U Kitai pakryŭdzilisia na Kilijana Mbape, jaki nazvaŭ Mao Dzeduna dyktataram

Mbape byŭ vymušany vybačycca za «nieabdumanyja» vykazvańni pra eks-lidara krainy. Vybačyłasia i kiraŭnictva Ła Lihi — vyšejšaha dyvizijona ispanskaha futboła, piša Bi-bi-si.

«Moj kamientar byŭ nieabdumanym. Ciapier ja razumieju, što jon zakranuŭ šmat ludziej — jak u samim Kitai, tak i ŭ kitajskich supolnaściach pa ŭsim śviecie. Prynošu prabačeńni ŭsim, kaho mahli zasmucić maje słovy», — havorycca ŭ zajavie Mbape.

Videa, što raspaŭsiudziłasia ŭ sietcy, — zapis efiru francuzskaha tok-šou The Bridge, hościem jakoha byŭ Mbape. U razmovie ź viadučymi futbalist adhuknuŭsia pra miemy, u jakich jaho pakazvajuć dyktataram.

Mbape skazaŭ, što bolš za ŭsio jaho raśśmiašyŭ toj miem, dzie jaho tvar nakładzieny na partret «niejkaha chłopca — zdajecca, kitajskaha dyktatara». «Ja pastajanna vykarystoŭvaju jaho ŭ kamunikacyi ź siabrami», — skazaŭ Mbape.

U efiry aŭtary prahramy pakazali hety miem. Na vyjavie tvar samoha futbalista nakładzieny na vyjavu, što nahadvaje Maa Czeduna.

Mbape pry hetym nie nazvaŭ Mao Dzeduna pa imieni, a aryhinalnaje videa hetaha vypusku tok-šou The Bridge užo vydalenaje z YouTube-kanała prahramy, adnak skrynšoty paśpieli razyścisia ŭ kitajskich sacyjalnych sietkach.

U Kitai lubyja žarty pra Mao ličacca prajavaj niepavahi i zastajucca svajho rodu hramadskim tabu.

«Naša kampanija rašuča vystupaje suprać lubych pavodzin, što abražajuć nacyjanalnyja pačućci, i prytrymlivajecca palityki absalutnaj nieciarpimaści da padobnych dziejańniaŭ. My nieadkładna spyniajem luboje supracoŭnictva z Kilijanam Mbape», — havorycca ŭ zajavie vytvorcy napojaŭ Dongpeng.

Kantrakt z Mbape razarvaŭ i Mengniu, najbujniejšy ŭ Kitai vytvorca małočnaj pradukcyi. «Mengniu rašuča vystupaje suprać lubych vykazvańniaŭ ci dziejańniaŭ, što zakranajuć pačućci kitajskaha naroda, i prytrymlivajecca palityki absalutnaj nieciarpimaści da padobnych prajaŭ», — zajavili ŭ kampanii.

Situacyju prakamientavała navat Ministerstva zamiežnych spraŭ Kitaja. Aficyjny pradstaŭnik viedamstva Liń Cziań zajaviŭ: «My źviarnuli ŭvahu na adpaviednyja paviedamleńni. Słovy i dziejańni, što zakranajuć pačućci kitajskaha naroda, zakanamierna sustrenuć adpor z boku ŭsich słajoŭ kitajskaha hramadstva».

Jak paviedamiła ŭ aŭtorak kitajskaje vydańnie The Paper, dziaržaŭnaja telekampanija CCTV vyrašyła prypynić tranślacyi matčaŭ ispanskaj Ła Lihi.

Ła Liha ŭžo pryniesła svaje prabačeńni, adznačyŭšy, što «hłyboka škaduje pra toje, što niadaŭnija vykazvańni Kilijana Mbape vyklikali niezadavolenaść siarod kitajskich zaŭziataraŭ».

Da hetaha incydentu Mbape karystaŭsia vializnaj papularnaściu siarod kitajskich zaŭziataraŭ: na jaho staronki ŭ sacyjalnych sietkach padpisanyja miljony čałaviek.

U Kitai Mbape łaskava nazyvajuć «Hujhuj», što ŭ pierakładzie aznačaje «čarapacha».

U sietcy Mbape časta paraŭnoŭvajuć z adnoj z Čarapašak-nindzia.

Futbalist atrymaŭ mianušku «čarapaška» niekalki hadoŭ tamu z padačy brazilskaha futbalista Tyjahu Siłvy, jaki padaryŭ Mbape masku Čarapaški-nindzia.

Padčas čempijanatu śvietu ŭ Kitai tranślavałasia rekłama, u jakoj z dapamohaj technałohij štučnaha intelektu była stvorana vyjava Mbape, jaki pje spartyŭny napoj brenda Dongpeng.

Paśla publikacyi videarolika z vykazvańniem Mbape ŭ sietcy chutka padniałasia chvala krytyki: karystalniki asudzili futbalista za toje, što jon «atrymlivaje prybytak ad kitajskaha rynku, ale pry hetym dazvalaje sabie vykazvańni, što abražajuć kitajskuju hramadskaść».

Mao — klučavaja palityčnaja fihura dla Kitaja ŭ XX stahodździ. Jon uznačalvaŭ Kamunistyčnuju partyju Kitaja i byŭ lidaram krainy — z momantu abviaščeńnia Kitajskaj Narodnaj Respubliki ŭ 1949 hodzie i až da svajoj śmierci ŭ 1976-m. Mao Dzedun inicyjavaŭ takija maštabnyja kampanii ŭ Kitai, jak Vialiki skačok i Kulturnaja revalucyja, jakija pieraŭtvaryli ekanomiku i hramadski ład krainy, ale pry hetym ich praviadzieńnie supravadžałasia vielizarnymi achviarami — miljony zahinuli ad hoładu i represij.

• 0
• 0
• 0
• 2
• 0
• 0
• 0
• 0