Na «Pradmovie» ŭ Prazie i Varšavie prezientujuć antałohiju «Pakaleńnie Čarnobyla»
Da 40‑hodździa avaryi na ČAES vydaviectva «Pflaŭmbaŭm» vypuskaje antałohiju tekstaŭ «dziaciej Čarnobyla».
Układalnicy knihi «Pakaleńnie Čarnobyla / Pokolińnia Čornobila» — biełaruskaja piśmieńnica Volha Kaściuk i ŭkrainskaja daśledčyca kultury, kuratarka i piśmieńnica Kataryna Batanava, piša bellit.info.
Zbornik abjadnaŭ mastackija i publicystyčnyja teksty. Dziakujučy antałohii čytački i čytačy mohuć pahladzieć na čarnobylskuju katastrofu z roznych pierśpiektyŭ i z dvuch bakoŭ miažy. Biełaruskija teksty adbiralisia praz open call, na jaho było dasłana 42 prapanovy. Niekatoryja aŭtarki publikujucca pad psieŭdanimami: heta znak času i palityčnaha kryzisu ŭ rehijonie.
Aŭtarki, teksty jakich vy znojdziecie ŭ antałohii: Jula Arciomava, Tania Arcimovič, Volha Bubič, Volha Vałoškina, Volha Hapiejeva, Jarina Hruša, Tamara Hundorava, Volha Jermałajeva Franko, Jula Kasač, Toni Łašden, Stefa Lisoŭskaja, Maryja Litvin, Łusine, Ksienija Maj, Śvitłana Matvijenko, Olesia Ostrovśka-Luta, Lesia Pčołka, Julija Ružečka, Oksana Siemienik, Kasia Čekatoŭskaja.
Pieršyja prezientacyi antałohii «Pakaleńnie Čarnobyla / Pokolińnia Čornobila» projduć padčas fiestyvalaŭ intelektualnaj knihi PRADMOVA ŭ Prazie 1 listapada i ŭ Varšavie 13—15 listapada.
Tak u Prazie (Čechija) u razmovie voźmuć udzieł niekalki aŭtarak zbornika. Praź litaraturu, asabistyja historyi i ŭspaminy piśmieńnicy i maderatar pasprabujuć pahavaryć pra Čarnobyl jak pra dośvied, jaki praciahvaje farmavać pamiać, identyčnaść i ŭjaŭleńnie pra budučyniu ŭ Biełarusi i Ukrainie.
Udzielničajuć: Volha Hapiejeva, Łusine, Siarhiej Šupa.
1 listapada, 11:45—12:30
Placoŭka A, U Lužického semináře 13, Praha 1
Kamientary