Tramp-małodšy jeździŭ z rasijskim aliharcham na palavańnie ŭ Manholiju

Infarmacyju pra znachodžańnie Trampa-małodšaha i Kramlova ŭ Manholii paćvierdzili hidy i miascovyja čynoŭniki. Akramia taho, FT vyvučyła źviestki adsočvańnia avijarejsaŭ, publikacyi ŭ sacsietkach i ahulnadastupnyja dakumienty.

U kancy žniŭnia Tramp-małodšy prylacieŭ va Ułan-Batar, stalicu Manholii, i pieraadoleŭ niekalki sotniaŭ kiłamietraŭ da łahiera ŭ ajmaku (pravincyi) Uus, piša FT. Tam jon raźmiaściŭsia razam ź nievialikaj hrupaj palaŭničych hidaŭ, kiroŭcaŭ i kucharaŭ.

Jak člen siamji prezidenta, Tramp-małodšy padarožničaje pad achovaj Sakretnaj słužby ZŠA. Pavodle fiederalnych dakumientaŭ, pasolstva ZŠA va Ułan-Batary zapłaciła 18 715 dołaraŭ za haściničnyja numary ŭ ramkach «vizitu» Sakretnaj słužby z 23 žniŭnia pa 6 vieraśnia.

U svaju čarhu, Kramloŭ, jaki ŭznačalvaje Mižnarodnuju baksiorskuju asacyjacyju (IBA), 27 žniŭnia pakinuŭ pres-kanfierencyju IBA u Kazachstanie i načnym čartarnym rejsam adpraviŭsia va Ułan-Batar, piša FT. Adtul jon nakiravaŭsia na zachad, u łahier Trampa-małodšaha.

Kramlova, pavodle źviestak FT, supravadžaŭ Artur Marcirosaŭ, rasijski biznesmien i partnior vienčurnaha fondu «Uschod», jaki znachodzicca pad sankcyjami ZŠA.

Padčas znachodžańnia ŭ łahiery Tramp-małodšy i Kramloŭ staralisia nie fatahrafavacca razam, raskazaŭ adzin z udzielnikaŭ pajezdki. Pry hetym Kramloŭ apublikavaŭ u svaim telehram-kanale videa, na jakim jaho hrupa rychtujecca da palavańnia na dośvitku. Trampa-małodšaha ŭ roliku niama, adnak u kadry źjaŭlajucca dvoje arhanizataraŭ jaho pajezdki.

Pravioŭšy dva dni ŭ łahiery z Trampam-małodšym, Kramloŭ viarnuŭsia va Ułan-Batar, a zatym adpraviŭsia na čarhovy baksiorski pajadynak IBA u Jakuck, piša FT. Tramp-małodšy zastaŭsia ŭ Manholii jašče na tydzień i nakiravaŭsia z ajmaka Uus u ajmak Bajan-Ułhij, kab papalavać na sibirskaha hornaha kazła.

Padčas pajezdki Tramp-małodšy, pavodle słoŭ adnaho z hidaŭ, zabiŭ ałtajskaha archara (vid znachodzicca pad pahrozaj źniknieńnia). Z 2019 hoda syn prezidenta zastreliŭ jak minimum jašče dvuch archaraŭ padčas palaŭničych pajezdak u Manholiju, piša FT.

U pajezdcy taksama ŭdzielničaŭ daŭni sponsar Respublikanskaj partyi Kievin Smoł, jaki ŭžo palavaŭ z Trampam-małodšym.

Paśla palavańnia syn prezidenta ZŠA viarnuŭsia va Ułan-Batar i pravioŭ šerah sustreč, u tym liku z prezidentam Manholii Uchnaahijnam Churełsucham, piša FT. Pradstaŭnik manholskaha ŭrada apublikavaŭ fatahrafii ŭ Facebook i napisaŭ, što baki abmierkavali adnosiny ZŠA i Manholii, a taksama patencyjnyja mahčymaści dla biznesu. Adnak nieŭzabavie publikacyju vydalili. Pradstaŭnik Trampa-małodšaha zajaviŭ, što sustreča mieła nieaficyjny charaktar i ŭdzielniki pieravažna abmiarkoŭvali adpačynak na pryrodzie.

Kramloŭ i Marcirosaŭ nie adkazali na zapyty ab kamientaryjach.

Kramloŭ — siabar kiraŭnika Słužby biaśpieki prezidenta Rasii Alaksieja Rubiežnaha. 

Sustreča ŭ Manholii adbyłasia paśla taho, jak u mai Kramloŭ naviedaŭ niekalki mierapryjemstvaŭ u ramkach viasielnych uračystaściaŭ Trampa-małodšaha na pryvatnym karybskim vostravie i apłaciŭ častku vydatkaŭ. Pra ŭdzieł rasijanina ŭ viasielli Trampa-małodšaha pieršaj paviedamiła ProPublica. Paśla hetaha prezident zajaviŭ, što jaho syn viarnuŭ Kramlovu hrošy.

Pieršaja viadomaja sustreča Kramlova i Trampa-małodšaha adbyłasia letaś na mierapryjemstvie IBA u Stambule. Na scenie razam ź lehiendarnym filipinskim baksioram Meni Pakjaa Tramp-małodšy nazvaŭ Kramlova «nie prosta lidaram, ale i siabram».

U studzieni 2009 hoda pry krušeńni viertalota na Ałtai padčas palavańnia na archaraŭ, zaniesienych u Čyrvonuju knihu, zahinuŭ paŭnamocny pradstaŭnik prezidenta Rasii ŭ Dziarždumie Alaksandr Kasopkin. Paśla jaho abvinavacili ŭ brakańjerstvie.

• 1
• 0
• 2
• 6
• 0
• 0
• 6
• 0