Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ
Kali šaścihadovy Rusłan Kohan pryjechaŭ ź siamjoj z Babrujska ŭ Aŭstraliju, u baćkoŭ było ŭsiaho $90. Siońnia jon adzin z samych bahatych ludziej u Aŭstralii. Mužčyna kiruje bujnoj kampanijaj internet-handlu i hatovy admovicca ad vysokaha zarobku dziela šancu atrymać kala $35 miljonaŭ. Raskazvajem, jak jon razbahacieŭ i čamu navat ciapier praciahvaje ekanomić na drobiazi.
Jak paviedamlaje aŭstralijskaja słužba navin 7NEWS, zasnavalnik i hienieralny dyrektar aŭstralijskaj kampanii Kogan.com Rusłan Kohan choča kardynalna źmianić sistemu ŭłasnaha ŭznaharodžańnia, faktyčna pastaviŭšy svaje budučyja dachody ŭ zaležnaść ad pośpiechaŭ kampanii.
Kohan płanuje prapanavać akcyjanieram novuju schiemu ŭznaharodžańnia. Jon choča admovicca ad hadavoha zarobku pamieram kala $585 tysiač i pierajści na minimalnuju apłatu pracy ŭ krainie — kala $35 tysiač na hod. Pry hetym uvieś svoj novy zarobak jon abiacaje pieraličvać na dabračynnaść.
Adnak Kohanam ruchaje nie tolki žadańnie dapamahać inšym. Zamiest vysokaha zarobku jon choča atrymlivać uznaharodžańnie ŭ vyhladzie pravoŭ na akcyi kampanii. Takaja schiema praduhledžvaje, što kiraŭnik moža biaspłatna atrymać akcyi, kali dasiahnie vyznačanych finansavych pakazčykaŭ.
U vypadku Kohana ŭmova nastupnaja: za piać hadoŭ jon pavinien padvoić košt akcyj svajoj kampanii. Tolki tady zmoža skarystacca pravami na ich atrymańnie. Kali jamu heta ŭdasca, patencyjnaja ŭznaharoda pieravysić $35 miljonaŭ.
Novuju schiemu apłaty pracy Kohana jašče pavinny ŭchvalić akcyjaniery kampanii. Pavodle apublikavanaha kampanijaj paviedamleńnia, pazačarhovy schod zapłanavany na 22 kastryčnika 2026 hoda.
Sam Kohan tłumačyć svaju ideju žadańniem zrabić tak, kab jaho asabisty finansavy pośpiech niepasredna zaležaŭ ad pośpiechu inviestaraŭ.
Naradziŭsia ŭ Babrujsku, vyras u Aŭstralii
Rusłan Kohan naradziŭsia ŭ 1982 hodzie ŭ Babrujsku. U červieni 1989 hoda chłopiec razam z baćkami i siastroj Śviatłanaj emihravaŭ u Aŭstraliju.
Baćka, jaki na radzimie pracavaŭ inžynieram i kiravaŭ bujnymi prajektami, vymušany byŭ razvozić picu, handlavać na rynku i pracavać na fabrycy hubak. Maci, jakaja mieła miedycynskuju adukacyju, prybirała kaviarni i pracavała aficyjantkaj.
Siamja pryjechała ŭ Aŭstraliju ŭsiaho z $90 i amal bieź viedańnia anhlijskaj movy. Spačatku Kohany spynilisia ŭ svajakoŭ u Mielburnie, a paźniej atrymali kvateru ŭ sacyjalnym žylli ŭ adnym z pryharadaŭ horada.
Jašče ŭ dziacinstvie Rusłan zachapiŭsia technikaj i pradprymalnictvam. U dzieviać hadoŭ jon sabraŭ svoj pieršy kampjutar ź niedarahich detalaŭ, a taksama pačaŭ zarablać na prodažy zhublenych miačykaŭ dla holfa. Chłopčyk źbiraŭ ich na miascovym poli, myŭ, raskładvaŭ va ŭpakoŭki ad jajek i pradavaŭ hulcam pa 50 centaŭ. Za vychodnyja, pa jaho ŭłasnych słovach, atrymlivałasia zarabić da $14, jakija pieravažna tracilisia na prysmaki.
U 2004 hodzie Kohan skončyŭ Univiersitet Monaša pa śpiecyjalnaści «biznes-sistemy». Paśla pracavaŭ u Bosch, General Electric, Telstra i kansałtynhavaj kampanii Accenture.
Ale ŭ 2006 hodzie, va ŭzroście 23 hadoŭ, chłopiec pakinuŭ stabilnuju pracu i zasnavaŭ u baćkoŭskim haražy internet-kramu. Jak zhadvaje Rusłan, jaho maci vielmi zasmuciłasia, kali jon vyrašyŭ pakinuć stabilnuju pracu i zaniacca ŭłasnym biznesam. Da taho momantu syn išoŭ mienavita tym žyćciovym šlacham, jakoha jana dla jaho žadała.
Kohan vyrašyŭ pradavać techniku praź internet, zakuplajučy jaje niepasredna ŭ vytvorcaŭ. Heta dazvalała abychodzicca biez vydatkaŭ na ŭtrymańnie zvyčajnych kramaŭ i prapanoŭvać pakupnikam nižejšyja ceny. Pačaŭ jon z prodažu ŭsiaho dźviuch madelaŭ LCD-televizaraŭ.
Biznes chutka ros. Na treci hod pracy prodažy Kogan.com dasiahnuli $2,1 miljona, na piaty — $15 miljonaŭ, a na siomy pieravysili $138 miljonaŭ. U 2011—2012 hadach Rusłana Kohana nazyvali samym bahatym čałaviekam Aŭstralii va ŭzroście da 30 hadoŭ. U 2016 hodzie jaho kampanija vyjšła na Aŭstralijskuju fondavuju biržu.
Siońnia heta ŭžo nie prosta internet-krama elektroniki, a hrupa handlovych i ličbavych servisaŭ. Jana pracuje z roznymi katehoryjami tavaraŭ i prapanuje pasłuhi ŭ śfiery mabilnaj suviazi, internetu, strachavańnia i inšych napramkach. U finansavym hodzie, jaki zaviaršyŭsia 30 červienia 2026 hoda, vałavy abjom prodažaŭ hrupy pieravysiŭ $690 miljonaŭ — na 12% bolš, čym hodam raniej.
Rusłan Kohan žyvie ŭ Mielburnie z žonkaj Nastaśsiaj. U pary troje dziaciej: dźvie dački i syn.
Niahledziačy na šmatmiljonny kapitał, Kohan nie lubić tracić lišnija hrošy. Niadaŭna jon apublikavaŭ u LinkedIn videa z haściničnaj vannaj, u jakoj sam myŭ svaje rečy.
«Ja prosta nie mahu prymusić siabie zapłacić $20 za myćcio futbołki, jakaja kaštuje $10», — patłumačyŭ biznesmien.
Svaju aščadnaść jon źviazvaje ź dziacinstvam i baćkami, jakim paśla pierajezdu ź Biełarusi davodziłasia ličyć kožny dalar.
Pry hetym, jak pryznaŭsia Kohan, navat paśla naviedvańnia darahich restaranaŭ najbolš jon sumuje pa chatniaj ježy svajoj maci Iryny. Jaho lubimyja stravy — kuryny sup, katlety, hrečka, aliŭje i naliśniki, jakija jana hatuje.
Małodšy syn Sachaščyka abvieščany źnikłym bieź viestak. Vyhladaje, jon vajavaŭ za Rasiju88
Kamientary