Łukašenka: Biełarusy čakajuć źjaŭleńnia ŭ kramach manholskaha kašmiru

Pa vynikach pieramoŭ u pašyranym składzie Biełaruś i Manholija padpisali pakiet dvuchbakovych dakumientaŭ. U pryvatnaści, krainy ŭzhadnili darožnuju kartu raźvićcia supracoŭnictva na 2027—2029 hady.

Palityki taksama abmianialisia ratyfikacyjnymi hramatami Dahavora ab družalubnych adnosinach i supracoŭnictvie, jaki byŭ zaklučany padčas pieršaha vizitu Łukašenki ŭ Manholiju ŭ červieni 2024 hoda.

Baki padpisali darožnuju kartu supracoŭnictva ŭ sielskaj haspadarcy na 2027—2029 hady, a taksama pahadnieńni ab uzajemadziejańni ŭ mytnaj i infarmacyjnaj śfierach i ab mižrehijanalnym supracoŭnictvie.

Padčas pieramoŭ Łukašenka adznačyŭ mahčymaści dla pavieličeńnia ŭzajemnaha tavaraabarotu, jakija adkryvaje handlovaje pahadnieńnie pamiž Jeŭrazijskim ekanamičnym sajuzam i Manholijaj. Jano nabyło moc ŭ lipieni 2026 hoda.

Pavodle Łukašenki, biełaruskija spažyŭcy čakajuć źjaŭleńnia ŭ kramach manholskaha kašmiru, vyrabaŭ sa skury i voŭny, a taksama inšaj manholskaj pradukcyi.

Asobnaj temaj pieramoŭ stała supracoŭnictva ŭ sielskaj haspadarcy. Łukašenka nahadaŭ, što ŭ červieni ŭrady dźviuch krain damovilisia ab novych pastaŭkach biełaruskaj techniki ŭ Manholiju. Havorka idzie pra traktary, mašyny dla zboru bulby i kamianioŭ, a taksama zierniesušyłki.

Łukašenka taksama raskazaŭ pra płany stvarać u Manholii servisnyja centry i sumiesnyja vytvorčaści, a taksama raźvivać supracoŭnictva ŭ padrychtoŭcy kadraŭ. Raniej paviedamlałasia, što biełaruski vytvorca karjernych samazvałaŭ BiełAZ razhladaje mahčymaść zapusku ŭ Manholii zboračnaj vytvorčaści svajoj techniki.

Pa słovach ambasadara Biełarusi ŭ Manholii Michaiła Ordy, ciapier u krainie ekspłuatujecca kala 7,5 tysiačy biełaruskich traktaroŭ marki Belarus. Manholski bok taksama zacikaŭleny ŭ biełaruskaj pažarnaj, lesanarychtoŭčaj i enierhanasyčanaj technicy, a taksama ŭ pradukcyi «Homsielmaša».

Orda adznačyŭ, što ŭ Manholii jość kala 130 tysiač kvadratnych kiłamietraŭ tajhi, jakuju nieabchodna asvojvać i pierapracoŭvać. Pavodle jaho słoŭ, Biełaruś maje adpaviedny dośvied i kampietencyi.

Siarod inšych pierśpiektyŭnych napramkaŭ supracoŭnictva pasoł nazvaŭ charčovuju i hornazdabyŭnuju pramysłovaść, budaŭnictva, a taksama raźvićcio kantaktaŭ pamiž dziełavymi kołami dźviuch krain.

• 0
• 0
• 0
• 0
• 0
• 0
• 0
• 0