U Bałharyi nie zdoleli abrać prezidenta ŭ pieršym tury. Intryha zachoŭvajecca
U pieršym tury prezidenckich vybaraŭ u Bałharyi nivodzin z kandydataŭ nie nabraŭ absalutnaj bolšaści hałasoŭ. Druhi tur adbudziecca 1 listapada, piša «Jeŭrapiejskaja praŭda».
U Bałharyi paśla padliku 98,99% pratakołaŭ vybarčych kamisij vyznačylisia dva kandydaty, jakija buduć zmahacca ŭ druhim tury prezidenckich vybaraŭ 1 listapada. Heta Ilijana Jotava, jakaja ciapier časova vykonvaje abaviazki prezidenta, i były kiraŭnik urada Andrej Hiuraŭ, jaki vystupaje ŭ padtrymku Ukrainy.
Pavodle papiarednich vynikaŭ, Jotava nabrała 34,699% hałasoŭ, a Hiuraŭ — 31,984%. Roźnica pamiž imi składaje kala 2,72 pracentnaha punkta.
Zhodna z Kanstytucyjaj Bałharyi, kab pieramahčy ŭžo ŭ pieršym tury, kandydat pavinien atrymać bolš za pałovu sapraŭdnych hałasoŭ, a ŭ vybarach pavinny ŭziać udzieł bolš za pałovu vybarcaŭ, jakija majuć prava hołasu. Kali nivodzin kandydat nie vykonvaje hetyja ŭmovy, na praciahu siami dzion pravodzicca druhi tur z udziełam dvuch kandydataŭ, jakija nabrali najbolšuju kolkaść hałasoŭ.
Ilijana Jotava ličycca pramoj pierajemnicaj palityčnaha kursu ciapierašniaha prezidenta Rumiena Radzieva. Jana była jaho vice-prezidentkaj z momantu pačatku pieršaha prezidenckaha terminu ŭ 2017 hodzie. Jak adznačaje «Jeŭrapiejskaja praŭda», pieramoha Jotavaj moža pryvieści da taho, što siły Radzieva atrymajuć poŭny kantrol nad vykanaŭčaj i zakanadaŭčaj halinami ŭłady ŭ Bałharyi.
Andrej Hiuraŭ — były časovy premjer-ministr ź vialikim dośviedam u ekanomicy. Padčas svajho karotkaha znachodžańnia na čale ŭrada z 19 lutaha pa 8 maja 2026 hoda jon padpisaŭ pahadnieńnie ab supracoŭnictvie ŭ śfiery biaśpieki pamiž Bałharyjaj i Ukrainaj. Razam z hałoŭnym kamisaram Ministerstva ŭnutranych spraŭ Hieorhijem Kandzievym Hiuraŭ taksama ŭdzielničaŭ u arhanizacyi niadaŭnich parłamienckich vybaraŭ, jakija, pavodle acenki vydańnia, stali najbolš prazrystymi ŭ krainie za apošnija hady.
Hiuraŭ aktyŭna krytykuje ŭłady za dziejańni, jakija, na jaho dumku, supiarečać intaresam Ukrainy, asłablajuć adzinstva Jeŭrapiejskaha sajuza abo spryjajuć Rasii. Tamu pazicyja kandydataŭ adnosna vajny va Ukrainie i adnosin z Zachadam stała adnoj z važnych tem pieradvybarčaj kampanii.
Choć paŭnamoctvy bałharskaha prezidenta farmalna abmiežavanyja, kiraŭnik dziaržavy pradstaŭlaje krainu na mižnarodnaj arenie, za niekatorymi vyklučeńniami, i źjaŭlajecca viarchoŭnym hałoŭnakamandujučym.
Prezident taksama padpisvaje ŭkazy ab pryznačeńni hienieralnaha prakurora i kiraŭnikoŭ najvyšejšych sudoŭ, pryznačaje časovaha vykanaŭcu abaviazkaŭ premjer-ministra z abmiežavanaha koła asob, vyznačanaha Kanstytucyjaj, i maje prava vieta na zakony, pryniatyja parłamientam.
Bialacki: Nie treba śpiašacca admianiać sankcyi. Bo heta budzie ŭspryniata režymam jak jaho pieramoha i słabaść Jeŭropy15
Kamientary