Tramp uvioŭ «piakielnyja sankcyi» suprać Rasii. I tut ža admianiŭ ich

Donald Tramp uvioŭ novyja maštabnyja sankcyi suprać Rasii i taryfy suprać krain, jakija kuplajuć u jaje naftu i haz, — i tut ža admianiŭ ich. Uvieści «piakielnyja sankcyi» jaho abaviazvaŭ da 18 kastryčnika zakon, pryniaty Kanhresam, piša Bi-bi-si.

Ekśpierty čakali mienavita takoha raźvićcia padziej, pakolki Tramp paśladoŭna pravodzić palityku zbližeńnia z Rasijaj i sprabuje viarnuć Uładzimira Pucina na mižnarodnuju arenu.

Amal usie sankcyi ZŠA suprać Rasii za ŭvarvańnie va Ukrainu ŭ 2022 hodzie dahetul byli ŭviedzienyja ŭkazami prezidenta, i Donald Tramp moh admianić ich u luby momant. Novy akt zakanadaŭča zamacoŭvaje isnyja abmiežavańni i abaviazvaje Trampa ŭvieści novyja.

Adnak jon ža daje prezidentu prava prypyniać lubyja sankcyi suprać Rasii pad padstavaj abarony nacyjanalnych intaresaŭ ZŠA.

Tramp hetym pravam i skarystaŭsia.

Uviečary apošniaha pracoŭnaha dnia pierad zakančeńniem adviedzienaha zakonam 30‑dzionnaha terminu jon vydaŭ ukaz, jakim uvioŭ i tut ža na niavyznačany termin prypyniŭ usie prapisanyja ŭ dakumiencie novyja sankcyi.

«Hetym ja prypyniaju prymianieńnie sankcyj, abmiežavalnych mier i pošlin, praduhledžanych zakonam Hrema, — havorycca ŭ piatničnym ukazie Trampa. — Ja nakiravaŭ u Kanhres aficyjnaje paćviardžeńnie taho, što pradastaŭleńnie takoj adterminoŭki na dadzienym etapie adpaviadaje nacyjanalnym intaresam Złučanych Štataŭ».

Takuju ž padstavu Tramp niadaŭna vykarystaŭ dla taho, kab čarhovym razam nie ŭzmacnić, a asłabić sankcyi. Paśla razmovy z Pucinym tydzień tamu Tramp źniaŭ zabaronu na zakupku rasijskaha dyziela «ŭ intaresach amierykancaŭ», jakija pakutujuć ad vysokich cen napiaredadni pramiežkavych vybaraŭ u Kanhres.

Tramp i da hetaha prypyniaŭ sankcyi suprać rasijskaj naftavaj pramysłovaści — hałoŭnaj krynicy dachodaŭ Kramla na vajnu. Z toj ža metaj — źbić ceny na naftu, bienzin i dyziel, jakija padskočyli praź jaho vajnu ź Iranam.

Vajna hetaja ŭ razhary, ceny praciahvajuć raści i navat biez eskałacyi deficyt zachavajecca prynamsi da viasny 2027 hoda, papiaredziła na hetym tydni Mižnarodnaje enierhietyčnaje ahienctva (IEA). A značyć, u Trampa i dalej buduć padstavy źmiakčać sankcyi suprać Rasii, a nie rabić ich bolš žorstkimi, jak zahadvaje novy zakon imia niabožčyka sienatara Lindsi Hrema.

«Tramp zaŭsiody chacieŭ źniać sankcyi»

«Toje, što Tramp zdymaje sankcyi z Rasii, nie pavinna ździŭlać nikoha, chto sačyŭ za im apošnija dziesiać hadoŭ. Historyja z dyzielem i pramiežkavymi vybarami — tolki padstava, a nie pryčyna. Jon robić heta tamu, što zaŭsiody chacieŭ źniać sankcyi z Rasii», — piša Rut Dejermand, ekśpiert pa Rasii z Karaleŭskaha kaledža Łondana.

Jana nahadvaje, što jak tolki Donald Tramp u pieršy raz staŭ prezidentam u 2017 hodzie, Kanhres paśpiašaŭsia zakanadaŭča zamacavać usie ŭviedzienyja da taho momantu ŭkazami Baraka Abamy sankcyi suprać Rasii za Krym, Danbas i ŭmiašańnie ŭ amierykanskija vybary 2016 hoda, kab Tramp nie moh admianić ich.

Tramp nieachvotna padpisaŭ pryniaty pieravažnaj bolšaściu zakon CAATSA, ale ŭvodzić sankcyi nie śpiašaŭsia da 2018 hoda.

Historyja pieršaha terminu ź dziŭnaj dakładnaściu paŭtaryłasia ź viartańniem Trampa na druhi ŭ 2025 hodzie.

Jak tolki jon zajechaŭ u Bieły dom, uzmacnieńnie sankcyjnaha cisku na Rasiju z boku ZŠA syšło na ništo, adznačaje amierykanski Centr stratehičnych i mižnarodnych daśledavańniaŭ (CSIS).

Kanhres tym časam pasprabavaŭ uzakonić užo novy nabor sankcyj, uviedzieny ŭkazami Džo Bajdena paśla poŭnamaštabnaha ŭvarvańnia Rasii va Ukrainu 2022 hoda. I znoŭ Tramp supraciŭlaŭsia.

«Tramp nastolki suprać antyrasijskich sankcyj, što Bieły dom amal paŭtara hoda tarmaziŭ prasoŭvańnie zakonaprajekta, jaki navat nie abaviazvaje Trampa ŭvodzić ich», — adznačaje Rut Dejiermand.

Jak Tramp moža źmiakčyć sankcyi

I sapraŭdy, zakon ab «piakielnych sankcyjach» daje prezidentu prava prypyniać ich dziejańni na svajo mierkavańnie na niavyznačany termin, i Kanhres nijak nie moža hetamu pieraškodzić.

Trampu dastatkova napisać karotkaje abhruntavańnie, čamu prypynieńnie «ŭ nacyjanalnych intaresach ZŠA», i adpravić jaho ŭ parłamient, pryčym abhruntavańnie možna častkova zasakrecić, tak što publika i nie daviedajecca, pa jakoj mienavita pryčynie źniatyja sankcyi.

U paturańniach i chavajecca hałoŭnaja niebiaśpieka novaha zakona, ličyć były kuratar sankcyjnaj palityki Dziarždepa ZŠA Denieł Fryd, jaki ŭdzielničaŭ u raspracoŭcy pieršych sankcyj suprać Kramla pry Abamie.

«Ja bajusia, što administracyja Trampa nie stanie prymianiać samyja žorstkija pałažeńni zakona i budzie prosta vydavać adterminoŭki i vyzvaleńni ad sankcyj», — piša jon.

Samaje žorstkaje pałažeńnie, pra jakoje kaža Fryd, — heta prava abjaŭlać handlovuju vajnu krainam, jakija kuplajuć naftu i haz u Rasii i tym samym dapamahajuć joj finansavać uvarvańnie va Ukrainu.

Taryfy — lubimy instrumient źniešniaj palityki Trampa. I jon daŭ chod zakonu, tolki kali Kanhres uklučyŭ tudy prava ŭvodzić pošliny pamieram da 100% na impart u ZŠA tavaraŭ z top-5 krain, jakija zakuplajuć rasijskija naftu i haz abo dapamahajuć Kramlu abychodzić sankcyi.

I kanhresmieny, i ekśpierty vykazvali aściarohi, što Tramp vykarystoŭvaje mienavita hetaje pałažeńnie dla praciahu svajoj handlovaj vajny z usim śvietam, pakolki jaho papiarednija taryfy sudy raz za razam pryznajuć niezakonnymi.

Hałoŭnyja pakupniki rasijskaj nafty — Kitaj, Indyja i Turcyja, i druhasnyja sankcyi ŭ vyhladzie pošlin na ich tavary patencyjna zdolnyja skaracić popyt na rasijskuju naftu, pierš za ŭsio ŭ Indyi. Adnak Indyja — adzin z najbujniejšych pastaŭščykoŭ dyziela na suśvietnyja rynki, a zamianić rasijskuju naftu va ŭmovach kryzisu ŭ Piersidskim zalivie joj niama čym.

Tamu cisk na pakupnikoŭ rasijskaj nafty prama supiarečyć zajaŭlenym metam Trampa — źnizić ceny na paliva. Pakul idzie vajna ŭ Iranie, čakać prymianieńnia samaj žorstkaj miery novaha zakona Lindsi Hrema nie varta. Roŭna jak i druhoha pa žorstkaści i naviźnie dubca — sankcyj suprać rasijskaha cieniavoha fłotu.

Fłot hety pieravozić amal 80% rasijskaha naftavaha ekspartu, i niaŭchilna adaptujecca da sankcyjnaha režymu. Tym važniej pastajanna abnaŭlać śpisy sudnaŭ, što i robiać ES i Brytanija. Tym časam ZŠA pry Trampie pierastali ŭvodzić novyja sankcyi suprać jaho.

Novy zakon abaviazvaje prezidenta zrabić heta i dazvalaje prosta skapijavać sankcyjnyja śpisy ŭ sajuźnikaŭ.

Adnak i tut viecier dźmie ŭ supraćlehły bok z-za iranskaj vajny. Ministr enierhietyki ZŠA Krys Rajt na hetym tydni dapuściŭ źmiakčeńnie sankcyj suprać rasijskaha cieniavoha fłotu. Meta — źbić zališnie vysokija ceny na fracht, dazvoliŭšy lehitymnym sudnaŭładalnikam papoŭnić fłot za košt kupli padsankcyjnych sudnaŭ z dazvołu ŭładaŭ ZŠA.

• 0
• 1
• 1
• 10
• 0
• 0
• 19
• 0