Zakryli jašče adzin zbor amal na 2 miljony dalaraŭ dla chvoraha dziciaci
U trochhadovaha Ułada Hładkaha z Navahrudka — śpinalnaja myšačnaja atrafija (SMA) treciaha typu. Kab dapamahčy synu, baćki abviaścili dabračynny zbor na preparat «Zołhiensma», jaki spyniaje prahresavańnie chvaroby. Jaho košt składaje 1 miljon 815 tysiač dalaraŭ. Ciapier stała viadoma, što nieabchodnuju sumu ŭdałosia sabrać, piša «Anłajnier».
«Dziakuj absalutna kožnamu, chto padtrymaŭ našu siamju, praciahnuŭ ruku dapamohi i nie prajšoŭ mima. Vy — našy anioły-achoŭniki. Vaša dabrynia padaryła Uładu budučyniu! Naša ŭdziačnaść prosta biaźmiežnaja», — napisali baćki chłopčyka ŭ sacyjalnych sietkach.
Jašče dva miesiacy tamu, kali pra historyju Ułada napisaŭ «Anłajnier», było sabrana kala 74 tysiač dalaraŭ. Zbor išoŭ marudna: pavodle apošnich spravazdač u sacyjalnych sietkach, na dabračynnym rachunku chłopčyka było tolki 11,27% ad nieabchodnaj sumy.
U Biełarusi «Zołhiensmu» ŭvodziać tolki dzieciam, vaha jakich nie pieravyšaje 13,5 kiłahrama. U žniŭni Uładu da hetaj krytyčnaj miažy zastavałasia nabrać usiaho 500 hramaŭ.
Žurnalisty źviazalisia z maci chłopčyka Ksienijaj, kab daviedacca, jak za taki karotki čas udałosia sabrać astatnija hrošy i dzie Uład atrymaje nieabchodnaje lačeńnie.
Pavodle słoŭ maci, siamji vielmi dapamoh Biełaruski sajuz žančyn, jaki pieraličyŭ hrošy, jakich nie chapała, sa svajho dabračynnaha rachunku. Ksienija pryznałasia, što mahčymaść zakryć zbor stała dla ich niečakanaściu i vialikaj radaściu, bo raniej jon prasoŭvaŭsia vielmi marudna.
«My ŭžo pryjechali ŭ «Maci i dzicia» i rychtujemsia da injekcyi. Dumaju, Uładziku ŭviaduć preparat u kancy nastupnaha tydnia. Pakul analizy prachodzim, UHD, kardyjahramu. Viadoma, ja chvalujusia, jak syn budzie pavodzić siabie na pracedury i jak jana projdzie. Heta budzie kropielnica, jamu treba budzie lažać niejki čas, napeŭna, pryjdziecca ŭklučać mulciki», — dzielicca Ksienija.
Ciapier čytajuć
Cichanoŭski: Cichanoŭskaj možna było ŭ 2020‑m nie pabajacca turmy. I, moža, u biełarusaŭ byŭ by šaniec71
Kamientary
I znoŭ - zakryli tolko dziakujučy tamu, što bolšaja častka (značna bolšaja!) patrebnaj sumy pryjšła z adnaho hrašovaha pieravodu. Ad vielmi bahataha čałavieka, ci bahataj ustanovy, ci bahataj firmy. Achviaravańniaŭ prostych ludziej nie chapała. I nie budzie chapać dla zboru miljonaŭ u valucie. Dziaržava pavinna dapamahać.