Pamierła Taćciana Pranovič — vykładčyca žurfaka BDU i dačka Ivana Čyhrynava

Pamierła dačka piśmieńnika Ivana Čyhrynava — vykładčyka žurfaka BDU Taćciana Pranovič. Joj było 67 hadoŭ.

U 1976‑1981 hadach vučyłasia ŭ BDU. Z 1984 hoda pracavała staršym vykładčykam kafiedry zamiežnaj žurnalistyki i litaratury Instytuta žurnalistyki BDU. Jaje zachapleńniem była antyčnaja litaratura.

«Samaja pieršaja natatka była faktyčna pradyktavanaja mnie maim baćkam. My pajechali ź im u Viazynku na narodnaje śviata paezii. Ja i sama mahła b apisać svaje ŭražańni, ale taty zaŭsiody dumajuć, što zrobiać heta lepš. Tamu maja pieršaja publikacyja mieła svaju śpiecyfiku», — zhadvała jana ŭ adnym ź intervju.

«Ja vielmi chacieła pracavać u žurnalistycy, — kazała Pranovič. — Tamu, kali maja adnakurśnica Alena Filipčyk u 1994 hodzie stvaryła hazietu «Pierachodny ŭzrost», ja z zadavalnieńniem pryjšła tudy. Spačatku pracavała styl-redaktaram, a ŭ 1998 hodzie stała namieśnikam redaktara. … Ale viedajecie, «Pierachodny ŭzrost» daŭ mnie ŭsio, čaho mnie nie chapała. Ja prychodziła na pieršy kurs žurfaka: sa 150 studentaŭ 100 užo viedali mianie jak namieśnika redaktara «Pierachodnaha ŭzrostu». U toj čas ja adčuvała, jak kipić kacioł maładości, i sama ŭ im varylisia».

U 2020 hodzie Taćciana Pranovič padtrymała pratesty.

Praź niekalki hadoŭ vykładčyca pakinuła žurfak.

«Na adnym sa studenckich kapuśnikaŭ ja śpiavaŭ «Vočy čornyja» z pryśviačeńniem Taćcianie Ivanaŭnie Pranovič. Na kapuśnikach nam dazvalalisia volnaści. Na słovach «Kak lublu ja vas, kak bojuś ja vas» zała vybuchnuła śmiecham. Taćciana Ivanaŭna taksama śmiajałasia. My jaje vielmi lubili — za fantastyčnyja lekcyi, kali jana vychodziła ŭ centr aŭdytoryi, šyroka rasstaŭlała ruki, dekłamavała vieršy», — uspaminaje ŭ fejsbuku Dźmitryj Nikanovič.

«I było vielmi važna adčuvać, što ŭ 2020 hodzie my z Taćcianaj Ivanaŭnaj na adnym baku.«U mienia ukrali hołos, u mienia ukrali podpiś» — słovy, jakija zavirusilisia z adnaho videa z pratestaŭ va ŭnutranym dvoryku BDU. I było pryjemna paznać Taćcianu Ivanaŭnu, jakaja pramaŭlała hetyja słovy z hodnaściu i svajoj šykoŭnaj lektarskaj padačaj.Paśla jaje zdaroŭje mocna pahoršyłasia. Taćciana Ivanaŭna chadziła z pałačkaj, pracavała, kali nie pamylajusia, užo na pałovu staŭki, pieravažna z kitajskimi studentami.Nie zabudu, jak u 2021 hodzie na śviatkavańni 100‑hodździa BDU my pryjšli ŭ zału na ŭračystaść, a Taćcianie Ivanaŭnie tak i nie ŭručyli jubilejnaha znaka. Heta było tak krasamoŭna podła», — raskazvaje Dźmitryj Nikanovič.

Nastaśsia Zańko ŭ fejsbuku ŭspaminaje, jak u 2020‑m jana hladzieła strym z marša piensijanieraŭ. «I baču — Taćciana Ivanaŭna tam. Da jaje padychodziać viadučyja strymu, jana pahadžajecca pahavaryć i kaža niešta nakštałt taho, što ŭdzielnčiaje ŭ maršy, bo nie choča pakidać unukam takuju krainu, što choča papravić usie tyja pamyłki, jakija dapuściła ich pakaleńnie. Śvietłaja pamiać vam, Taćciana Ivanaŭna… Vielmi škada, što vy nie dažyli da momantu Novaj Biełarusi», — piša Zańko.

• 1
• 0
• 0
• 1
• 0
• 19
• 0
• 0