Šaman hod źbiraŭsia ŭ tur pa Biełarusi — ciapier kancerty admianili biez tłumačeńniaŭ
U śniežni 2025‑ha rasijski śpiavak Šaman musiŭ naviedać biełaruskija abłasnyja centry, ale vystupy čamuści pieranieśli na hod. Ciapier stała viadoma, što tyja kancerty ŭvohule nie adbuducca.
U kancy 2025‑ha Šaman źbiraŭsia zładzić tur pa Biełarusi. Usio pačałosia z kancerta ŭ minskim Pałacy Respubliki, jaki adbyŭsia 1 listapada 2025-ha. Pośpiech atrymaŭsia sumnieŭny: na kancert pradali 80% kvitkoŭ, ale z padklučeńniem administracyjnaha resursu.
Pa sacsietkach raźlatalisia kamientaryi, što prafsajuzy nastojliva prapanoŭvali kvitki biudžetnikam ź istotnymi źnižkami. Taksama puścili raznaradku pa rajvykankamach, kab tyja vykupali kvitki.
Paśla Minska Šaman musiŭ pajechać u Brest, Hrodna i Homiel, ale ž tyja kancerty pieranieśli biez tłumačeńnia pryčyn. Ciapier vystupy płanavalisia na samy kaniec hoda — 20, 21 i 23 śniežnia.
Ale dniami źjaviłasia infarmacyja, što i hetyja kancerty nie adbuducca, i Ticketpro užo prapanuje tym, chto nabyŭ kvitki, viarnuć hrošy. U telehram-kanale i instahramie Šamana nijakaha tłumačeńnia admieny niama. Adnak miarkujučy pa tym, jak pradavalisia kvitki ŭ minułym hodzie, možna vykazać zdahadku, što na kancert Šamana, viadomaha pieśniaj «Ja ruski», prosta nie chočuć iści.
«Naša Niva» — bastyjon biełaruščyny
PADTRYMAĆKab razdać kvitki na Šamana, padklučyli rajvykankamy. A jon zapisaŭ videa «Priviet, Biełoruśsija!» i śpiavaŭ himn Rasii
Šaman i Mizulina pabralisia šlubam u akupavanym Daniecku
«Biełarusy nahadvajuć čałavieka z tryvožnym razładam». Paet Vital Ryžkoŭ pra zvańnie seks-simvała paezii, batł z Najdzionavym, Karža i Cichanoŭskuju
Kamientary