«Kačanava — adkaznaja». Łukašenka zahadaŭ puścić tramvaj z Navapołacka ŭ Połack
Alaksandr Łukašenka padtrymaŭ prapanovu złučyć Połack i Navapołack tramvajnymi šlachami. Jon daručyŭ praličyć košt prajekta i vyznačyć terminy jaho realizacyi. Pra heta palityk zajaviŭ 23 kastryčnika padčas naviedvańnia chołdynha «Biełkamunmaš» u Minsku.
Ź inicyjatyvaj mižharadskoha tramvajnaha złučeńnia vystupiła staršynia Savieta Respubliki Natalla Kačanava. Pavodle jaje słoŭ, treba praciahnuć tramvajnyja rejki z Navapołacka da Połacka, kab žychary mahli jeździć pamiž haradami, u tym liku supracoŭniki pradpryjemstva «Naftan».
Dla realizacyi prajekta spatrebicca prakłaści jašče kala 10 kiłamietraŭ tramvajnych rejek.
«Dobra, davajcie złučać. Heta niašmat. Treba zapłanavać heta i zrabić, pakul možna. Ale dakładna vyznačyć: voś takija terminy, voś heta zrabić. Kačanava — adkaznaja», — zajaviŭ Łukašenka.
Jon dadaŭ, što kali prajekt patrebny, jaho treba realizavać chutka, a nieabchodnyja srodki padličyć.
Taksama Łukašenka vykazaŭsia za bolš šyrokaje vykarystańnie tramvajaŭ u sistemie hramadskaha transpartu Biełarusi. Ciapier tramvajnaje złučeńnie, jašče z savieckich časoŭ, dziejničaje tolki ŭ čatyroch haradach krainy: Minsku, Viciebsku, Mazyry i Navapołacku. Pa słovach Łukašenki, kali hety vid transpartu maje pierśpiektyvy, jaho raźvićcio buduć pastupova pašyrać.
Akramia taho, jon zhadaŭ pra nieabchodnaść naładzić chutkaje i zručnaje transpartnaje złučeńnie pamiž Minskam i haradami-spadarožnikami. Niekatoryja ź ich pakul nie majuć čyhunačnaj suviazi sa stalicaj. Dla złučeńnia takich nasielenych punktaŭ taksama mohuć vykarystoŭvacca tramvai.
Varta adznačyć, što pra patrebu chutkasnaha tramvaja ź Minska, naprykład, u horad-spadarožnik Łahojsk havorka viadziecca ŭžo amal dva dziesiacihodździ, u tym liku i na ŭzroŭni Łukašenki, ale nijakich praktyčnych vynikaŭ heta pakul nikoli nie mieła.
Kamientary