«Vy vasał Maskvy». Biełaruś pierastajuć bačyć asobna ad Rasii

Spadarstva, u mianie dla vas dźvie naviny, dobraja i kiepskaja. Kiepskaja: my ŭ hłybokaj dupie. Dobraja: nas usie lubiać. Z hetaj dumkaj ja pakidaŭ štohadovuju kanfierencyju Polska Polityka Wschodnia pad Urocłavam.

Pamiataju, jak 20 hod tamu palityki, dypłamaty, ekśpierty razmaŭlali tam pra Biełaruś. My byli pieršaj temaj, pra Biełaruś spračalisia. Sioleta biełaruskaja tema zakryvała kanfierencyju ŭ apošni dzień, kali mała chto zmoh dabyć da kanca.

Byŭ čas, kali pra Biełaruś chacieli nie prosta słuchać, ale i staralisia pačuć. Naša tema była na pieršych staronkach haziet, Biełaruś była častkaj razmovy pra budučyniu Jeŭropy. Hety čas minuŭ. «5 chvilin» dla Biełarusi skončylisia. Nam nie škadujuć pryjemnych słovaŭ, bo pra biełarusaŭ prosta nie pryniata kazać kiepska. Ale nichto nie źbirajecca za nas pamirać.

Kali pačynałasia kanfierencyja, my z kaleham prydumali hulniu: chto pieršym pačuje słova Biełaruś. Heta było pryblizna na druhoj hadzinie adnym vyrazam — «my nie možam zabyvać pra Biełaruś». Za try dni pra jaje zhadali moža dva razy.

Ale bolš važna toje, jak pra Biełaruś havaryli. Biełaruś usprymajuć jak dadatak da Rasii. Z ahavorkami, niuansami, vybačeńniami, ale ličać Biełaruś poŭnym vasałam Maskvy. Rasijskija vojski. Rasijskaja jadziernaja zbroja. Rasijskija vajskovyja intaresy. Łukašenka, zaležny ad Pucina. Miaža z Polščaj i Litvoj. Mihranty. Drony. Vajna va Ukrainie.

Biełaruś pastupova źnikaje jak samastojnaja palityčnaja prablema. Heta, mahčyma, adna z samych niebiaśpiečnych rečaŭ, jakija adbylisia ź Biełaruśsiu za apošnija hady.

Chiba nie pra takuju «niezaležnaść» maryli tyja, chto hadami paŭtaraŭ mantru, što Łukašenka — jaje harant? Što ž, majecie. Kali Łukašenka byŭ patrebny, kab zachavać niezaležnaść, to voś vynik: śviet usio čaściej pierastaje bačyć Biełaruś asobna ad Rasii.

Našu krainu prosta pierastajuć usprymać jak subjekt, pierastajuć šukać i asobnuju palityku adnosna jaje. I heta my kažam pra Polšču, krainu, jakaja lepš čym chto razumieje Biełaruś u hetym śviecie.

Pryblizna toje ž kažuć i niemcy: u niamieckaj dyskusii Biełaruś fihuruje pieravažna jak vajskovy sajuźnik Rasiei i krynica hibrydnaj pahrozy praź mihracyjny kryzis na miežach. Časam zhadvajuć Łukašenku — «aproč hetaha, ničoha».

Uražańnie paśla niekalkich dzion razmoŭ było niepryjemnaje. Užo paśla zakančeńnia ja napisaŭ byłomu polskamu pasłu ŭ Minsku pytańnie, što pavodle jaho było cikavym pra Biełaruś na hetaj sustrečy. «Kali b nie vaša pytańnie, nichto b pra jaje tam navat nie zhadaŭ». Pra Biełaruś zhadali pry niejkaj drabiazie.

Havorka była pra majo ścipłaje pytańnie ŭdzielnikam kanfierencyi, čamu Polšča vydaje biełarusam mała vizaŭ, čamu pavolna vydajucca karty pobytu, čamu ŭ biełarusaŭ jość prablemy ŭ bankach. Adkaz byŭ prosty — vy vasał Maskvy, a my musim dbać pra biaśpieku. 

Biełaruskaja demakratyčnaja supolnaść atrymała paśla 2020 hodu biesprecedentny mižnarodny palityčny kapitał. Ale značnaja častka jaje hulcoŭ vydatkoŭvaje ciapier palityčnuju enierhiju na samich siabie: chto kaho pradstaŭlaje, chto bolš lehitymny i chto z kim pasvaryŭsia.

Heta sapraŭdnaja paraza apošnich hadoŭ. Nie toje, što pra Biełaruś stali mienš pisać. A toje, što inšyja pastupova pierastajuć ujaŭlać Biełaruś biez Rasii. I heta kiepskaja navina nie tolki dla demsiłaŭ, ale i dla režymu, jaki zaciahnuŭ krainu ŭ takoje bałota, adkul cełym jon užo nie vyjdzie.

* * *

Teksty ŭ rubrycy «Mierkavańni» mohuć supadać, a mohuć i nie supadać z pazicyjaj Redakcyi.

• 21
• 0
• 8
• 0
• 1
• 19
• 1
• 0