Połackaje pradpryjemstva vypuskaje «pravieranyja ŭ bajavych umovach» broniekamizelki ZoV
Połackaje pradpryjemstva «POŁSPO» vyrablaje modulnyja broniekamizelki pad nazvaj ZoV, jakija pradajucca i na rasijskim rynku. Rasijski sajt, što handluje hetaj pradukcyjaj, rekłamuje kamplekt jak «pravierany ŭ bajavych umovach» i spasyłajecca na vodhuk padraździaleńnia bieśpiłotnikaŭ raźviedvalna-šturmavoj bryhady, piša «Biełsat».
Na broniekamizelki źviarnuli ŭvahu karystalniki Threads. Pradukcyja ZoV sapraŭdy pradstaŭlenaja ŭ katałohu na aficyjnym sajcie «POŁSPO». Pavodle apisańnia vytvorcy, kamizelka pryznačanaja dla abarony ad ahniastrelnaj zbroi i askiepkaŭ, a taksama dla źmianšeńnia kantuzijnych traŭmaŭ, jakija mohuć uźnikać pry ŭdary kuli ab bronieplitu.
Kieramičnyja braniavyja paneli kamizelki, jak śćviardžajecca, zabiaśpiečvajuć abaronu žyćciova važnych orhanaŭ pavodle kłasa Br5. Sam vytvorca nie tłumačyć pachodžańnie nazvy ZoV, adnak spałučeńnie litar Z i V šyroka vykarystoŭvajecca jak simvolika rasijskaj vajny suprać Ukrainy.
U Rasii broniekamizelku pradajuć praz sajt polspo-russia.ru. Na im paznačanyja kantakty ŭ Sankt-Pieciarburhu i adras vytvorčaści ŭ Połacku. Pry hetym sajt jurydyčna aformleny na rasijskaha indyvidualnaha pradprymalnika.
Kamplekt ZoV uklučaje samu broniekamizelku, braniaplity Br5 vytvorčaści «POŁSPO», achoŭny pojas, abaronu pachu i nabor padsumkaŭ. Pradaviec śćviardžaje, što vyrab prajšoŭ vyprabavańni ŭ bajavych umovach. U jakaści paćviardžeńnia pryvodzicca vodhuk padraździaleńnia bieśpiłotnikaŭ, bajcy jakoha paśla praciahłaha vykarystańnia ŭ składanych palavych umovach nibyta nazvali kamizelku adnoj z najlepšych u svaim kłasie.
Na rasijskim sajcie taksama paznačana, što kamplekt siertyfikavany pavodle rasijskaha standartu DAST 34286-2017, a vytvorčaść adpaviadaje techničnym umovam BY 391615915.016-2022, zarehistravanym u 2022 hodzie. Košt broniekamizelki składaje 115 tysiač rasijskich rubloŭ — kala 1400 dalaraŭ.
Supracoŭnictva «POŁSPO» z rasijskim rynkam viadomaje ŭžo niekalki hadoŭ. U kastryčniku 2022 hoda rajonnaja hazieta «Połacki vieśnik» paviedamlała, što amal pałova pradukcyi pradpryjemstva vykarystoŭvajecca ŭ Biełarusi i Rasii, a balistyčnyja vyprabavańni pravodziacca ŭ rasijskim siertyfikacyjnym centry. Pavodle infarmacyi vydańnia, braniavuju abaronu z Połacka vykarystoŭvajuć biełaruskija ŭnutranyja vojski, armija, Śledčy kamitet, Słužba biaśpieki Łukašenki i KDB.
Na samim pradpryjemstvie broniekamizelku ZoV nazyvajuć adnym sa svaich hałoŭnych dasiahnieńniaŭ. U 2024 hodzie supracoŭnik «POŁSPO» Alaksandr Skaradzionak raskazvaŭ vydańniu «SB. Biełaruś siehodnia», što vyrab maje najvyšejšy kłas abarony i źjaŭlajecca navinkaj dla biełaruskaha rynku.
Siarod pieravah kamizelki jon adznačaŭ modulnuju kanstrukcyju: kamplekt možna dapoŭnić abaronaj pachu, kaŭniarom i naplečnikami. Braniavyja paneli možna chutka vyniać i zamianić niepasredna ŭ palavych umovach, a samu kamizelku — skinuć adnym rucham ruki.
Ciapier čytajuć
Prabityja lohkija, razarvanaja piečań i seks z małaletniaj: što adbyvajecca ŭnutry biełaruskaj milicyi i jak načalstva heta chavaje13
Prabityja lohkija, razarvanaja piečań i seks z małaletniaj: što adbyvajecca ŭnutry biełaruskaj milicyi i jak načalstva heta chavaje
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju44
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju4
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im1414
Kamientary
Napomniło staruju riekłamu motošlema firmy Arai: "Harantirujem pochorony v otkrytom hrobu"