U Šviejcaryi ŭžo bolš za miesiac jak źnikła siastra dvuch byłych biełaruskich palitviaźniaŭ
Užo bolš za miesiac nie vychodzić na suviaź z rodnymi 27‑hadovaja Łuiza Pipija — hramadzianka Biełarusi, jakaja žyvie ŭ Šviejcaryi. Pra heta vydańniu «Lusterka» paviedamiŭ jaje brat Tamaz.
Braty Łuizy — byłyja palitviaźni Cimur i Tamaz Pipija. Ich zatrymali ŭ vieraśni 2020 hoda i asudzili pa kryminalnych artykułach, źviazanych z «masavymi biesparadkami» (Cimura taksama za «hvałt albo pahrozu prymianieńnia hvałtu ŭ dačynieńni da supracoŭnika orhanaŭ unutranych spraŭ»). Mužčyny vyzvalilisia viasnoj 2026 hoda i pakinuli Biełaruś.
Łuiza źjechała z krainy raniej. Pa słovach Tamaza, pryčynaj byŭ cisk z boku siłavikoŭ.
U 2022 hodzie jana nakiravałasia ŭ Hruziju, a paźniej — u Šviejcaryju, adkul rodam jaje muž. Tam ža ŭ jaje naradziŭsia syn Michaił. Siamja žyła ŭ horadzie Sankt-Halen.
Pa słovach Tamaza, jany ź siastroj byli ŭ dobrych adnosinach i padtrymlivali suviaź. Adnak 23 vieraśnia 2026 hoda jana niečakana nie adkazała na paviedamleńnie ŭ Telegram. Zvanki taksama zastalisia biez adkazu.
«Z taho momantu jana nie vychodzić na suviaź ni sa mnoj, ni z kim-niebudź jašče, — raspavioŭ były palitviazień. — Jana nie adkazvaje ni praz sotavy telefon, ni ŭ sacsietkach. Nikomu nie adkazvaje, ničyje historyi navat banalna nie prahladaje. Ja ŭžo nie viedaju, što dumać».
Pa słovach Tamaza, z mužam Łuizy taksama niemahčyma źviazacca. Z tymi znajomymi, da jakich udałosia dastukacca, jana mieć znosiny pierastała. Surazmoŭca kaža, što «pierabraŭ užo ŭsie mahčymyja varyjanty».
Ci mahła žančyna viarnucca ŭ Biełaruś?
«Tearetyčna ja ŭžo heta razhladaju. Ale praktyčna — heta byŭ by aryšt adrazu ŭ aeraporcie, heta zrazumieła. Jana heta viedaje», — kaža jon.
Pajechać na pošuki Łuizy dla bratoŭ zaraz prablematyčna. Jany ŭžo niekalki miesiacaŭ znachodziacca ŭ Litvie ŭ čakańni afarmleńnia dakumientaŭ i nie mohuć pakidać krainu, pakul sprava na razhladzie. Šukać ža siastru ŭ Biełarusi — jašče składaniej, bo abodvuch bratoŭ paśla vyzvaleńnia i adjezdu ŭnieśli ŭ bazu vyšuku.
«Ja ŭ kałonii byŭ bolš volny». Były palitviazień Tamaz Pipija raskazaŭ pra 6 hadoŭ za kratami i novuju paranaidalnuju biełaruskuju realnaść
«Hubazikaŭcy mnie ŭ vočy kazali, što zabili Kryŭcova». Fanat MTZ Pipija — pra bojki, katavańni i čałaviečnaść
Byłoha palitviaźnia Cimura Pipiju abjavili ŭ vyšuk
Vyjšaŭ na svabodu palitźniavoleny fanat Cimur Pipija
Stała viadoma pra vyzvaleńnie palitźniavolenaha fanata Tamaza Pipii
Ciapier čytajuć
Trahiedyja z 30‑hadovaj doktarkaj sa Starobina — pajšła vydalać zub mudraści i pamierła14
Kamientary