestak Mižnarodnaj asacyjacyi pavietranaha transpartu (IATA), uviesnu cana avijacyjnaha paliva časam pieravyšała 200 dalaraŭ za baral — bolš čym na 100% vyšej za davajenny ŭzrovień.

Paźniej tempy rostu cen zapavolilisia. Adnak, pavodle acenak IATA, na minułym tydni siaredniaja suśvietnaja cana avijacyjnaha paliva pavialičyłasia jašče na 1,2% u paraŭnańni z papiarednim tydniem i dasiahnuła 192,4 dalara za baral. Heta prykładna na 100 dalaraŭ bolš, čym da pačatku kanfliktu na Blizkim Uschodzie.

Na tarhach 20 kastryčnika fjučarsy na naftu marki Brent kaštavali kala 111 dalaraŭ za baral, a WTI — bolš za 105 dalaraŭ. Z pačatku vajny ŭ Iranie nafta Brent padaražeła bolš čym na 54%.

• 0
• 1
• 0
• 0
• 1
• 0
• 0
• 0