A kali była administratyŭka za ŭdzieł u pratestach, to nielha navat vyłučacca.
Kandydataŭ u akademiki i členy-karespandenty buduć dapuskać da vybaraŭ tolki paśla pravierki Dziaržsakrataryjata Rady biaśpieki. A navukoŭcy, jakich pakarali administratyŭkaj za ŭdzieł u pratestach, nie zmohuć navat vyłučacca. Takija praviły praduhledžvaje novaja redakcyja statutu Nacyjanalnaj akademii navuk Biełarusi. Adpaviedny ŭkaz №367 Łukašenka padpisaŭ 19 kastryčnika. Jon pačnie dziejničać praz šeść miesiacaŭ — viasnoj 2027 hoda.
Zhodna z ukazam, akademikaŭ i členaŭ-karespandentaŭ abiraje Ahulny schod NAN. Adnak pierš čym navukoŭca zarehistrujuć kandydatam, jaho dakumienty pavinny buduć prajści pravierku ŭ Dziaržaŭnym sakrataryjacie Rady biaśpieki.
Tam treba atrymać zaklučeńnie «ab adsutnaści źviestak, jakija pieraškadžajuć abrańniu ŭ členy Akademii navuk». Biez takoha zaklučeńnia kandydata nie zarehistrujuć, a značyć, da hałasavańnia jon nie dojdzie.
Asobna prapisana, kaho nielha navat vyłučać.
Siarod padstaŭ — administracyjnaje pravaparušeńnie, źviazanaje z «parušeńniem paradku arhanizacyi abo praviadzieńnia masavych mierapryjemstvaŭ». Takim čynam, zabarona zakranie i navukoŭcaŭ, pakaranych pavodle hetaj padstavy za ŭdzieł u pratestach.
U hetym ža pieraliku — złačynstvy «ekstremisckaj nakiravanaści», ciažkija i asabliva ciažkija złačynstvy. Z administracyjnych pravaparušeńniaŭ zhadvajucca taksama dziejańni z nacysckaj simvolikaj i materyjałami, jakija ŭtrymlivajuć zakliki da ekstremisckaj dziejnaści abo prapahandujuć jaje.
Jość i šyrejšaja farmuloŭka: vyłučacca nielha paśla «inšych dziejańniaŭ, jakija nanosiać škodu dziaržaŭnym abo hramadskim intaresam ci nakiravanyja na dyskredytacyju akademičnaha vučonaha zvańnia». Jakija mienavita dziejańni majucca na ŭvazie, u hetym punkcie nie ŭdakładniajecca. Nie paznačany tut i termin, paśla jakoha pieraličanyja ŭčynki pierastajuć być pieraškodaj dla vyłučeńnia.
Rašeńnie prezidyuma NAN ab admovie ŭ rehistracyi kandydata statut nazyvaje kančatkovym.
Pry hetym praduhledžany i šlach atrymańnia akademičnaha zvańnia biez vybaraŭ. Łukašenka zmoža prysvojvać jaho svaim ukazam tym, chto, na jaho pohlad, unios značny ŭkład u nacyjanalnuju ekanomiku, biełaruskuju i suśvietnuju navuku. Kandydatury jamu budzie prapanoŭvać prezidyum NAN.
Adnačasova skaračajuć kolkaść miescaŭ u Akademii: dla akademikaŭ praduhledžana 90 zamiest 100, dla členaŭ-karespandentaŭ — 120 zamiest 145.
Takoha stupieniu dziaržaŭnaha kantrolu nad Akademijaj navuk nie było navat u saviecki čas. Hetaja struktura tady zachoŭvała vysokuju stupień aŭtanomii.
Kamientary