U pieršym štacie ŭ ZŠA dazvolili štučnamu intelektu vypisvać recepty ludziam
Jak pracuje sistema?
Ułady štata Juta dazvolili sistemie startapa Nolla Health vypisvać pieršyja recepty na vonkavyja srodki ad akne dla darosłych.
Hadavy piłotny prajekt pačaŭsia 5 kastryčnika 2026 hoda. Heta pieršy vypadak u ZŠA, kali štučnamu intelektu dazvolili nie tolki praciahvać raniej pryznačanaje lačeńnie, ale i pačynać jaho.
Pacyjent paćviardžaje svaju asobu, zapaŭniaje miedycynskuju ankietu i fatahrafuje svoj tvar na smartfon ź piaci rakursaŭ.
Dadatak aceńvaje ciažkaść akne, uličvaje historyju lačeńnia i vybiraje adnu z vaśmi zahadzia zaćvierdžanych schiem. Paśla hetaha recept adpraŭlajecca ŭ vybranuju apteku abo partniorskuju słužbu dastaŭki.
Paŭnamoctvy sistemy abmiežavanyja lohkaj i ŭmieranaj formami akne i tolki vonkavymi kremami i hielami. ŠI nie moža pryznačać tabletki ci harmanalnuju terapiju.
Samastojnaść sistemy budzie ŭvodzicca paetapna. Recepty pieršych 100 pacyjentaŭ pierad adpraŭkaj pavinny pravieryć dva niezaležnyja daktary ź licenzijaj štata Juta. Zatym ŠI zmoža adrazu nakiroŭvać pryznačeńni ŭ apteku, a daktary buduć praviarać usie vypadki zadniaj dataj nie radziej za adzin raz na tydzień.
Kožny pierachod na nastupny etap patrabuje asobnaha piśmovaha dazvołu ŭładaŭ štata. Siarod abaviazkovych umoŭ — supadzieńnie rekamiendacyj ŠI i daktaroŭ nie mienš jak u 95% vypadkaŭ, adsutnaść surjoznych pabočnych vypadkaŭ i prapuščanych miedycynskich supraćpakazańniaŭ.
Apteka pavinna viedać, što recept stvaryŭ ŠI, i atrymać kantaktnyja danyja doktara. Pra niepažadanyja padziei kampanija abaviazana paviedamlać uładam na praciahu 24 hadzin.
Udzieł u piłotnym prajekcie kaštuje 4,99 dalara ŭ miesiac biez uliku koštu lekaŭ. Pavodle danych Nolla Health, ad adkryćcia prykładańnia da adpraŭki recepta prachodzić 10—15 chvilin. Kampanija supraćpastaŭlaje hety praces čakańniu pryjomu dermatołaha, jakoje ŭ štacie Juta, pavodle jaje acenki, u siarednim składaje 61 dzień.
Kamientary