Увесці «пякельныя санкцыі» яго абавязваў да 18 кастрычніка закон, прыняты Кангрэсам.
Дональд Трамп увёў новыя маштабныя санкцыі супраць Расіі і тарыфы супраць краін, якія купляюць у яе нафту і газ, — і тут жа адмяніў іх. Увесці «пякельныя санкцыі» яго абавязваў да 18 кастрычніка закон, прыняты Кангрэсам, піша Бі-бі-сі.
Эксперты чакалі менавіта такога развіцця падзей, паколькі Трамп паслядоўна праводзіць палітыку збліжэння з Расіяй і спрабуе вярнуць Уладзіміра Пуціна на міжнародную арэну.
Амаль усе санкцыі ЗША супраць Расіі за ўварванне ва Украіну ў 2022 годзе дагэтуль былі ўведзеныя ўказамі прэзідэнта, і Дональд Трамп мог адмяніць іх у любы момант. Новы акт заканадаўча замацоўвае існыя абмежаванні і абавязвае Трампа ўвесці новыя.
Аднак ён жа дае прэзідэнту права прыпыняць любыя санкцыі супраць Расіі пад падставай абароны нацыянальных інтарэсаў ЗША.
Трамп гэтым правам і скарыстаўся.
Увечары апошняга працоўнага дня перад заканчэннем адведзенага законам 30‑дзённага тэрміну ён выдаў указ, якім увёў і тут жа на нявызначаны тэрмін прыпыніў усе прапісаныя ў дакуменце новыя санкцыі.
«Гэтым я прыпыняю прымяненне санкцый, абмежавальных мер і пошлін, прадугледжаных законам Грэма, — гаворыцца ў пятнічным указе Трампа. — Я накіраваў у Кангрэс афіцыйнае пацвярджэнне таго, што прадастаўленне такой адтэрміноўкі на дадзеным этапе адпавядае нацыянальным інтарэсам Злучаных Штатаў».
Такую ж падставу Трамп нядаўна выкарыстаў для таго, каб чарговым разам не ўзмацніць, а аслабіць санкцыі. Пасля размовы з Пуціным тыдзень таму Трамп зняў забарону на закупку расійскага дызеля «ў інтарэсах амерыканцаў», якія пакутуюць ад высокіх цэн напярэдадні прамежкавых выбараў у Кангрэс.
Трамп і да гэтага прыпыняў санкцыі супраць расійскай нафтавай прамысловасці — галоўнай крыніцы даходаў Крамля на вайну. З той жа мэтай — збіць цэны на нафту, бензін і дызель, якія падскочылі праз яго вайну з Іранам.
Вайна гэтая ў разгары, цэны працягваюць расці і нават без эскалацыі дэфіцыт захаваецца прынамсі да вясны 2027 года, папярэдзіла на гэтым тыдні Міжнароднае энергетычнае агенцтва (IEA). А значыць, у Трампа і далей будуць падставы змякчаць санкцыі супраць Расіі, а не рабіць іх больш жорсткімі, як загадвае новы закон імя нябожчыка сенатара Ліндсі Грэма.
«Трамп заўсёды хацеў зняць санкцыі»
«Тое, што Трамп здымае санкцыі з Расіі, не павінна здзіўляць нікога, хто сачыў за ім апошнія дзесяць гадоў. Гісторыя з дызелем і прамежкавымі выбарамі — толькі падстава, а не прычына. Ён робіць гэта таму, што заўсёды хацеў зняць санкцыі з Расіі», — піша Рут Дэерманд, эксперт па Расіі з Каралеўскага каледжа Лондана.
Яна нагадвае, што як толькі Дональд Трамп у першы раз стаў прэзідэнтам у 2017 годзе, Кангрэс паспяшаўся заканадаўча замацаваць усе ўведзеныя да таго моманту ўказамі Барака Абамы санкцыі супраць Расіі за Крым, Данбас і ўмяшанне ў амерыканскія выбары 2016 года, каб Трамп не мог адмяніць іх.
Трамп неахвотна падпісаў прыняты пераважнай большасцю закон CAATSA, але ўводзіць санкцыі не спяшаўся да 2018 года.
Гісторыя першага тэрміну з дзіўнай дакладнасцю паўтарылася з вяртаннем Трампа на другі ў 2025 годзе.
Як толькі ён заехаў у Белы дом, узмацненне санкцыйнага ціску на Расію з боку ЗША сышло на нішто, адзначае амерыканскі Цэнтр стратэгічных і міжнародных даследаванняў (CSIS).
Кангрэс тым часам паспрабаваў узаконіць ужо новы набор санкцый, уведзены ўказамі Джо Байдэна пасля поўнамаштабнага ўварвання Расіі ва Украіну 2022 года. І зноў Трамп супраціўляўся.
«Трамп настолькі супраць антырасійскіх санкцый, што Белы дом амаль паўтара года тармазіў прасоўванне законапраекта, які нават не абавязвае Трампа ўводзіць іх», — адзначае Рут Дэйерманд.
Як Трамп можа змякчыць санкцыі
І сапраўды, закон аб «пякельных санкцыях» дае прэзідэнту права прыпыняць іх дзеянні на сваё меркаванне на нявызначаны тэрмін, і Кангрэс ніяк не можа гэтаму перашкодзіць.
Трампу дастаткова напісаць кароткае абгрунтаванне, чаму прыпыненне «ў нацыянальных інтарэсах ЗША», і адправіць яго ў парламент, прычым абгрунтаванне можна часткова засакрэціць, так што публіка і не даведаецца, па якой менавіта прычыне знятыя санкцыі.
У патураннях і хаваецца галоўная небяспека новага закона, лічыць былы куратар санкцыйнай палітыкі Дзярждэпа ЗША Дэніэл Фрыд, які ўдзельнічаў у распрацоўцы першых санкцый супраць Крамля пры Абаме.
«Я баюся, што адміністрацыя Трампа не стане прымяняць самыя жорсткія палажэнні закона і будзе проста выдаваць адтэрміноўкі і вызваленні ад санкцый», — піша ён.
Самае жорсткае палажэнне, пра якое кажа Фрыд, — гэта права аб'яўляць гандлёвую вайну краінам, якія купляюць нафту і газ у Расіі і тым самым дапамагаюць ёй фінансаваць уварванне ва Украіну.
Тарыфы — любімы інструмент знешняй палітыкі Трампа. І ён даў ход закону, толькі калі Кангрэс уключыў туды права ўводзіць пошліны памерам да 100% на імпарт у ЗША тавараў з топ-5 краін, якія закупляюць расійскія нафту і газ або дапамагаюць Крамлю абыходзіць санкцыі.
І кангрэсмены, і эксперты выказвалі асцярогі, што Трамп выкарыстоўвае менавіта гэтае палажэнне для працягу сваёй гандлёвай вайны з усім светам, паколькі яго папярэднія тарыфы суды раз за разам прызнаюць незаконнымі.
Галоўныя пакупнікі расійскай нафты — Кітай, Індыя і Турцыя, і другасныя санкцыі ў выглядзе пошлін на іх тавары патэнцыйна здольныя скараціць попыт на расійскую нафту, перш за ўсё ў Індыі. Аднак Індыя — адзін з найбуйнейшых пастаўшчыкоў дызеля на сусветныя рынкі, а замяніць расійскую нафту ва ўмовах крызісу ў Персідскім заліве ёй няма чым.
Таму ціск на пакупнікоў расійскай нафты прама супярэчыць заяўленым мэтам Трампа — знізіць цэны на паліва. Пакуль ідзе вайна ў Іране, чакаць прымянення самай жорсткай меры новага закона Ліндсі Грэма не варта. Роўна як і другога па жорсткасці і навізне дубца — санкцый супраць расійскага ценявога флоту.
Флот гэты перавозіць амаль 80% расійскага нафтавага экспарту, і няўхільна адаптуецца да санкцыйнага рэжыму. Тым важней пастаянна абнаўляць спісы суднаў, што і робяць ЕС і Брытанія. Тым часам ЗША пры Трампе перасталі ўводзіць новыя санкцыі супраць яго.
Новы закон абавязвае прэзідэнта зрабіць гэта і дазваляе проста скапіяваць санкцыйныя спісы ў саюзнікаў.
Аднак і тут вецер дзьме ў супрацьлеглы бок з-за іранскай вайны. Міністр энергетыкі ЗША Крыс Райт на гэтым тыдні дапусціў змякчэнне санкцый супраць расійскага ценявога флоту. Мэта — збіць залішне высокія цэны на фрахт, дазволіўшы легітымным суднаўладальнікам папоўніць флот за кошт куплі падсанкцыйных суднаў з дазволу ўладаў ЗША.
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2121
Каментары
[Зрэдагавана]