Tramp zajaviŭ, što jahony syn viernie rasijskamu aliharchu hrošy za viasielnyja viečaryny
Žonka Trampa-małodšaha raniej pisała, što Umar Kramloŭ zrabiŭ im «nadzvyčaj ščodry viasielny padarunak».
Prezident ZŠA Donald Tramp zajaviŭ, što jaho syn, Donald Tramp-małodšy, paabiacaŭ vianuć hrošy rasijskamu aliharchu, jaki spansiravaŭ śviatočnyja mierapryjemstvy z nahody jaho viasiella na Bahamach u mai, piša Reuters.
Raniej paviedamlałasia, što rasijski biznesmien i prezident Mižnarodnaj asacyjacyi boksa Umar Kramloŭ zapłaciŭ sotni tysiač dołaraŭ za śviatočnyja viasielnyja mierapryjemstvy syna Trampa.
Tramp zajaviŭ žurnalistam, što kali jon spytaŭ u svajho syna pra heta, toj adkazaŭ: «Nie, ja viartaju hrošy, tata». «I heta było niekatory čas tamu. Tamu ja čuŭ, što jon płacić».
Krynica ahienctva paćvierdziła, što Tramp-małodšy płanuje kampiensavać vydatki Kramlovu.
Sam Donald Tramp nie prysutničaŭ na viasielli svajho syna. Raniej jon kazaŭ, što nie viedaje Kramlova i što viasielny skandał — heta «nie vialikaja prablema».
Tramp zajaviŭ u piatnicu, što ładziŭ viasielnyja viečaryny dla «mnohich ludziej» u «pryhožych miescach», takich jak jaho kłub Mar-a-Łaha ŭ Pałm-Bič, štat Fłaryda.
«Pry ŭsim hetym ja razumieju, što Don viarnuŭ jamu hrošy».
Žonka Trampa-małodšaha, Biecina Tramp, u paście ŭ Instagram u paniadziełak nazvała Kramlova siabram, jaki zrabiŭ «nadzvyčaj ščodry viasielny padarunak», padkreśliŭšy, što Kramloŭ apłaciŭ dźvie paślaviasielnyja viečaryny, a nie samo viasielle.
Kamientary