96‑hadovy Uoren Bafiet pierastaje kiravać kampanijaj Berkshire Hathaway
Viadomy amierykanski inviestar i miljarder Uoren Bafiet pieradaŭ pasadu staršyni rady dyrektaraŭ kampanii Berkshire Hathaway svajmu synu Hovardu Bafietu. Pra heta jon paviedamiŭ u liście da akcyjanieraŭ, apublikavanym razam z aficyjnym paćviardžeńniem kadravych pierastanovak.
Uoren Bafiet nahadaŭ, što 30 žniŭnia jamu spoŭniłasia 96 hadoŭ, a ŭ Berkshire Hathaway jon pracuje ŭžo bolš za 60 hadoŭ — z 1965-ha. Jon taksama adznačyŭ dziejnaść Hreha Abiela, jakomu ŭ 2025 hodzie pieradaŭ pasadu hienieralnaha dyrektara kampanii, zajaviŭšy, što toj całkam apraŭdaŭ jaho čakańni.
Biznesmien patłumačyŭ, što ciapier nadyšoŭ najbolš prydatny momant dla zaviaršeńnia pierachodu. Jon stanie hanarovym staršynioj i zastaniecca členam rady dyrektaraŭ, a jahony syn Hovard zojmie pasadu staršyni. U śniežni Hovardu Bafietu spoŭnicca 72 hady, i jon užo 33 hady ŭvachodzić u radu dyrektaraŭ Berkshire Hathaway.
Pavodle Uorena Bafieta, Hreh Abiel budzie kiravać kampanijaj, a Hovard — zachoŭvać jaje karparatyŭnuju kulturu i kaštoŭnaści. Bafiet paraŭnaŭ syna sa svojeasablivaj strachoŭkaj dla akcyjanieraŭ, da jakoj jany spadziajucca nikoli nie źviartacca, ale jakaja pavinna być u vypadku nieabchodnaści.
U svaim liście miljarder napisaŭ, što čas zaŭsiody biare vierch, adnak asabista da jaho jon byŭ vielmi spahadlivym. Bafiet zajaviŭ, što ciapierašniaje stanovišča Berkshire Hathaway dazvalaje jamu jak nikoli ŭpeŭniena hladzieć u budučyniu kampanii, jakaja, na jaho dumku, znachodzicca ŭ nadziejnych rukach.
Berkshire Hathaway paćvierdziła abrańnie Hovarda Bafieta staršynioj rady dyrektaraŭ u adpaviednaści z daŭnim płanam pierajemnaści. Uoren Bafiet nieadkładna atrymaŭ pasadu hanarovaha staršyni na znak pryznańnia jaho značnaha ŭkładu ŭ raźvićcio kampanii.
Z 1999 hoda Hovard Bafiet uznačalvaje dabračynny fond, jaki nosić jaho imia i zajmajecca pytańniami hłabalnaj charčovaj biaśpieki i źmiakčeńnia kanfliktaŭ. Amal dziesiać hadoŭ jon taksama byŭ pasłom dobraj voli Suśvietnaj charčovaj prahramy AAN, nakiravanaj na baraćbu z hoładam.
U svoj čas Uoren Bafiet pieratvaryŭ tekstylnaje pradpryjemstva, jakoje pieražyvała kryzis, u inviestycyjnuju impieryju. Ciapier košt Berkshire Hathaway pieravyšaje 1 tryljon dalaraŭ. Asabisty kapitał Bafieta aceńvajecca na 114,7 miljarda dalaraŭ, što pavodle rejtynhu Forbes stavić jaho na dziasiataje miesca siarod najbahaciejšych ludziej śvietu.
Ciapier čytajuć
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač26
Kamientary