Aftalmołah raskazaŭ, pra jakuju niebiaśpieku papiaredžvajuć «muški» pierad vačyma

Pa słovach doktara, «muški», asabliva prykmietnyja na śvietłym fonie, časta źjaŭlajucca ŭzrostavaj źmienaj, źviazanaj z destrukcyjaj škłopadobnaha cieła voka. Jaho vałokny mohuć źmianiać strukturu, źlipacca i ŭtvarać nievialikija pamutnieńni.

Zvyčajna jany nie niasuć niebiaśpieki. Kali kolkaść takich «mušak» hadami nie źmianiajecca, to padstaŭ dla terminovaha zvarotu da doktara niama. Adnak praz stomlenaść jany mohuć stanavicca bolš prykmietnymi.

Inšaja situacyja ŭźnikaje pry raptoŭnym adsłajeńni škłopadobnaha cieła ad siatčatki. U takim vypadku čałaviek moža niečakana zaŭvažyć bujnoje pamutnieńnie ŭ centry pola zroku. Jano nie abaviazkova maje formu zvyčajnaha kolca Viejsa: moža być S-padobnym, liniejnym, častkovym abo nahadvać vialiki šar.

Pry hetym niaredka źjaŭlajucca ŭspyški, iskry abo małanki pierad vačyma. Takija źjavy mohuć śviedčyć pra naciažeńnie siatčatki. Pryblizna ŭ 14% vypadkaŭ padčas adsłajeńnia škłopadobnaha cieła ŭźnikaje razryŭ siatčatki. Ryzyka ŭskładnieńnia pavialičvajecca, kali adnačasova paharšajecca zrok abo adbyvajecca krovaźlićcio ŭ škłopadobnaje cieła.

Aftalmołah nazvaŭ niekalki tryvožnych simptomaŭ, pry źjaŭleńni jakich nieabchodna źviarnucca da śpiecyjalista na praciahu dnia. Da ich naležać raptoŭnaje i rezkaje pavieličeńnie kolkaści «mušak», źjaŭleńnie bujnych pamutnieńniaŭ, padobnych da kolca, vobłaka abo zasłony, častyja ci pastajannyja ŭspyški i małanki pierad vačyma.

Asablivuju ŭvahu treba źviarnuć na cień abo zasłonu zboku, jakaja nibyta zakryvaje častku pola zroku, a taksama na raptoŭnaje paharšeńnie zroku ci skažeńnie abrysaŭ pradmietaŭ.

Kali ŭspyški ŭźnikajuć adrazu ŭ abodvuch vačach i supravadžajucca hałavakružeńniem, dvajeńniem u vačach, słabaściu abo parušeńniem maŭleńnia, pryčyna moža być nie ŭ samich vačach, a ŭ nieŭrałahičnym parušeńni. Takija simptomy patrabujuć nieadkładnaj miedycynskaj acenki.

Dla vyjaŭleńnia mahčymych paškodžańniaŭ siatčatki nieabchodny ahlad vočnaha dna z pašyranaj zrenkaj. Lekar zakapvaje śpiecyjalnyja kropli, paśla čaho daśleduje pieryfieryčnyja ŭčastki siatčatki z dapamohaj śpiecyjalnych linzaŭ. Pracedura biazbolnaja.

Pa słovach Vadzima Muraški, kali razryŭ siatčatki vyjavić svoječasova, jaho časta možna zalačyć łazieram i takim čynam nie dapuścić adsłajeńnia siatčatki.

• 10
• 0
• 0
• 0
• 2
• 1
• 0
• 0