U Minsku admianili sustreču ź lidaram duchoŭnaha fondu, jaki paraŭnoŭvajuć ź siektaj — a płanavali sabrać «Čyžoŭka-Arenu»
Vy naŭrad ci viedajecie, chto taki Šry Šry Ravi Šankar, ale fond pad kiraŭnictvam hetaha čałavieka źviazany z sotniami miljonaŭ ludziej va ŭsim śviecie. Šankar źbiraŭsia naviedać i Biełaruś — vizit skasavali za tydzień da pačatku.
U Šry Šry Ravi Šankara składanaja reputacyja. 70‑hadovy huru ź Indyi viadomy praz svaju arhanizacyju The Art of Living: pavodle samoj arhanizacyi, jany «zakranuli žyćcio bolš jak 370 miljonaŭ čałaviek», a adnych instruktaraŭ u ich bolš za 38 tysiač. The Art of Living publična viadomyja jak arhanizatary kursaŭ johi i miedytacyi, taksama na sajcie arhanizacyi prapanujuć šmatstupienčatuju sistemu padrychtoŭki adeptaŭ — viadoma, nie za biaspłatna.
Jość za imi, adnak, i skandały. Naprykład, u 2011‑m arhanizacyja padała ŭ amierykanski sud na dvuch byłych adeptaŭ, jakija zasnavali krytyčnyja błohi pra jaje. The Art of Living časta abvinavačvajuć u siektanctvie i kulcie asoby stvaralnika, pryčym palemika vakoł arhanizacyi dalatała i da našaha rehijona: u 2020‑m litoŭski Delfi pisaŭ pra dziŭnyja praktyki The Art of Living.
Arhanizacyja maje i biełaruskaje adździaleńnie. 28 kastryčnika ŭ Biełaruś musiŭ pryjechać sam Šry Šry Ravi Šankar, a 29‑ha huru płanavaŭ sabrać na sustrečy z saboj ažno «Čyžoŭka-Arenu». Arena moža źmiaścić 8800 hledačoŭ.
Heta musiŭ być pieršy vizit Šankara ŭ Biełaruś, pry hetym huru nie raz naviedvaŭ Rasiju i pravodziŭ tam lekcyi. U červieni 2026‑ha Šankar byŭ na Pieciarburhskim mižnarodnym ekanamičnym forumie, dzie sustreŭsia z pradstaŭnikami Biełaruskaha fondu miru — tady jaho i zaprasili ŭ Biełaruś.
21 kastryčnika stała viadoma, što sustrečy ŭ «Čyžoŭka-Arenie» nie budzie: tym, chto paśpieŭ nabyć kvitki, prapanavali ich viartać. Z sajta Šry Šry Ravi Šankara źnikła infarmacyja i pra sam vizit u našu krainu.
Biełaruskaje pradstaŭnictva The Art of Living paćviardžaje, što vizitu nie budzie, ale nie tłumačyć admienu: maŭlaŭ, pryčyny pakul što vyśviatlajucca. Nie było nijakich abviestak pra skasavańnie i ŭ sacsietkach Šankara. Pra toje, ci čakać novaha pryjezdu huru, u biełaruskim pradstaŭnictvie arhanizacyi nie kažuć i rajać zamiest hetaha pryjechać u Miunchien — Šankar vystupaje tam 31 kastryčnika.
«Naša Niva» — bastyjon biełaruščyny
PADTRYMAĆ
Kamientary