Amierykanskija kampanii nie chočuć nabyvać rasijski dyziel, pra jaki damoviŭsia Tramp. Jon moža pajści ŭ Braziliju

Jak paviedamlajecca, pradstaŭniki administracyi Donalda Trampa nieaficyjna zaachvočvajuć amierykanskija kampanii nabyvać rasijskaje paliva. Adnak biznes niepakoicca pra mahčymyja nastupstvy takich ździełak, asabliva napiaredadni pramiežkavych vybaraŭ u Kanhres ZŠA, jakija adbuducca 3 listapada. Kali na ich pieramohuć demakraty, kampanii mohuć sutyknucca z rasśledavańniami i pretenzijami praz zakupki paliva, na jakoje praciahvajuć raspaŭsiudžvacca sankcyjnyja abmiežavańni.

Analityki Rapidan Energy Group miarkujuć, što Rasija i ZŠA pakul šukajuć kupcoŭ, ale ŭ vyniku rasijski dyziel moža apynucca ŭ Brazilii. Takoha ž mierkavańnia prytrymlivajucca inšyja halinovyja ekśpierty, apytanyja vydańniem.

Z 16 pa 22 kastryčnika z bałtyjskaha porta Prymorsk u bok ZŠA vyjšli try tankiery z dyzielnym palivam: Talisman, Leruo i Agioi Fanendes. Pieršy znachodzicca pad sankcyjami ZŠA i ES, druhi — Vialikabrytanii i ES. Razam sudny pieravoziać 924 tysiačy baralaŭ paliva. Heta mienš za tracinu sutačnaha spažyvańnia dyzielu transpartnym siektaram ZŠA. Čakałasia, što tankiery prybuduć u punkt pryznačeńnia 7—11 listapada. Pavodle damoŭlenaściaŭ, ahulny abjom pastavak u ZŠA pavinien skłaści 4,8 miljona ton dyzielu.

Adnak maršruty sudnaŭ užo mianiajucca. Jak paviedamlaje Reuters, tankier Leruo paznačyŭ punkt pryznačeńnia jak «Atłantyčnaje ŭźbiarežža — čakaju ŭkazańniaŭ». Dva inšyja sudny pieršapačatkova paznačyli tradycyjnyja punkty prybyćcia ŭ Turcyi i Brazilii.

Suprać pastavak vystupajuć i mnohija amierykanskija palityki. Hubiernatarka štata Ńju-Džersi, demakratka Miki Šeryła, zajaviła, što šukaje sposaby nie dapuścić rasijski dyziel u port Ńju-Jorka i Ńju-Džersi. Jana nazvała ździełku Trampa i Pucina karumpavanaj i niezakonnaj.

Hrupa kanhresmienaŭ ad abiedźviuch partyj taksama zaklikała kampanii nie ŭdzielničać u zakupcy, transparciroŭcy, imparcie, razhruzcy, zachoŭvańni, finansavańni i raspaŭsiudžvańni dyzielnaha paliva rasijskaha pachodžańnia. 27 kastryčnika jany nakiravali listy najbujniejšym amierykanskim bankam, partam i dystrybjutaram paliva, papiaredziŭšy pra mahčymyja sudovyja pazovy i adkaznaść za ŭdzieł u takich ździełkach.

Impart rasijskaha dyzielu ŭ ZŠA zabaraniaje zakon Ending Importation of Russian Oil Act, pryniaty ŭ 2022 hodzie. Jon dazvalaje prezidentu admianić zabaronu na pastaŭki rasijskaha paliva tolki paśla piśmovaha paviedamleńnia Kanhresu za 90 dzion i pry ŭmovie, što Rasija spynić ahresiju suprać Ukrainy i pierastanie ŭjaŭlać pahrozu luboj krainie NATA.

U siaredzinie kastryčnika prezident ZŠA Donald Tramp niečakana źniaŭ sankcyi z rasijskaha dyzielu, raźličvajučy źnizić ceny na paliva ŭ ZŠA i va ŭsim śviecie. Jon damoviŭsia z prezidentam Rasii Uładzimiram Pucinym pra pastaŭki, ale, jak śćviardžajecca ŭ materyjale, zakonnaja zabarona praciahvaje dziejničać: Tramp nie paviedamiŭ Kanhresu pra jaje skasavańnie, a ŭmovy dla admieny abmiežavańniaŭ nie vykananyja.

U Kanhresie paličyli takuju ździełku niebiaśpiečnaj, zajaviŭšy, što jana daść Maskvie dadatkovyja srodki dla finansavańnia vajny suprać Ukrainy.

Tym časam abiacanaha źnižeńnia cen na dyziel u ZŠA pakul nie adbyłosia. Paliva tam pradajecca prykładna pa 6,3 dołara za hałon — krychu daražej, čym na momant zaklučeńnia damoŭlenaściaŭ pamiž Trampam i Pucinym.

• 7
• 0
• 8
• 0
• 0
• 0
• 0
• 0