Machlary navučylisia zdavać praz Booking nieisnujučaje žyllo — voś jak pracujuć schiemy
Turysty stračvajuć sotni jeŭra praz falšyvyja paviedamleńni ad hatelaŭ, płaciać za niaisnyja apartamienty i pryjazdžajuć pa adrasach, dzie nichto nie źbiraŭsia ich zasialać.
Miljony ludziej karystajucca Booking.com, kab zareziervavać žyllo dla adpačynku. Ale ŭžo niekalki hadoŭ płatforma sutykajecca z machlarami, jakija prydumlajuć usio bolš składanyja sposaby vymańvańnia hrošaj u turystaŭ.
Adna z samych raspaŭsiudžanych schiem pačynajecca sa zvyčajnaha reziervavańnia. Čałaviek vybiraje hatel, apłačvaje numar i atrymlivaje paćviardžeńnie. Ale praź niekatory čas jamu prychodzić paviedamleńnie: z apłataj uźnikła prablema, treba terminova paćvierdzić bankaŭskuju kartu, inakš reziervavańnie skasujuć.
Paviedamleńnie vyhladaje sapraŭdnym. Adpraŭnik viedaje imia klijenta, nazvu hatela, daty pražyvańnia i navat numar reziervavańnia. Bolš za toje, jano moža pryjści niepasredna praz unutrany čat Booking.com. Nasamreč za paviedamleńniem stajać machlary. Jany prapanujuć pierajści pa spasyłcy na padrobleny sajt i ŭvieści bankaŭskija rekvizity. Tak złačyncy atrymlivajuć mahčymaść skraści hrošy.
Hetaja schiema nazyvajecca reservation hijacking — «pierachop reziervavańnia». Jana daloka nie novaja. Jak raskazvała The Guardian jašče ŭ červieni 2025 hoda, u zafiksavanych žurnalistami vypadkach ludzi stračvali pa niekalki sotniaŭ funtaŭ.
Kab atrymać infarmacyju pra klijentaŭ, złačyncy mohuć uzłomvać akaŭnty hatelaŭ. Jak mienavita heta adbyvajecca, u sakaviku 2025 hoda padrabiazna raskazała Microsoft. Kampanija vyjaviła maštabnuju fišynhavuju ataku na supracoŭnikaŭ hatelaŭ u Jeŭropie i inšych rehijonach śvietu.
Machlary rassyłali listy ad imia Booking.com. U adnych paviedamlałasia pra skarhu niezadavolenaha hościa, u inšych — pra novaje reziervavańnie abo nieabchodnaść terminova paćvierdzić akaŭnt. Listy ŭtrymlivali spasyłku na sajt, jaki vyhladaŭ jak Booking.com.
Na padroblenaj staroncy supracoŭniku prapanoŭvali prajści zvyčajnuju na pieršy pohlad pravierku CAPTCHA — paćvierdzić, što jon nie robat. Ale zamiest hetaha jaho prasili nacisnuć peŭnuju kambinacyju kłaviš i ŭstavić kamandu, jakuju sajt aŭtamatyčna skapijavaŭ u bufier abmienu. Vykanańnie hetaj kamandy zapuskała zahruzku škodnaj prahramy.
Tak złačyncy mahli vykraści paroli i inšyja kanfidencyjalnyja danyja, atrymać dostup da sistem hatela i vykarystoŭvać jaho dla finansavaha machlarstva. Microsoft nazvała hetuju techniku ClickFix.
Pavodle brytanskaha centra Action Fraud, z červienia 2023 hoda da vieraśnia 2024‑ha pastupiła 532 paviedamleńni pra machlarstva, źviazanaje z reziervavańniem žylla. Ahulnyja straty paciarpiełych skłali kala 370 tysiač funtaŭ.
Zamiest hatela — pab ci budynak parłamienta
Adnak złačyncy nie abmiažoŭvajucca kradziažom bankaŭskich danych. Jany taksama prapanujuć na Booking.com žyllo, jakoha nasamreč niama abo jakoje im nie naležyć.
U vieraśni 2026 hoda brytanskaja spažyvieckaja arhanizacyja Which? raskazała pra vypadak u Łondanie. Turysty praz Booking.com reziervavali «luksavyja apartamienty» The London Crown pobač z Taŭerskim mostam. Ale pa paznačanym adrasie znachodziŭsia zvyčajny pab The Liberty Bounds. Jaho supracoŭniki raskazvali, što im davodziłasia štodnia tłumačyć turystam z valizkami, što nijakich apartamientaŭ tut niama. Časam prychodziła da 20 čałaviek za dzień.
Adzin z paciarpiełych zapłaciŭ kala 73 funtaŭ za načleh dla siamji. Praz dva dni paśla reziervavańnia jamu pryjšoŭ list nibyta ad pradstaŭnikoŭ apartamientaŭ z prośbaj uvieści bankaŭskija rekvizity na starońnim sajcie. Mužčyna zapadozryŭ machlarstva, vyśvietliŭ, što pa adrasie znachodzicca pab, i źviarnuŭsia ŭ słužbu padtrymki Booking.com. Adnak tam, pavodle jaho słoŭ, prapanavali spačatku pryjechać pa adrasie i pasprabavać zasialicca. Na toj momant u abjavy ŭžo byli sotni niehatyŭnych vodhukaŭ ad turystaŭ, jakija nie zmahli znajści svajo žyllo.
Jašče adzin vypadak tyčyŭsia «apartamientaŭ kala Bih-Bena». Ich adrasam byŭ paznačany Portcullis House — budynak brytanskaha parłamienta. Turysty, jakija pryjazdžali zasialacca, zamiest haspadaroŭ sustrakali ŭzbrojenuju achovu.
Paźniej Booking.com paviedamiŭ, što ŭ hetych dvuch vypadkach złačyncy atrymali niesankcyjanavany dostup da akaŭntaŭ sapraŭdnych abjektaŭ raźmiaščeńnia i źmianili infarmacyju ŭ abjavach.
Booking.com viedaje ab prablemie nie pieršy hod
Maštab machlarstva na płatformie raście ŭžo niekalki hadoŭ. Jašče ŭ 2024 hodzie kiraŭnica kibierbiaśpieki Booking.com Marni Uiłkinh raskazvała, što za papiarednija 18 miesiacaŭ kolkaść vypadkaŭ machlarstva vyrasła na 500—900%. Kampanija źviazvała heta, u tym liku, z raźvićciom štučnaha intelektu, jaki dazvalaje złačyncam stvarać usio bolš pierakanaŭčyja padroblenyja listy i sajty.
Rost kolkaści skarhaŭ, jak piša The Guardian, fiksavali i spažyvieckija arhanizacyi. Prykładam, u Niderłandach Consumentenbond za 2025 hod atrymała kala 200 paviedamleńniaŭ pra machlarstva, źviazanaje z Booking.com, — udvaja bolš, čym hodam raniej, kali takich zvarotaŭ było 89. Pavialičylisia i straty paciarpiełych: z 25 da 65 tysiač jeŭra. Pry hetym u arhanizacyi miarkujuć, što realnyja maštaby prablemy značna bolšyja, bo mnohija achviary nie paviedamlajuć pra machlarstva.
U Booking.com nie raz zajaŭlali, što inviestujuć u kibierbiaśpieku, vykarystoŭvajuć štučny intelekt dla vyjaŭleńnia padazronych abjaŭ i supracoŭničajuć z pravaachoŭnymi orhanami.
Adnak šmatlikija vypadki pakazvajuć, što hetyja miery nie zaŭsiody spracoŭvajuć. Pryčym dla raźmiaščeńnia falšyvaha žylla časam navat nie patrebnyja składanyja chakierskija ataki.
Jak žurnalisty zdali ŭ arendu rezidencyju premjera
Pravieryć, nakolki nadziejna Booking.com praviaraje abjavy pra žyllo, vyrašyli žurnalisty brytanskaj spažyvieckaj arhanizacyi Which?. U červieni 2026 hoda jany praviali ekśpierymient: stvaryli abjavu ab zdačy adnapakajovaj kvatery ŭ centry Łondana. U jakaści adrasa paznačyli Daŭninh-stryt, 10 — aficyjnuju rezidencyju brytanskaha premjer-ministra, a da abjavy prykłali fotazdymak znakamitych čornych dźviarej.
Niahledziačy na heta, Booking.com apublikavaŭ abjavu. Žurnalisty naładzili jaje tak, kab achvotnyja spačatku adpraŭlali zapyt na reziervavańnie, a nie mahli adrazu zapłacić. Zatym jany nienadoŭha adkryli mahčymaść reziervavańnia i sami aformili pražyvańnie na tydzień. Booking.com pryniaŭ apłatu za niaisnuju kvateru. Pryčym, pavodle Which?, navat praz šeść tydniaŭ hrošy za testavaje reziervavańnie daśledčykam tak i nie viarnuli.
Fancy a stay at 10 Downing Street?
We listed the Prime Minister's famous address as a holiday rental and managed to make a test payment, publish a fake 10/10 review and even send an external weblink through @bookingcom messaging system https://t.co/B9AYoOeUVL
Paśla hetaha žurnalisty pravieryli sistemu vodhukaŭ. Jany pakinuli falšyvy vodhuk z maksimalnaj adznakaj — 10 z 10, u jakim napisali, što im spadabałasia bavić čas z Łary — katom, jaki žyvie ŭ rezidencyi premjera. Niahledziačy na paviedamleńnie Booking.com pra toje, što vodhuk adpraŭleny na pravierku maderatarami, jon byŭ apublikavany amal adrazu.
Ale na hetym ekśpierymient nie skončyŭsia. Žurnalisty zmahli adpravić praz unutranuju sistemu paviedamleńniaŭ Booking.com spasyłku na starońni sajt, dzie nibyta dla paćviardžeńnia reziervavańnia treba było ŭvieści danyja bankaŭskaj karty. Mienavita takija paviedamleńni vykarystoŭvajuć machlary, kab vymańvać hrošy ŭ turystaŭ.
Pra vyniki ekśpierymientu daśledčyki paviedamili Booking.com. Adnak falšyvuju abjavu vydalili tolki 27 žniŭnia — bolš čym praz dva miesiacy paśla jaje stvareńnia i paśla nieadnarazovych zvarotaŭ žurnalistaŭ.
U Booking.com zajavili, što ekśpierymient nie adlustroŭvaje situacyi ź pieravažnaj bolšaściu abjaŭ. U kampanii zapeŭnili, što vykarystoŭvajuć roznyja miechanizmy pravierki i štučny intelekt, jakija dazvalajuć vyjaŭlać i vydalać bolšaść machlarskich prapanoŭ na praciahu sutak.
Za Booking uziałasia Jeŭrakamisija
Na fonie šmatlikich skarhaŭ i žurnalisckich rasśledavańniaŭ 21 kastryčnika 2026 hoda Jeŭrakamisija pačała aficyjnaje rasśledavańnie ŭ dačynieńni da Booking.com. Rehulatary chočuć vyśvietlić, ci dastatkova płatforma robić dla abarony karystalnikaŭ ad machlaroŭ.
Pravierka zakranie jak falšyvyja abjavy pra žyllo, tak i «pierachopy reziervavańnia», kali złačyncy vydajuć siabie za pradstaŭnikoŭ hatelaŭ i vymańvajuć hrošy ŭ turystaŭ. Asobna Jeŭrakamisija vyvučyć, ci dastatkova vyrazna płatforma paznačaje płatnyja rekłamnyja prapanovy ŭ vynikach pošuku.
Jak piša The Guardian, pradstaŭnik Jeŭrakamisii nazvaŭ namahańni Booking.com u baraćbie z machlarstvam «absalutna niezadavalnialnymi». U samoj kampanii zapeŭnivajuć, što supracoŭničajuć z rehulatarami i praciahvajuć udaskanalvać sistemy biaśpieki.
Kali vyśvietlicca, što Booking.com parušaje jeŭrapiejski Zakon ab ličbavych pasłuhach (DSA), kampanii moža pahražać štraf da 6% hadavoha abarotu.
Kamientary