Pieradadzieny Polščaj u Biełaruś u ramkach abmienu ahient Nadziejka paviedamlaŭ KDB proźviščy ŭdzielnikaŭ «Paspalitaha rušeńnia»
Z supracoŭnikami KDB Nadziejka sustrakaŭsia ŭ Budapiešcie, dzie biełaruskija i rasijskija śpiecsłužby pačuvalisia ŭ biaśpiecy.
Padrabiaznaści supracoŭnictva z Kamitetam dziaržbiaśpieki hramadzianina Biełarusi Uładzisłava Nadziejki paviedamiŭ u repartažy «Nowa zimna wojna» («Novaja chałodnaja vajna») uviečary 25 kastryčnika polski telekanał TVP, piša «Pozirk».
U repartažy raskazali, što Nadziejka pierajechaŭ u Polšču z Hrodna paśla padziej 2020 hoda. Pražyvaŭ u Biełastoku, «špijonskuju dziejnaść» ažyćciaŭlaŭ, maskirujučysia pad kiroŭcu taksi.
Znajomaja mužčyny na ŭmovach ananimnaści paviedamiła aŭtaram repartažu, što paśla razmovaŭ z Nadziejkam da jaje baćki ŭ Biełarusi prychodzili supracoŭniki KDB. «Jany viedali pra mianie ŭsio. Što ja była vałancioram, što była ŭ pałku (vierahodna, havorka pra Połk Kalinoŭskaha. — «Pozirk»)», — skazała jana.
«U jaho była lehienda, što jon taki biedny taksist, u jaho naohuł niama hrošaj. Bačna było, jak jon pracuje — jon naohuł nie pracuje», — adznačyła jana, padkreśliŭšy, što ład žyćcia Nadziejki ŭkazvaŭ na niemałyja vydatki: na arendu aŭtamabila taksi, kvatery, «ałkahol kožny dzień, narkotyki».
«Jon kazaŭ, što raniej zajmaŭsia kantrabandaj cyharet. Kazaŭ, što maje stolki hrošaj, što chopić da kanca žyćcia», — paviedamiła žančyna.
U siužecie źviartajecca ŭvaha, što Nadziejka pražyvaŭ u Biełastoku ŭ «luksavych apartamientach u samym centry horada», za arandavanaje žyllo płaciŭ hatoŭkaj.
Budučy ŭdzielnikam «Paspalitaha rušeńnia» — spartyŭna-patryjatyčnaj arhanizacyi, jakaja zajmałasia ŭ Polščy fizičnaj i militarnaj padrychtoŭkaj biełarusaŭ (spyniła dziejnaść u žniŭni 2025-ha) — mužčyna pieradavaŭ KDB proźviščy jaje členaŭ, adznačajecca ŭ repartažy.
Paviedamlajecca, što z supracoŭnikami KDB Nadziejka sustrakaŭsia ŭ Budapiešcie, dzie ŭ časy praŭleńnia premjer-ministra Viktara Orbana biełaruskija i rasijskija śpiecsłužby pačuvalisia ŭ biaśpiecy.
Taksama ŭ siužecie paviedamlajecca, što z KDB supracoŭničaŭ były namieśnik dyrektara Słužby infarmacyi i biaśpieki (SIB) Małdovy Alaksandr Bałan, zatrymany ŭ vieraśni 2025 u Rumynii. Miescam ich sustreč taksama byŭ Budapiešt, nazvanyja supracoŭniki biełaruskaj śpiecsłužby, jakija pryjazdžali tudy na aŭtamabili — Uładzimir Varažbitaŭ, Uładzimir Jarmak i Mikałaj Dukšta.
Ab zatrymańni Nadziejki i źmiaščeńni jaho pad vartu na try miesiacy 10 vieraśnia 2025 hoda paviedamiła Ahienctva ŭnutranaj biaśpieki Polščy (AUB). Adznačałasia, što jon ažyćciaŭlaŭ vyviedvalnuju dziejnaść na terytoryi Polščy i Vienhryi, a zatrymańnie biełarusa stała vynikam «praciahłaj apieracyi, praviedzienaj AUB sumiesna z češskimi, vienhierskimi, rumynskimi i małdaŭskimi śpiecsłužbami».
23 vieraśnia 2025 hoda paviedamlałasia, što va Uładzisłava Nadziejki znojdzieny śpis suajčyńnikaŭ, jakija atrymali ŭ Polščy prytułak. Adznačałasia, što na zamovu KDB Biełarusi mužčyna sačyŭ za fihurantami śpisu, źbiraŭ na ich daśje i pieradavaŭ u Minsk.
Ciapier čytajuć
Daradca prezidenta Polščy prakamientavaŭ zvarot Kaleśnikavaj i Zołatavaj: Łukašenka vypuskaje niekalki dziasiatkaŭ viaźniaŭ, a na nastupny dzień zatrymlivaje novych2323
Kamientary