Трамп-малодшы ездзіў з расійскім алігархам на паляванне ў Манголію

Інфармацыю пра знаходжанне Трампа-малодшага і Крамлёва ў Манголіі пацвердзілі гіды і мясцовыя чыноўнікі. Акрамя таго, FT вывучыла звесткі адсочвання авіярэйсаў, публікацыі ў сацсетках і агульнадаступныя дакументы.

У канцы жніўня Трамп-малодшы прыляцеў ва Улан-Батар, сталіцу Манголіі, і пераадолеў некалькі сотняў кіламетраў да лагера ў аймаку (правінцыі) Уус, піша FT. Там ён размясціўся разам з невялікай групай паляўнічых гідаў, кіроўцаў і кухараў.

Як член сям'і прэзідэнта, Трамп-малодшы падарожнічае пад аховай Сакрэтнай службы ЗША. Паводле федэральных дакументаў, пасольства ЗША ва Улан-Батары заплаціла 18 715 долараў за гасцінічныя нумары ў рамках «візіту» Сакрэтнай службы з 23 жніўня па 6 верасня.

У сваю чаргу, Крамлёў, які ўзначальвае Міжнародную баксёрскую асацыяцыю (IBA), 27 жніўня пакінуў прэс-канферэнцыю IBA у Казахстане і начным чартарным рэйсам адправіўся ва Улан-Батар, піша FT. Адтуль ён накіраваўся на захад, у лагер Трампа-малодшага.

Крамлёва, паводле звестак FT, суправаджаў Артур Марціросаў, расійскі бізнэсмен і партнёр венчурнага фонду «Усход», які знаходзіцца пад санкцыямі ЗША.

Падчас знаходжання ў лагеры Трамп-малодшы і Крамлёў стараліся не фатаграфавацца разам, расказаў адзін з удзельнікаў паездкі. Пры гэтым Крамлёў апублікаваў у сваім тэлеграм-канале відэа, на якім яго група рыхтуецца да палявання на досвітку. Трампа-малодшага ў роліку няма, аднак у кадры з'яўляюцца двое арганізатараў яго паездкі.

Правёўшы два дні ў лагеры з Трампам-малодшым, Крамлёў вярнуўся ва Улан-Батар, а затым адправіўся на чарговы баксёрскі паядынак IBA у Якуцк, піша FT. Трамп-малодшы застаўся ў Манголіі яшчэ на тыдзень і накіраваўся з аймака Уус у аймак Баян-Улгій, каб папаляваць на сібірскага горнага казла.

Падчас паездкі Трамп-малодшы, паводле слоў аднаго з гідаў, забіў алтайскага архара (від знаходзіцца пад пагрозай знікнення). З 2019 года сын прэзідэнта застрэліў як мінімум яшчэ двух архараў падчас паляўнічых паездак у Манголію, піша FT.

У паездцы таксама ўдзельнічаў даўні спонсар Рэспубліканскай партыі Кевін Смол, які ўжо паляваў з Трампам-малодшым.

Пасля палявання сын прэзідэнта ЗША вярнуўся ва Улан-Батар і правёў шэраг сустрэч, у тым ліку з прэзідэнтам Манголіі Ухнаагійнам Хурэлсухам, піша FT. Прадстаўнік мангольскага ўрада апублікаваў фатаграфіі ў Facebook і напісаў, што бакі абмеркавалі адносіны ЗША і Манголіі, а таксама патэнцыйныя магчымасці для бізнэсу. Аднак неўзабаве публікацыю выдалілі. Прадстаўнік Трампа-малодшага заявіў, што сустрэча мела неафіцыйны характар і ўдзельнікі пераважна абмяркоўвалі адпачынак на прыродзе.

Крамлёў і Марціросаў не адказалі на запыты аб каментарыях.

Крамлёў — сябар кіраўніка Службы бяспекі прэзідэнта Расіі Аляксея Рубежнага. 

Сустрэча ў Манголіі адбылася пасля таго, як у маі Крамлёў наведаў некалькі мерапрыемстваў у рамках вясельных урачыстасцяў Трампа-малодшага на прыватным карыбскім востраве і аплаціў частку выдаткаў. Пра ўдзел расіяніна ў вяселлі Трампа-малодшага першай паведаміла ProPublica. Пасля гэтага прэзідэнт заявіў, што яго сын вярнуў Крамлёву грошы.

Першая вядомая сустрэча Крамлёва і Трампа-малодшага адбылася летась на мерапрыемстве IBA у Стамбуле. На сцэне разам з легендарным філіпінскім баксёрам Мэні Пак'яа Трамп-малодшы назваў Крамлёва «не проста лідарам, але і сябрам».

У студзені 2009 года пры крушэнні верталёта на Алтаі падчас палявання на архараў, занесеных у Чырвоную кнігу, загінуў паўнамоцны прадстаўнік прэзідэнта Расіі ў Дзярждуме Аляксандр Касопкін. Пасля яго абвінавацілі ў браканьерстве.

• 1
• 0
• 2
• 6
• 0
• 0
• 6
• 0